ଢାକା,୧୬।୭(ପି.ଟି.): ବାଂଲାଦେଶ ପୂର୍ବତନ ଅଧିନାୟକ ମଶ୍ରାଫି ମୋର୍ତ୍ତାଜା କରୋନା ଭାଇରସ୍ ସଂକ୍ରମଣରୁ ମୁକ୍ତ ହୋଇଛନ୍ତି। ଜୁନ୍ ୨୦ ତାରିଖରୁ ସେ ଘରେ ରହି ଚିକିତ୍ସିତ ହୋଇ ଆସୁଥିଲେ। କୋଭିଡ୍-୧୯ ପରୀକ୍ଷରେ ନେଗେଟିଭ୍ ବୋଲି ମୋର୍ତ୍ତାଜା ମଙ୍ଗଳବାର ନିଜ ଫେସ୍ବୁକ୍ ପେଜ୍ରେ ଉଲ୍ଲେଖ କରିଛନ୍ତି। ଭଗବାନଙ୍କ ଦୟାରୁ ଓ ସମସ୍ତଙ୍କ ଅଶାର୍ବାଦରୁ ଏହି ଭାଇରସ୍ ସଂକ୍ରମଣରୁ ମୁକ୍ତ ହୋଇଛି ବୋଲି ସେ କହିଛନ୍ତି। ପୂର୍ବରୁ କରୋନ ଭାଇରସ୍ ପରୀକ୍ଷାରେ ମୁଁ ପଜିଟିଭ୍ ବୋଲି ଜଣା ପଡିଥିଲା। ଘରୋ ଚିକିତ୍ସିତ ହୋଇ ଏବେ ସମ୍ପୂର୍ଣ୍ଣ ସୁସ୍ଥ ହୋଇଛି। ତେଣୁ ଯେଉଁମାନେ ସଂକ୍ରମିତ ହୋଇଛନ୍ତି ସେମାନେ ନିରାଶ ନ ହୋଇ ସକରାତ୍ମକ ମନୋଭାବ ପୋଷଣ କରିବା ଦରକାର। ଏକାଠି ହୋଇ ଲଢ଼ିଲେ ଆମେ ଏହି ଭାଇରସ୍କୁ ହରାଇପାରିବା ବୋଲି ୩୬ ବର୍ଷୀୟ ଏହି ଦ୍ରୁତ ବୋଲର କହିଛନ୍ତି।
ମୋର୍ତ୍ତାଜାଙ୍କ ସ୍ତ୍ରୀ ସୁମୋନା ହକ୍ ମଧ୍ୟ ଏହି ଭାଇରସ ଦ୍ୱାରା ସଂକ୍ରମିତ ହୋଇଥିଲେ। ସେ ଏପର୍ଯ୍ୟନ୍ତ ସୁସ୍ଥ ହୋଇପାରିନାହାନ୍ତି। ଦୁଇ ସପ୍ତାହ ଚିକିତ୍ସିତ ହେବା ପରେ ମଧ୍ୟ ସୁମୋନା ତଥାପି ପଜିଟିଭ୍ ଅଛନ୍ତି। ତେବେ ସେ ଭଲ ଅଛନ୍ତି ବୋଲି ମୋର୍ତ୍ତାଜା କହିଛନ୍ତି। ବାଂଲାଦେଶ ପାର୍ଲାମେଣ୍ଟ ସଦସ୍ୟ ଥିବା ମୋର୍ତ୍ତାଜା ଶାସକ ଆଓ୍ବାମୀ ଲିଗ୍ ତରଫରୁ ପ୍ରତିନିଧିତ୍ୱ କରୁଛନ୍ତି। ଗତ ୨୦ ତାରିଖରେ ସେ ପଜିଟିଭ୍ ବୋଲି ଜଣାପଡିଥିଲା। ଅନ୍ୟ ଦୁଇ ବାଂଲାଦେଶ କ୍ରିକେଟର ନାଫିସ୍ ଇକ୍ବାଲ ଓ ନାଜମୁଲ ଇସ୍ଲାମ ଏହି ଭାଇରସ ସଂକ୍ରମଣରୁ ମୁକ୍ତ ହୋଇସାରିଛନ୍ତି। ୩ ସପ୍ତାହ ତଳେ ଏମାନେ ପଜିଟିଭ୍ ବୋଲି ଜଣାପଡିଥିଲା।
