ଜମ୍ମୁ-କଶ୍ମୀର,୨୮ ।୧: ଏବେ ଜମ୍ମୁ-କଶ୍ମୀରରେ ଚାଲିଛି କଂଗ୍ରେସର ଭାରତ ଯୋଡୋ ଯାତ୍ରା । ଶନିବାର ଏହି ଯାତ୍ରାରେ ପ୍ରିୟଙ୍କା ଗାନ୍ଧୀ ଯୋଗ ଦେଇ ପାରନ୍ତି ବୋଲି ଜଣାପଡିଛି । ପ୍ରଦେଶ କଂଗ୍ରେସ ଅଧ୍ୟକ୍ଷ ବିକାର ରସୁଲୱାନି କହିଛନ୍ତି, କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ଭଦ୍ରା ଶନିବାର ଭାରତ ଯୋଡୋ ଯାତ୍ରାରେ ସାମିଲ ହୋଇପାରନ୍ତି । ଏହି ଯାତ୍ରାରେ ପିଡିପି ମୁଖ୍ୟ ମେହେବୁବା ମୁଫତିଙ୍କ ସହ ବହୁ ସଂଖ୍ୟାରେ ମହିଳା ବି ସାମିଲ ହୋଇପାରନ୍ତି । ଅୱନ୍ତିପୋରା ଚରସୁରୁ ପ୍ରିୟଙ୍କା ଏହି ଯାତ୍ରାରେ ସାମିଲ ହେବେ ।
ବିରଲା ଇଣ୍ଟରନ୍ୟାଶନାଲ ସ୍କୁଲ, ପମ୍ପୋର ନିକଟରେ ଜଳପାନ କରିବା ପରେ ରାତିର ରହଣି ଶ୍ରୀନଗର ବାହାରେ ପନ୍ଥା ଚୌକରେ ଟ୍ରକ ୟାର୍ଡରେ ହେବ । ରବିବାର ଯାତ୍ରା ପନ୍ଥା ଚୌକରୁ ଆରମ୍ଭ ହୋଇ ବୁଲୱର୍ଡ ରୋଡରେ ଥିବା ନେହେରୁ ପାର୍କରେ ପହଞ୍ଚିବ । ଯାତ୍ରା ଏବେ କଶ୍ମୀରର ଅନନ୍ତନାଗ ଜିଲାରେ ରହିଛି ।
ସୂଚନାଯୋଗ୍ୟ, ଶୁକ୍ରବାର ବନିହାଲରୁ କଶ୍ମୀର ପର୍ଯ୍ୟନ୍ତ ଆରମ୍ଭ ହୋଇଥିବା ଭାରତ ଯୋଡୋ ଯାତ୍ରାରେ ସୁରକ୍ଷାକୁ ନେଇ ବିବାଦ ଉପୁଜିଛି । ରାହୁଲ ଗାନ୍ଧୀ ଓ ଅନ୍ୟ କଂଗ୍ରେସ ନେତା ସୁରକ୍ଷାରେ ତ୍ରୁଟି ଦର୍ଶାଇ କଶ୍ମୀରର ପ୍ରବେଶ ଦ୍ୱାର କାଜିଗୁଂଡରେ ଯାତ୍ରାକୁ ପ୍ରାୟ ଦେଢ ଘଣ୍ଟା ପର୍ଯ୍ୟନ୍ତ ଅଟକାଇ ଦେଇଥିଲେ । ପରେ ରାହୁଲ ଗାଡିରେ ଅନନ୍ତନାଗରୁ ଖନ୍ନାବଲ ଡାକ ବଙ୍ଗଳା ପର୍ଯ୍ୟନ୍ତ ଯାଇଥିଲେ । ସେ ଯିବା ପରେ ଯାତ୍ରାରେ ସାମିଲ ହୋଇଥିବା ଅନ୍ୟମାନେ ଚାଲିଚାଲି ଯାଇଥିଲେ । ରାହୁଲ ଅଭିଯୋଗ କରିଥିଲେ କି ତାଙ୍କ ସୁରକ୍ଷା ବ୍ୟବସ୍ଥାକୁ ସୁନିଶ୍ଚିତ କରିବାରେ ଜମ୍ମୁ-କଶ୍ମୀର ପ୍ରଶାସନ ବିଫଳ ହୋଇଛି । ଯାତ୍ରା ସମୟରେ ରାସ୍ତାର ଦୁଇ ପାଶ୍ୱର୍ରେ ରସି ଧରି ପୋଲିସ ଠିଆ ହୋଇ ନ ଥିଲେ ।
