ଯାଜପୁର ଟାଉନ,୧୧ା୨(ଡି.ଏନ.ଏ.): ଯାଜପୁର ଜିଲା ମୁଖ୍ୟଚିକିତ୍ସାଳୟରେ ଅସ୍ତ୍ରୋପଚରାବେଳେ ନାଡ଼ି କଟିଯିବାରୁ ଜଣେ ପ୍ରସୂତିଙ୍କ ମୃତ୍ୟୁ ହୋଇଛି। ଏଥିସହିତ ଅସ୍ତ୍ରୋପଚାର ଲାଗି ଡାକ୍ତର ୫ ହଜାର ଟଙ୍କା ନେଇଥିଲେ ବୋଲି ଅଭିଯୋଗ ହୋଇଛି। ସମ୍ପୃକ୍ତ ଡାକ୍ତରଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ମହିଳାଙ୍କ ସ୍ବାମୀ ଜିଲାପାଳଙ୍କ ନିକଟରେ ନିବେଦନ କରିଛନ୍ତି।
ସୂଚନା ଅନୁସାରେ, ବିଞ୍ଝାରପୁର ଥାନା ଅଧୀନ ଘଣ୍ଟିଆଳି ଗ୍ରାମର ଶ୍ୟାମାନନ୍ଦ ନାୟକଙ୍କ ସ୍ତ୍ରୀ ମନସ୍ବିନୀଙ୍କ ଗର୍ଭଯନ୍ତ୍ରଣା ହେବାରୁ ମଙ୍ଗଳବାର ତାଙ୍କୁ ଯାଜପୁର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ଦାୟିତ୍ୱରେ ଥିବା ଡାକ୍ତର ମନସ୍ବିନୀଙ୍କ ସ୍ବାମୀଙ୍କୁ ଅପରେଶନ ପାଇଁ ୫ ହଜାର ଟଙ୍କା ମାଗିଥିଲେ। ଶ୍ୟାମାନନ୍ଦ ଟଙ୍କା ଦେବାପରେ ବୁଧବାର ମନସ୍ବିନୀଙ୍କ ଅସ୍ତ୍ରୋପଚାର କରାଯାଇଥିଲା। ସେଠାରେ ସେ ଏକ ପୁତ୍ର ସନ୍ତାନ ଜନ୍ମ ଦେଇଥିଲେ। ମାତ୍ର ଏହାପରେ ମନସ୍ବିନୀଙ୍କ ପ୍ରବଳ ରକ୍ତସ୍ରାବ ହୋଇଥିଲା। ତେଣୁ ମନସ୍ବିନୀଙ୍କୁ ୭ଟି ରକ୍ତ ଦିଆଯାଇଥିଲା। ହେଲେ ରକ୍ତସ୍ରାବ ବନ୍ଦ ନ ହେବାରୁ ତାଙ୍କୁ କଟକ ବଡମେଡିକାଲ ନେବାପାଇଁ ସମ୍ପୃକ୍ତ ଡାକ୍ତର କହିଥିଲେ। ପରିବାର ଲୋକେ ମନସ୍ବିନୀଙ୍କୁ କଟକ ବଡ଼ମେଡିକାଲ ନେଇଥିଲେ। ସେଠାରେ ଡାକ୍ତର ପରୀକ୍ଷା କରିବା ପରେ ଏକ ନାଡ଼ି କାଟିଦିଆଯାଇଥିବାରୁ ଏପରି ରକ୍ତସ୍ରାବ ହେଉଛି ବୋଲି କହିଥିଲେ। ଅତ୍ୟାଧିକ ରକ୍ତସ୍ରାବ କାରଣରୁ ସେ ଗୁରୁତର ହୋଇପଡିଥିଲେ। ଶେଷରେ ତାଙ୍କର ମୃତ୍ୟୁ ଘଟିଥିଲା। ପୂର୍ବରୁ ତାଙ୍କର ଏକ ୪ବର୍ଷର ଏକ ପୁଅ ଅଛି। ଏ ସମ୍ପର୍କରେ ଜିଲା ମୁଖ୍ୟ ଚିକିତ୍ସାଧିକାରୀ ସୁଧାଂଶୁ ଶେଖର ବଳଙ୍କୁ ଯୋଗାଯୋଗ କରିବାକୁ ଚେଷ୍ଟା କରାଯାଇଥିଲା। ହେଲେ ତାହା ସମ୍ଭବ ହୋଇ ପାରିନାହିଁ।
