ମେରଟ,୧୫।୧୨: କମେଡିଆନ ସୁନୀଲ ପାଲ ଏବଂ ଅଭିନେତା ମୁସ୍ତାକ ଖାନଙ୍କ ଅପହରଣକାରୀ ଅର୍ଜୁନ କର୍ଣ୍ଣଓ୍ବାଲଙ୍କୁ ପୋଲିସ ଏନକାଉଣ୍ଟର କରିଛି। ଅଭିଯୁକ୍ତଜଣଙ୍କ ପୋଲିସ ହେପାଜତରୁ ଫେରାର ହେବାକୁ ଚେଷ୍ଟା କରୁଥିଲେ। ହେଲେ ପୋଲିସର ପାଲଟା ଜବାବ ଦେଇ ଏନକାଉଣ୍ଟର କରିଛି। ତେବେ ଘଟଣା ସମୟରେ ପୋଲିସ ଅଭିଯୁକ୍ତଙ୍କୁ କୋର୍ଟରେ ହାଜର କରିବା ପୂର୍ବରୁ ଡାକ୍ତରୀ ଯାଞ୍ଚ ପାଇଁ ନେଉଥିଲା।
ଶନିବାର ଲାଲକୁର୍ତ୍ତୀ ଥାନା ପୋଲିସ ତାଙ୍କୁ ଗିରଫ କରିଥିଲା। ରବିବାର ତାଙ୍କୁ କୋର୍ଟରେ ହାଜର କରାଯିବା ପୂର୍ବରୁ ଡାକ୍ତରୀ ଯାଞ୍ଚ ଲାଗି ନିଆ ଯାଉଥିଲା। ହେଲେ ସେ ରାସ୍ତାରୁ ସୁଯୋଗ ଦେଖି ଖସି ଯିବାକୁ ଚେଷ୍ଟା କରିଥିଲେ। ଚଳନ୍ତା ଗାଡ଼ିରୁ କନଷ୍ଟେବଳଙ୍କ ବନ୍ଧୁକ ଧରି ସେ କୁଦି ପଡ଼ିଥିଲେ। ଏହାପରେ ସେ ପୋଲିସ ଉପରକୁ ଗୁଳି ଚଳାଇଥିଲେ। ପୋଲିସ ମଧ୍ୟ ପାଲଟା ଗୁଳି ଚାଳନା କରିଥିଲା। ଏଥିରୁ ଗୋଟିଏ ଗୁଳି ଅର୍ଜୁନଙ୍କ ଗୋଡ଼ରେ ବାଜିଛି।
ପୋଲିସ କହିଛି ଯେ ଅଭିଯୁକ୍ତଜଣଙ୍କ କମେଡିଆନ ସୁନୀଲ ପାଲ, ଅଭିନେତା ମୁସ୍ତାକ ଖାନ୍ ସମେତ ଅନେକ କଳାକାରଙ୍କୁ ଅପହରଣ କରି ଟଙ୍କା ମାଗୁଥିଲେ। ଏନେଇ ଅଭିଯୋଗ ହେବା ପରେ ଶନିବାର ରାତିରେ ଗିରଫ କରିଥିଲା।
କହିରଖୁଛୁ, ଅର୍ଜୁନ କୁଖ୍ୟାତ ଅପରାଧୀ ଲବି ଗ୍ୟାଙ୍ଗର ସଦସ୍ୟ। ଉଭୟ ସୁନୀଲଙ୍କୁ ଅପହରଣ କରି ୮ ଲକ୍ଷ ଟଙ୍କା ଆଦାୟ କରିଥିଲେ। ଏହାଛଡ଼ା ତାଙ୍କର ଆଗାମୀ ଟାର୍ଗେଟ ଶକ୍ତି କପୁର ଥିଲେ।
