ମାଲକାନଗିରି,୧ା୭(ଦୁର୍ଯ୍ୟୋଧନ ପାତ୍ର): ମାଲକାନଗିରି ଜିଲା ପୋଲିସ ଓ ବିଏସ୍ଏଫ୍ ବାହିନୀ ଦ୍ୱାରା ଚିତ୍ରକୋଣ୍ଡା ବ୍ଲକ ଜଡ଼ାମ୍ବ ଥାନା ଅଞ୍ଚଳ ଆନ୍ଧ୍ର ଓଡ଼ିଶା ସୀମାନ୍ତବର୍ତ୍ତୀ ଅଞ୍ଚଳରେ ବିପୁଳ ପରିମାଣର ମାଓବାଦୀ ସାମଗ୍ରୀ ଜବତ ହୋଇଛି। ଏ ନେଇ ମାଲକାନଗିରି ଏସ୍.ପି. ନିତିଶ୍ ବାଧ୍ୱାନୀ ସୂଚନା ଦେଇଛନ୍ତି।
ସୂଚନା ମୁତାବକ ଅପରେଶନ ଖୋଜ ଯୋଜନାରେ ଗତ ୨୯ ତାରିଖରେ ଜିଲା ପୋଲିସ ଓ ବିଏସ୍ଏଫ୍ ମିଳିତ ଭାବେ ଜଡ଼ାମ୍ବ ଥାନା ଅଞ୍ଚଳରେ କମ୍ବିଂ ଅପରେଶନ କରୁଥିଲେ। ତେବେ ଜଡ଼ାମ୍ବ ଥାନା ନିକଟବର୍ତ୍ତୀ ଅଞ୍ଚଳ ଡାବୁଗୁଡ଼ା ଓ ଅରିଙ୍ଗିପଡ଼ା ଗ୍ରାମ ଜଙ୍ଗଲ ମଧ୍ୟରେ ଗୋଟିଏ ସ୍ଥାନରେ ମାଓବାଦୀ ସାମଗ୍ରୀ ଥିବା ଜାଣି ପାରି ଉକ୍ତ ସ୍ଥଳରୁ ବିପୁଳ ପରିମାଣର ମାଓବାଦୀ ସାମଗ୍ରୀ ଜବତ କରିଛନ୍ତି। ଏହି ସାମଗ୍ରୀଗୁଡ଼ିକ ମଧ୍ୟରେ ଦୁଇଟି ଦେଶୀ ବନ୍ଧୁକ, ୧୨ଟି ବୋର ଇମୁନେସନ୍, ଗୋଟିଏ ଏସ୍.ଏଲ୍.ଆର୍ ଇମୁନେସନ୍, ତିନୋଟି ଆଇଡି, ୫୫ଟି ଜିଲୋଟିନ୍ ଷ୍ଟିକ୍, ବିଦ୍ୟୁତ୍ ତାର, ମୋବାଇଲ ଚାର୍ଜର, ମହିଳାମାନଙ୍କ ବ୍ୟବହୃତ ହେୟାର ପିନ୍, ରବର ବ୍ୟାଣ୍ଡ, ପାନିଆ, ପେନ୍, ପେନସିଲ ଇତ୍ୟାଦି ଜବତ କରାଯାଇଛି। ତେବେ ଏହି ସାମଗ୍ରୀଗୁଡ଼ିକ ଆନ୍ଧ୍ର-ଓଡ଼ିଶା ବଡର ଜୋନାଲ କମିଟି ତରଫରୁ ନିରୀହ ଜନସାଧାରଣ ଓ ପୋଲିସକୁ ଟାର୍ଗେଟ କରି ରଖା ଯାଇଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି ବୋଲି ବାଧ୍ୱାନୀ ଏକ ପ୍ରେସ୍ମିଟ୍ରେ ସୂଚନା ଦେଇଛନ୍ତି। ଏଥିସହ ସେ ଆହୁରି ମଧ୍ୟ ସୂଚନା ଦେଇଛନ୍ତି ଯେ, ‘ଅପରେଶନ ଘର ଓ୍ବାପସି’ ଯୋଜନାରେ ବିଗତ ଦିନରେ ବହୁ ମାଓବାଦୀ ଆତ୍ମସମର୍ପଣ କରିଛନ୍ତି। ଗତ୨.୬.୨୨ରେ ୪୭ ଜଣ ମିଲିସିଆ ଯନ୍ତ୍ରୀଠାରେ ଆତ୍ମସମର୍ପଣ କରିଥିବା ବେଳେ, ୧୧.୦୬.୨୨ରେ ୧୮୦ ଜଣ, ଓ ୨୨.୦୮.୨୨ରେ ଜାନବାଇଠାରେ ୫୫୦ଜଣ ଆତ୍ମସମର୍ପଣ କରିଛନ୍ତି। ସେହିପରି ୧୭.୦୯.୨୦୨୨ରେ ଅଣ୍ଡ୍ରାହାଲଠାରେ ୩୦୦ ଜଣ ମିଲିସିଆଙ୍କ ସହ ମୋଟ୍ ୭୦୦ଜଣ ମାଓବାଦୀ ସମର୍ଥକ ଆତ୍ମସମର୍ପଣ କରିଥିଲେ। ସେହିପରି ଗତ ୦୫.୧୧.୨୦୨୨ରେ ୪୧୦ଜଣ ମିଲିସିଆଙ୍କ ସହ ମୋଟ୍ ୬୫୦ ମାଓବାଦୀ ସମର୍ଥକ, ୨୦.୧୨.୨୦୨୨ରେ ୪୬୭ ମିଲିସିଆଙ୍କ ସହ ମୋଟ୍ ୯୦୭ଜଣ ମାଓବାଦୀ ସମର୍ଥକ ଆତ୍ମସମର୍ପଣ କରିଥିଲେ। ସେହିପରି ଗତ ଜାନୁୟାରୀ ୨୦୨୨ଠାରୁ ଜାନୁଆରୀ ୨୦୨୩ ମଧ୍ୟରେ ମୋଟ୍ ୨୦ଟି ମାଓବାଦୀ କ୍ୟାମ୍ପ୍ ଠାବ କରି ବିପୁଳ ପରିମାଣର ମାଓବାଦୀ ସାମଗ୍ରୀ ଯଥା ଆଇଡି, ବନ୍ଧୁକ, ବିଦ୍ୟୁତତାର, ଟିଫିନ ବୋମା, ଜିଲଟିନ୍ ଷ୍ଟିକ୍, ଡିଟୋନେଟର, ଅଫୁଟା ଗୁଳି ଇତ୍ୟାଦି ଜବତ କରିଥିବା ସୂଚନା ମିଳିଛି।
