ଯାଜପୁର ଅଫିସ,୨୮।୧୨: ଗ୍ରାମ୍ୟ ଜଳଯୋଗାଣ ଓ ପରିମଳ(ଆର୍ଡବ୍ଲ୍ୟୁଏସ୍ଏସ୍) ବିଭାଗ ପକ୍ଷରୁ ମିଳିଥିବା ତଥ୍ୟ ଅନୁସାରେ ରାଜ୍ୟର ୮ ଜିଲାର ଖଣି ପ୍ରଭାବିତ ଅଞ୍ଚଳବାସୀଙ୍କ ପାଇଁ ପାନୀୟ ଜଳଯୋଗାଣ ପ୍ରକଳ୍ପ ଆରମ୍ଭ ହୋଇଛି। ଏହି ଜିଲାଗୁଡିକ ହେଲା ଅନୁଗୋଳ, ଢେଙ୍କାନାଳ, ମୟୂରଭଞ୍ଜ, କୋରାପୁଟ, ଝାରସୁଗୁଡ଼ା, ଯାଜପୁର, ସୁନ୍ଦରଗଡ଼ ଓ କେନ୍ଦୁଝର। ୨୧୭ ପାନୀୟ ଜଳ ଯୋଗାଣ ପ୍ରକଳ୍ପ ଜରିଆରେ ୬୯୧ ଗ୍ରାମର ବାସିନ୍ଦା ଉପକୃତ ହୋଇପାରିବେ। ଏଥିପାଇଁ ୮୫୦ କୋଟି ଟଙ୍କା ବ୍ୟୟ ଅଟକଳ କରାଯାଇଥିବାବେଳେ ୪୭୨.୮୯ କୋଟି ଟଙ୍କା ଖର୍ଚ୍ଚ ହୋଇସାରିଛି। ମେଗା ଜଳଯୋଗାଣ ପ୍ରକଳ୍ପ ପାଇଁ ୪ ଠିକାସଂସ୍ଥା ଯଥା ନାଗାର୍ଜୁନ କନଷ୍ଟ୍ରକ୍ସନ କମ୍ପାନୀ(ଏନ୍ସିସି) ଲିଃ, ଏଲ୍ଆଣ୍ଡଟି, ଏମ୍ଇଆଇଏଲ୍ ଓ ଭୋଲଟାସ୍କୁ ଇପିସି ମୋଡ୍ରେ ନିର୍ମାଣ ଦାୟିତ୍ୱ ଦିଆଯାଇଛି। ୩୦ା୧୧ା୨୦୨୦ ସୁଦ୍ଧା ସେଥିରୁ ୨୦୩ କ୍ଷୁଦ୍ର ପ୍ରକଳ୍ପ ସମ୍ପୂର୍ଣ୍ଣ ହୋଇଥିବାବେଳେ ୧୮ଟି ମେଗା ଜଳଯୋଗାଣ ପ୍ରକଳ୍ପ ମଧ୍ୟରୁ ଗୋଟିଏ ବି ସମ୍ପୂର୍ଣ୍ଣ ହୋଇପାରିନାହିଁ। କାର୍ଯ୍ୟ ଆରମ୍ଭ ହେବାର ୨ ବର୍ଷ ମଧ୍ୟରେ ପ୍ରକଳ୍ପ କାର୍ଯ୍ୟ ଶେଷ କରିବାକୁ ସମୟ ସୀମା ଧାର୍ଯ୍ୟ ହୋଇଥିଲା, ଯାହାକି ଅତିବାହିତ ହୋଇଯାଇଛି। ଫଳରେ ଆସନ୍ତା ଗ୍ରୀଷ୍ମ ମାସ ପୂର୍ବରୁ ଶୁଦ୍ଧ ପାନୀୟ ଜଳ ପାଇବା ଆଶା ଖଣି ପ୍ରଭାବିତ ଅଞ୍ଚଳବାସୀଙ୍କ ପାଇଁ ମଉଳିଯାଇଛି ବୋଲି ମତପ୍ରକାଶ ପାଇଛି।
ସରକାରୀ ନିୟମ ଅନୁସାରେ ଖଣି ସଂସ୍ଥାଗୁଡ଼ିକ ପାରିପାର୍ଶ୍ୱିକ ଅଞ୍ଚଳର ବିକାଶ କଥାକୁ ଭୁଲିଯାଇଥିଲେ। ସରକାରଙ୍କ ଦ୍ୱାରା ପ୍ରଣିତ ଡିଏମ୍ଏଫ୍(ଜିଲା ଖଣିଜ ପ୍ରତିଷ୍ଠାନ) ଏବଂ ଓଏମ୍ବିଏଡିସି ପାଣ୍ଠି ମଧ୍ୟ ସୁଚାରୁରୂପେ ବିନିଯୋଗ ହୋଇ ପାରି ନ ଥିଲା। ଫଳରେ ଯାଜପୁର ଜିଲାର ଖଣି ପ୍ରଭାବିତ ସୁକିନ୍ଦା ବ୍ଲକର ନଗଡ଼ା ଭଳି ଚିତ୍ର ସାମ୍ନାକୁ ଆସିଥିଲା। ଏହାପରେ ଗତ କିଛି ବର୍ଷ ହେଲା ଡିଏମ୍ଏଫ୍ ଏବଂ ଓଏମ୍ବିଏଡିସି ପାଣ୍ଠି ବିନିଯୋଗ କଥା ଶୁଣିବାକୁ ମିଳୁଛି। ଏହି କ୍ରମରେ ଅନୁଗୋଳ ଜିଲାର ୯୫, ଢେଙ୍କାନାଳରେ ୪, ମୟୂରଭଞ୍ଜରେ ୧୭, କୋରାପୁଟରେ ୫୮, ଝାରସୁଗୁଡ଼ାରେ ୮, ଯାଜପୁରରେ ୨, ସୁନ୍ଦରଗଡ଼ରେ ୨ ଓ କେନ୍ଦୁଝରରେ ୨୬ଟି କ୍ଷୁଦ୍ର ପ୍ରକଳ୍ପ କାର୍ଯ୍ୟକାରୀ ହୋଇଛି। ଗତ ୫ ବର୍ଷ ହେବ ୩୫୪ ଗ୍ରାମର ବାସିନ୍ଦାଙ୍କ ପାଇଁ ୩୨ଟି ପ୍ରଥମ ପର୍ଯ୍ୟାୟ ମେଗା ଜଳଯୋଗାଣ ପ୍ରକଳ୍ପ କାର୍ଯ୍ୟ ହାତକୁ ନିଆଯାଇଛି। ସେଥିରୁ ଗୋଟିଏ ବି ପ୍ରକଳ୍ପ ସମ୍ପୂର୍ଣ୍ଣ ହୋଇପାରି ନ ଥିବାବେଳେ ୧୮ଟି ପ୍ରକଳ୍ପ କାର୍ଯ୍ୟ ଆରମ୍ଭ ହୋଇଛି। ଏଥିପାଇଁ ୪୪୭୮.୬୩ କୋଟି ଟଙ୍କା ବ୍ୟୟ ଅଟକଳ କରାଯାଇଥିବାବେଳେ ୧୮୨୬.୧୫ କୋଟି ଟଙ୍କା ପ୍ରଦାନ କରାଯାଇଛି। ସେଥିରୁ ୧୨୭୭.୭୪ କୋଟି ଟଙ୍କା ଖର୍ଚ୍ଚ କରାଯାଇ ବିନିଯୋଗ ପତ୍ର(ୟୁସି) ଦାଖଲ ହୋଇଛି। ହେଲେ ଗୋଟିଏ ବି ପ୍ରକଳ୍ପ ସମ୍ପୂର୍ଣ୍ଣ ହୋଇ ପାରିନାହିଁ। ସେଗୁଡ଼ିକ ହେଲା ହାଟଡିହି, ଚମ୍ପୁଆ, ହରିଚନ୍ଦନପୁର, ରାଇରଙ୍ଗପୁର, କୁସୁମୀ, ଯଶିପୁର, ହେମଗିର, କୁତ୍ରା, ରାଜଗାଙ୍ଗପୁର, ଗୁରୁଣ୍ଡିଆ, କୋଇଡା, ଲହୁଣିପଡା, କୁଆଁରମୁଣ୍ଡା, ନୂଆଗାଁ, ସୁକିନ୍ଦା ୧, ସୁକିନ୍ଦା ୨। ଏହାବାଦ୍ ସୁନ୍ଦରଗଡ଼ ଜିଲାର ୧୨୨ ଗ୍ରାମ ଓ କେନ୍ଦୁଝରର ୧୧୫ ଗ୍ରାମର ବାସିନ୍ଦାଙ୍କ ପାଇଁ ମେଗା ଜଳଯୋଗାଣ ପ୍ରକଳ୍ପ କାର୍ଯ୍ୟକାରୀ ହେଉଛି। ଏଥିରୁ କେତେକ ପ୍ରକଳ୍ପରେ ସମ୍ପୃକ୍ତ ଠିକାସଂସ୍ଥା ଦ୍ୱାରା ଚଞ୍ଚକତା କରି ନିମ୍ନମାନର ନିର୍ମାଣ ସାମଗ୍ରୀ ବ୍ୟବହାର ହେଉଥିବା ନେଇ ପୂର୍ବରୁ ମାନ ଯାଞ୍ଚକାରୀ ଅଥରିଟି ଇଞ୍ଜିନିୟର୍ସ ପକ୍ଷରୁ ରିପୋର୍ଟ ଦିଆଯାଇଛି। ଉପରୋକ୍ତ ତଥ୍ୟକୁ ଅବଲୋକନ କଲେ କ୍ଷୁଦ୍ର ଓ ମେଗା ଜଳଯୋଗାଣ ପ୍ରକଳ୍ପରେ ଖଣି ସମୃଦ୍ଧ ଯାଜପୁର ଜିଲାକୁ ଉପେକ୍ଷା କରାଯାଇଥିବା ମନେହେଉଛି। ଏ ସଂକ୍ରାନ୍ତରେ ଯାଜପୁର ଆର୍ଡବ୍ଲ୍ୟୁଏସ୍ଏସ୍ ନିର୍ବାହୀ ଯନ୍ତ୍ରୀ ଅମିୟ କୁମାର ପରିଜାଙ୍କୁ ଯୋଗାଯୋଗ କରାଯାଇଥିଲେ ହେଁ ତାଙ୍କ ମୋବାଇଲ ଫୋନ୍ ସୁଇଚ୍ ଅଫ୍ ଦର୍ଶାଇଥିଲା।
ହର୍ଷବର୍ଦ୍ଧନ ବେହେରା
