ଭଞ୍ଜନଗର,୨୭।୭(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର କବି ସମ୍ରାଟ ମିଡ଼ିଆ କ୍ଲବ ରବିବାର ଗାୟତ୍ରୀ ମନ୍ଦିର ନିକଟରେ ମେଗା ରକ୍ତଦାନ ଶିବିର ଆୟୋଜନ କରିଥିଲା । ଶିବିରରୁ ୧୧୬ ପ୍ୟାକେଟ ରକ୍ତ ସଂଗୃହୀତ ହୋଇଥିଲା। ଭଞ୍ଜନଗର ବ୍ଲଡ ବ୍ୟାଙ୍କ କର୍ମଚାରୀ ରକ୍ତ ସଂଗୃହୀତ କରିଥିଲେ। ମିଡ଼ିଆ କ୍ଲବ ଆଜିର କାର୍ଯ୍ୟକ୍ରମକୁ ଭଞ୍ଜନଗରର ପ୍ରମୁଖ ୩ ଦଳ ଯଥା ଭାଜପା, ବିଜେଡି, କଂଗ୍ରେସ ଦଳର ନେତାଙ୍କୁ ଅତିଥି ଭାବେ ଡାକି ଏକାଠି କରିଥିଲା। ମିଡ଼ିଆ କ୍ଲବର ଏହିଭଳି କାର୍ଯ୍ୟକ୍ରମ ଆଜି ଭଞ୍ଜନଗରରେ ଚର୍ଚ୍ଚାର ବିଷୟ ହୋଇଛି। ଅପରପକ୍ଷେ ମିଡ଼ିଆ କ୍ଲବର ଏହିଭଳି କାର୍ଯ୍ୟକ୍ରମକୁ କଂଗ୍ରେସ ତାର ସୋସିଆଲ ମିଡିଆରେ ଲେଖିଛି ମାଟି ଆଗ, ଦଳ ପଛ। ସେହିଭଳି ଭାଜପାର ଜଣେ ନେତା କହିଛନ୍ତି ଯେ ରକ୍ତଦାନ ଏକ ମହାନ କାର୍ଯ୍ୟ। ଏଠି ରାଜନୀତି କରିବା ଠିକ ନୁହେଁ। ଲୋକଙ୍କ ସେବା କାର୍ଯ୍ୟ ଯେ କଲା ଆମେ ତାଙ୍କୁ ଉତ୍ସାହିତ କରିବା ହେଉଛି ଆମର ଧର୍ମ। ବିଜେଡି ନେତା ତଥା ଏନ ଏ ସି ଅଧକ୍ଷ ଗୋପବନ୍ଧୁ ମହାପାତ୍ର ମଧ୍ୟ କାର୍ଯ୍ୟକ୍ରମକୁ ଉଚ୍ଚ ପ୍ରଶଂସା କରିଛନ୍ତି। ଶିବିରକୁ ଭଞ୍ଜନଗର ଭାଜପା ବିଧାୟକ ପ୍ରଦ୍ୟୁମ୍ନ କୁମାର ନାୟକ ମୁଖ୍ୟ ଅତିଥି ଭାବେ ଯୋଗଦେଇ ଉଦଘାଟନ କରିଥିଲେ। ଭଞ୍ଜନଗର ଏନଏସି ଅଧ୍ୟକ୍ଷ ଗୋପବନ୍ଧୁ ମହାପାତ୍ର ସମ୍ମାନିତ ଅତିଥି ଭାବେ ଯୋଗ ଦେଇଥିଲେ। ଏହାର କିଛି ସମୟ ପରେ କଂଗ୍ରେସ ନେତା କୁଲୁ ଭୂୟାଁ ଏବଂ ସାମାଜିକ କର୍ମୀ ତଥା ଯୁବନେତା ଆଯୋଧ୍ୟାନାଥ ମହାପାତ୍ର ରକ୍ତଦାନ ଶିବିର ପରିଦର୍ଶନ କରି ରକ୍ତଦାତା ଙ୍କୁ ଉତ୍ସାହିତ କରିଥିଲେ। ଏହି ଅବସରରେ କ୍ଲବ ପକ୍ଷରୁ ବିଧାୟକ ସମେତ ସମସ୍ତ ଅତିଥିଙ୍କୁ ସମ୍ବର୍ଦ୍ଧିତ କରାଯାଇଥିଲା। ସଭାପତି ପ୍ରଦୀପ ସାଇଁ କାର୍ଯ୍ୟକ୍ରମକୁ ସଂଯୋଜନା କରିଥିଲେ। କାର୍ଯ୍ୟକ୍ରମକୁ ପରିଚାଳନା କରିବାରେ କ୍ଲବର ସମସ୍ତ କର୍ମକର୍ତ୍ତା ସହଯୋଗ କରିଥିଲେ।
