ଭୁବନେଶ୍ୱର, ୨୦।୧୦(ବ୍ୟୁରୋ):ଜୀବନରେ ସବୁ କଥାକୁ କିପରି ସକାରାତ୍ମକ ଦୃଷ୍ଟିରେ ଦେଖାଯାଇପାରିବ ତା’ର କୌଶଳ କଥାକାର ମନୋଜ ଦାସଙ୍କଠାରୁ ଶିଖିବାକୁ ମିଳିଥିଲା। ପଣ୍ଡିଚେରୀରେ ପଢୁଥିବାବେଳେ ସେଠାରେ ତାଙ୍କ ସହ ଅଧିକାଂଶ ସମୟ ମୋର ଦେଖାହୁଏ। ସେ ମୋ ପଢ଼ାପଢ଼ି ବିଷୟରେ ପଚାରି ବୁଝନ୍ତି। ପ୍ରତ୍ୟେକ ଘଟଣାକୁ ସେ ସହଜରେ ନେଇ ଏକ ଉଚ୍ଚକୋଟୀର ଚିନ୍ତାଧାରା ସୃଷ୍ଟି କରିପାରୁଥିଲେ ବୋଲି ‘ଧରିତ୍ରୀ’ ଏବଂ ‘ଓଡ଼ିଶା ପୋଷ୍ଟ’ର ସମ୍ପାଦକ ତଥାଗତ ସତପଥୀ କହିଛନ୍ତି। ମଙ୍ଗଳବାର ଦିଲ୍ଲୀ ଓଡ଼ିଆ ଲେଖିକା ସଂସଦ (ଡଲସ୍) ପକ୍ଷରୁ ଜାତୀୟ ଅଭିଲେଖାଗାରରେ ଆୟୋଜିତ ‘ଅମୃତ ସନ୍ଧାନୀ ମନୋଜ’ ପୁସ୍ତକ ଲୋକାର୍ପଣ ଉତ୍ସବରେ ମୁଖ୍ୟ ଅତିଥି ଭାବେ ତଥାଗତ ଯୋଗଦେଇ ପୁସ୍ତକର ସଫଳତା କାମନା କରିଛନ୍ତି। ଏଥିସହ ସେ କହିଲେ ଯେ, ୧୯୫୯ରେ ବିଶ୍ୱମ୍ବର ସାମନ୍ତ ଏବଂ ଦେବେନ୍ଦ୍ର ଶତପଥୀ ପ୍ରଥମେ ପଣ୍ଡିଚେରୀ ଯାଇଥିଲେ। ସେଠାରେ ପିଲାମାନଙ୍କ ପାଠପଢ଼ା, ଯୋଗ ଶିକ୍ଷା ଆଦି ସବୁ ଦେଖିଥିଲେ। ବିଶ୍ୱମ୍ବର ମନୋଜଙ୍କ ସମ୍ପର୍କୀୟ ଥିଲେ। ଦୁଇଚାରି ଥର ପଣ୍ଡିଚେରୀ ଯିବା ପରେ ସେମାନେ ମନୋଜଙ୍କୁ ପଣ୍ଡିଚେରୀ ଯିବାକୁ କହିଥିଲେ। ସେମାନଙ୍କ କଥା ମାନି ମନୋଜ ପଣ୍ଡିଚେରୀ ଯାଇଥିଲେ ଓ ତାଙ୍କୁ ସେ ସ୍ଥାନ ଭଲ ଲାଗିଥିଲା। ସେଠାରେ ରହି ଶିକ୍ଷକ ଓ ପ୍ରଫେସର ଭାବେ ସେ କାର୍ଯ୍ୟ କରିଥିଲେ। ଏହି ସମୟରେ ମନୋଜ ବହୁ ମଣିଷ ସୃଷ୍ଟି କରିଛନ୍ତି। ମାତ୍ର ମୋର ଦୁର୍ଭାଗ୍ୟ ଯେ, ସେହି ମଣିଷ ସୃଷ୍ଟିକାରୀ ଜୀବନରେ ଏକ ଅଂଶ ହୋଇପାରିିଲି ନାହିଁ ବୋଲି ତଥାଗତ ପ୍ରକାଶ କରିଛନ୍ତି।
ଡଲସ୍ ସଂସଦର ସଭାପତି ଡା. ଅନୀତା ପଣ୍ଡାଙ୍କ ଆବାହକତ୍ୱରେ ଆୟୋଜିତ ଏହି କାର୍ଯ୍ୟକ୍ରମରେ ପଦ୍ମଶ୍ରୀ ଦେବୀ ପ୍ରସନ୍ନ ପଟ୍ଟନାୟକ ସଭାପତିତ୍ୱ କରିଥିଲେ। ମୁଖ୍ୟବକ୍ତା ଭାବେ ବିଜୟ ନାୟକ ଯୋଗଦେଇ କହିଲେ, ଭାରତ ବର୍ଷର ପୁରୁଣା ପରମ୍ପରା ହେଉଛି କାହାଣୀ ପରମ୍ପରା। ମନୋଜ ଦାସ ନିଜ କାହାଣୀ ମାଧ୍ୟମରେ ପ୍ରାଚୀନ କଥା କହୁଥିଲେ। ତାଙ୍କ କାହାଣୀଗୁଡ଼ିକରେ ଆଧୁନିକ ମଣିଷର ଯାତନା, ଯନ୍ତ୍ରଣା, ମନସ୍ତତ୍ତ୍ୱ, ପ୍ରାପ୍ତି, ଅପ୍ରାପ୍ତିର କଥା, ରାଜନୈତିକ ଶଠତା ଆଦି ମିଳେ। ଓଡ଼ିଆ ଗଳ୍ପକୁ ସେ ବିଶ୍ୱଜନୀନ କରିଛନ୍ତି। ସମ୍ମାନିତ ଅତିଥି ଭାବେ ଓଡ଼ିଶା ସାହିତ୍ୟ ଏକାଡେମୀର ସଭାପତି ଡ. ହୃଷୀକେଶ ମଲ୍ଲିକ କହିଲେ, ହିମାଳୟ ପାଦଦେଶରେ ଠିଆହେଲେ ହିମାଳୟ ଅଦୃଷ୍ଟ, ଦୂରରୁ ଚାହିଁଲେ ଅସ୍ପଷ୍ଟ। ଏହିପରି ଚୈତ୍ୟଲୋକର ଏକ ଉଚ୍ଚାଙ୍ଗ ପ୍ରତୀୟମାନ ହେଉଛନ୍ତି ମନୋଜ। ଏହି ଅବସରରେ ଅତିଥିମାନେ ‘ଅମୃତ ସନ୍ଧାନୀ ମନୋଜ’ ପୁସ୍ତକ ଲୋକାର୍ପଣ କରିଥିଲେ। ରାଜ୍ୟପାଳ ଓ ମୁଖ୍ୟମନ୍ତ୍ରୀଙ୍କ ଦ୍ୱାରା ପଠାଯାଇଥିବା ବାର୍ତ୍ତାକୁ ଡା. ପଣ୍ଡା ପାଠ କରିଥିବାବେଳେ ମାନସ ରଞ୍ଜନ ମହାପାତ୍ର ମଞ୍ଚ ପରିଚାଳନା କରିଥିଲେ।
