ଗୟା,୧୪।୧୧: ବିହାରରେ ମାଓବାଦୀମାନେ ତାଣ୍ଡବ ରଚିଛନ୍ତି। ଗୟା ମୁଖ୍ୟାଳୟଠାରୁ ୭୦ କିଲୋମିଟର ଦୂରରେ ଥିବା ଡୁମରିଆ ବ୍ଲକର ମୌନୱାର ଗାଁରେ ମାଓବାଦୀମାନେ ଦୁଇ ମହିଳାଙ୍କ ସମେତ ଗୋଟି, ପରିବାରର ଚାରି ଜଣଙ୍କୁ ଫାଶୀରେ ଲଟକାଇ ହତ୍ୟା କରିଛନ୍ତି। ଚାରିଜଣଙ୍କୁ ଘର ବାହାରେ ଫାଶୀ ଦେଇଛନ୍ତି। ମୃତକମାନଙ୍କ ମଧ୍ୟରେ ଗୋଟିଏ ଘରର ଦୁଇ ସ୍ବାମୀ ଏବଂ ସେମାନଙ୍କ ସ୍ତ୍ରୀ ଅଛନ୍ତି ।
ମାଓବାଦୀଙ୍କ କାଣ୍ଡପରେ ଗାଁରେ ଭୟର ବାତାବରଣ ଖେଳି ଯାଇଛି। ଲୋକେ ଆତଙ୍କିତ ହୋଇ ଘରେ କବାଟ ଦେଇ ରହୁଛନ୍ତି। ମାଓବାଦୀମାନେ ୪ ଜଣଙ୍କୁ ଫାଶୀ ପରେ ଗାଁ ଲୋକଙ୍କ ମଧ୍ୟରେ ଆତଙ୍କ ସୃଷ୍ଟି କରିବା ଉଦ୍ଦେଶ୍ୟରେ ଘରକୁ ବିସ୍ଫୋରଣ କରି ଉଡ଼ାଇବା ସହିତ ମୋଟରସାଇକେଲରେ ନିଆଁ ଲଗାଇ ଦେଇଥିଲେ।
ମୃତକଙ୍କ ମଧ୍ୟରେ ସତ୍ତେନ୍ଦ୍ର ସିଂ, ମହେନ୍ଦ୍ର ସିଂ, ମନୋରାମା ଦେବୀ ଏବଂ ସୁନୀତା ସିଂ ଅଛନ୍ତି। ମାଓବାଦୀମାନେ ଏକ ଚିଠି ମଧ୍ୟ ଛାଡ଼ିଯାଇଛନ୍ତି। ଏଥିରେ ଲେଖାଯାଇଛି ଯେ ମାନବିକତାର ହତ୍ୟାକାରୀ, ଦେଶଦ୍ରୋହୀ ତଥା ବିଶ୍ୱାସଘାତକଙ୍କୁ ମୃତ୍ୟୁଦଣ୍ଡ ଦେବା ବ୍ୟତୀତ ଅନ୍ୟ କୌଣସି ବିକଳ୍ପ ନାହିଁ। ଏହା ହେଉଛି ତାଙ୍କର ଚାରି ସାଥୀ ଅମରଶ, ସୀତା, ଶିବପୁଜନ ଏବଂ ଉଦୟଙ୍କ ହତ୍ୟାର ପ୍ରତିଶୋଧ। ଭବିଷ୍ୟତରେ ମଧ୍ୟ ଏପରି କାର୍ଯ୍ୟ ଜାରି ରହିବ। ତାଙ୍କୁ ବିଷ ଦେଇ ଷଡଯନ୍ତ୍ରର ଶିକାର କରାଯାଇଥିଲା। ମାଓବାଦୀମାନେ ଛାଡ଼ିଯାଇଥିବା ପ୍ରଚାରପତ୍ରରେ ଜନମୁଖୀ ସେନା, ସେଣ୍ଟ୍ରାଲ ଜୋନ ଝାଡଖଣ୍ଡ, ସିପିଆଇ (ମାଓବାଦୀ)ର ନାମ ଲେଖାଯାଇଛି। ଖବର ପାଇ ଗୟା ମୁଖ୍ୟାଳୟର ବରିଷ୍ଠ ଅଧିକାରୀମାନେ ଘଟଣାସ୍ଥଳକୁ ଯାଇଛନ୍ତି।
ଏହି ପ୍ରସଙ୍ଗରେ ଏସଏସପି ଆଦିତ୍ୟ କୁମାର କହିଛନ୍ତି, ’ମାଓବାଦୀମାନେ ନିର୍ବାଚନ ପୂର୍ବରୁ ନିଜର ପ୍ରଭାବ ବିସ୍ତାର କରିବା ଲାଗି ଏଭଳି କରି ଳୋକଙ୍କୁ ଭୟଭୀତ କରିଛନ୍ତି। ଏହି ହତ୍ୟାକାଣ୍ଡ ସେହି ସ୍ଥାନରେ ଘଟିଛି ଯେଉଁଠାରେ ଏନକାଉଣ୍ଟରରେ ୪ ଜଣ ମାଓବାଦୀଙ୍କ ମୃତ୍ୟୁ ଘଟିଥିଲା। ପୋଲିସ ସମଗ୍ର ଅଞ୍ଚଳରେ ସର୍ଚ୍ଚ ଅପରେଶନ ଜାରି ରଖିଛି।
