ଲିସବନ,୩୧।୮: ଜଣେ ଭାରତୀୟ ଗର୍ଭବତୀ ମହିଳାଙ୍କ ମୃତ୍ୟୁକୁ ନେଇ ପର୍ତ୍ତୁଗାଲରେ ହଙ୍ଗାମା ସୃଷ୍ଟି ହୋଇଛି। ଏହି ଘଟଣାରେ ପର୍ତ୍ତୁଗାଲର ସ୍ବାସ୍ଥ୍ୟମନ୍ତ୍ରୀ ମାର୍ଟା ଟେମିଡୋ ତାଙ୍କ ପଦରୁ ଇସ୍ତଫା ଦେଇଛନ୍ତି। ଜଣେ ଭାରତୀୟ ମହିଳା ବୁଲିବାକୁ ପର୍ତ୍ତୁଗାଲ ଯାଇଥିଲେ ଏବଂ ସେ ମଧ୍ୟ ଗର୍ଭବତୀ ଥିଲେ। ୩୪ ବର୍ଷୀୟା ମହିଳା ଜଣକ ପ୍ରସବ ପାଇଁ ଲିସବନର ସାଣ୍ଟା ମାରିଆ ହସ୍ପିଟାଲରେ ଯାଇଥିଲେ। କିନ୍ତୁ ଶଯ୍ୟା ଅଭାବରୁ ତାଙ୍କୁ ଅନ୍ୟ ଏକ ଡାକ୍ତରଖାନା ନିଆଯାଇଥିଲା। ସେଠାରେ ହୃଦଘାତରେ ମହିଳାଙ୍କର ମୃତ୍ୟୁ ହୋଇଥିବା ଅଭିଯୋଗ ହୋଇଥିଲା।
ଯଦିଓ ଏହା ପର୍ତ୍ତୁଗାଲରେ ପ୍ରଥମ ଘଟଣା ନୁହେଁ। ମାତୃତ୍ୱ ୟୁନିଟରେ କର୍ମଚାରୀଙ୍କ ଅଭାବ ପୂର୍ବରୁ ମଧ୍ୟ ଏଭଳି ଅନେକ ଘଟଣା ଘଟିଥିଲା। ଡାକ୍ତର ମାର୍ଟା ଟେମିଡୋ ୨୦୧୮ରୁ ପର୍ତ୍ତୁଗାଲର ସ୍ବାସ୍ଥ୍ୟମନ୍ତ୍ରୀ ଥିଲେ ଏବଂ କରୋନା ବେଳେ ତାଙ୍କ ଉତ୍ତମ କାର୍ଯ୍ୟଶୈଳୀ ଯୋଗୁ ତାଙ୍କୁ ମଧ୍ୟ ସମ୍ମାନିତ କରାଯାଇଥିଲା। କିନ୍ତୁ ବିଦେଶୀ ମହିଳାଙ୍କ ମୃତ୍ୟୁ ଯୋଗୁ ତାଙ୍କ ମନ୍ତ୍ରୀ ପଦ ଯାଇଛି।
ପର୍ତ୍ତୁଗାଲ ସରକାର ଏକ ବିବୃତ୍ତି ଜାରି କରି କହିଛନ୍ତି ଯେ, ଟେମିଡୋ ବୁଝିଛନ୍ତି ଯେ ସେ ଆଉ ସ୍ବାସ୍ଥ୍ୟମନ୍ତ୍ରୀ ଭାବରେ କାର୍ଯ୍ୟ କରିବାକୁ ଯୋଗ୍ୟ ନୁହଁନ୍ତି। ମହିଳାଙ୍କ ମୃତ୍ୟୁ ପରେ ହିଁ ସେ ଇସ୍ତଫା ଦେଇଛନ୍ତି। ପୂର୍ବରୁ ପ୍ରସୂତି ବିଭାଗରେ କର୍ମଚାରୀଙ୍କ ଅଭାବ ହେତୁ ସରକାର ମଧ୍ୟ ବିରୋଧର ସମ୍ମୁଖୀନ ହେଉଛନ୍ତି।
