ପ୍ୟାରିସ୍,୨୧ା୧୨(ପି.ଟି): ବିଶ୍ୱକପ୍ ଫାଇନାଲରେ ଫ୍ରାନ୍ସ ଦଳ ପରାଜିତ ହୋଇଥିଲେ ହେଁ ପ୍ୟାରିସରେ ଦଳକୁ ମିଳିଛି ଅଦ୍ଭୂତପୂର୍ବ ସ୍ବାଗତ। କିଲିଆନ୍ ଏମ୍ବାପେ ଏବଂ ଦଳର ଅନ୍ୟ ସମସ୍ତ ସଦସ୍ୟ ଚାର୍ଲସ ଡେ ଗଲ୍ଲେ ବିମାନ ବନ୍ଦରରେ ପହଞ୍ଚିବା ପରେ ଲକ୍ଷ ଲକ୍ଷ ସମର୍ଥକ ଦଳର ସମର୍ଥନ ପାଇଁ ଉପସ୍ଥିତ ଥିଲେ। ପରାଜୟ ଦୁଃଖରେ ଖେଳାଳିମାନେ ଆସିଥିଲେ ହେଁ ବିମାନ ବନ୍ଦର ବାହାରେ ‘ଧନ୍ୟବାଦ’ ଓ ‘ପ୍ୟାରିସ୍ ତୁମକୁ ଭଲପାଏ’ ବୋଲି ପ୍ଲା କାର୍ଡ ସହ ଅପେକ୍ଷା କରିଥିଲେ ଫ୍ୟାନ୍। ଏହାପରେ ବସରେ ଡେ ଲା କନକର୍ଡ ପର୍ଯ୍ୟନ୍ତ ଯାଇଥିଲା। ଏହାପାର ଚାମ୍ପ ଏଲିସ୍ରେ ଦଳକୁ ପ୍ୟାରେଡ ଜରିଆରେ ସମ୍ବର୍ଦ୍ଧିତ କରାଯାଇଥିଲା। ଏପରିକି ୨୦୧୮ ରୁଷିଆ ବିଶ୍ୱକପରେ ଦଳ ଚାମ୍ପିୟନ ହୋଇ ଫେରିଥିଲେ ମଧ୍ୟ ଏଭଳି ସମ୍ବର୍ଦ୍ଧନା ମିଳିନଥିଲା। ପ୍ରଶଂସକ ମାନେ ଦଳର ସମର୍ଥନରେ ବିଭିନ୍ନ ସ୍ଲୋଗାନ ଦେଉଥିବା ବେଳେ ଫ୍ରାନ୍ସ ଦଳର ଅଧିନାୟକ ହ୍ୟୁଗୋ ଲାରିସ୍, ଅଲିଭର ଗିରୁଡ୍, ଓସୁମାନେ ଡେମ୍ବେଲେ, ଆଣ୍ଟୋନିଓ ଗ୍ରୀଜମ୍ୟାନ୍ ଓ କିଲିଆନ୍ ଏମ୍ବାପେଙ୍କ ପରି ଖେଳାଳି ଉପସ୍ଥିତ ଫ୍ୟାନଙ୍କୁ ହାତ ହଲାଇ ଅଭିବାଦନ କରିଥିଲେ। ଉଲ୍ଲେଖଯୋଗ୍ୟ ଯେ, କିଲିଆନ୍ ଏମ୍ବାପେଙ୍କ ହ୍ୟାଟ୍ରିକ୍ ସତ୍ତ୍ୱେ ଫ୍ରାନ୍ସ ଦଳ ପେନାଲ୍ଟି ଶୁଟଆଉଟକୁ ୪-୨ରେ ହାରିବା ସହିତ ଟାଇଟଲ ଡିଫେଣ୍ଡ କରିବାରେ ବିଫଳ ହୋଇଥିଲା। ଚଳିତ ବିଶ୍ୱକପରେ ଫ୍ରାନ୍ସରେ ୨୪ ମିଲିୟନ ଦର୍ଶକ ଟିଭିରେ ଏହାର ମଜା ନେଇଥିଲେ। ଟିଭି ଦେଖୁଥିବା ଲୋକଙ୍କ ମଧ୍ୟରେ ୧୦ରୁ ୮ ଜଣ ଲୋକ ଫୁଟବଲ ବିଶ୍ୱକପ ଦେଖିଥିଲେ।
