ମହାକାଳପଡ଼ା,୯ା୫(ଡି .ଏନ୍ .ଏ.): କେନ୍ଦ୍ରାପଡ଼ା ଜିଲା ମହାକାଳପଡା ବ୍ଲକ ରାମନଗର ଗ୍ରାମ ଉତ୍ତରପଡ଼ାରେ ମଞ୍ଜିତ୍ ମଣ୍ଡଳ (୧୦)ଙ୍କ ଘର। ସେ ପେଟକୁ ଦାନା ସଂଗ୍ରହ ପାଇଁ ସଂଘର୍ଶ କରୁଥିବା ଜଣାପଡିଛି। ଯେଉଁ ସମୟରେ ମା’ର ପଣତ କାନିରେ ମୁଣ୍ଡ ଗୁଞ୍ଜି ଭବିଷ୍ୟତର ସୁନେଲି ସ୍ବପ୍ନ ଦେଖିବା କଥା ସେହି କଅଁଳ ବୟସରେ ଏବେ ଅଳିଆଗଦାରୁ ଜରି ସାଉଁଟୁଛନ୍ତି। ମଞ୍ଜିତ୍ଙ୍କ ସାଥୀମାନେ ବିଦ୍ୟାଳୟକୁ ଯାଇ ପାଠ ପଢୁଥିବା ବେଳେ ସେ ଭାଗ୍ୟକୁ ଆଦରି ପେଟ ଚାଖଣ୍ଡକ ପାଇଁ ଅବିରତ ସଂଗ୍ରାମ କରୁଛନ୍ତି । ରାତି ପାହି ସକାଳ ହେଲେ ମଞ୍ଜିତ୍ ଏକ ପ୍ଲାଷ୍ଟିକ ଅଖା କାନ୍ଧରେ ପକାଇ ବାହାରିପଡନ୍ତି ବଜାରର ଗଳିକନ୍ଦିକୁ। ବାହାରେ ପଡିଥିବା ପ୍ଲାଷ୍ଟିକ ସାମଗ୍ରୀଗୁଡିକୁ ଆବର୍ଜନାରୁ ବିନା ସଂକୋଚରେ ସଂଗ୍ରହ କରିଥାନ୍ତି। ଦିନରେ ସଂଗୃହୀତ ପ୍ଲାଷ୍ଟିକ ସାମଗ୍ରୀକୁ ନିକଟ ରାମନଗର ବଜାରରେ ଥିବା କବାଡିଆ ଦୋକାନରେ ବିକି ଦୈନିକ ୫୦ରୁ ୭୦ ଟଙ୍କା ପାଇଥାନ୍ତି। ସେଥିରେ ସକାଳ ଜଳଖିଆ ଖାଇ ଅବଶିଷ୍ଟ ପଇସାକୁ ଆଶ୍ରୟ ନେଇଥିବା ନିଜ ଆଈ ମା’ ପାଖରେ ଜମା ଦିଅନ୍ତି। ମଞ୍ଜିତ୍ଙ୍କ ପରିବାର କହିଲେ, ବାପା ପ୍ରଶାନ୍ତ, ମା’ ଉଷା ଓ ଭଉଣୀ ରଶ୍ମିତା। ଆର୍ଥିକ ଅନଟନ ଯୋଗୁ ମଞ୍ଜିତ୍ଙ୍କ ମା’ ଉଷା ପରିବାର ଛାଡ଼ି କେଉଁ ଆଡେ ପଳାଇ ଯିବା ପରେ ବାପା ପ୍ରଶାନ୍ତ ପିଲାମାନଙ୍କ ଭବିଷ୍ୟତକୁ ଦୃଷ୍ଟିରେ ରଖି ବାଧ୍ୟ ହୋଇ ଦ୍ୱିତୀୟ ବିବାହ କଲେ। କିନ୍ତୁ ଭାଗ୍ୟର ବିଡମ୍ବନା ବିବାହର କିଛିଦିନ ପରେ ମାତୃ ସ୍ନେହରୁ ଏହି ଦୁଇ ଭାଇ ଭଉଣୀ ବଞ୍ଚତ୍ତ ହେଲେ। ମଞ୍ଜିତ୍ଙ୍କ ଭଉଣୀ ରଶ୍ମିତା (୧୫), ଭୁବନେଶ୍ୱରର ଜଣେ ବ୍ୟକ୍ତିଙ୍କ ଘରେ ମାସିକ ଦୁଇ ହଜାର ଟଙ୍କାରେ ବାସୀ ପାଇଟି କରୁଛନ୍ତି। ଅନ୍ୟପକ୍ଷେ ମଞ୍ଜିତ ନିଜ ମାମୁଘରେ ଆଈମା’ ବିଦୁଲତାଙ୍କ ନିକଟରେ ରହି ନିଜ ଜୀବନ ଓ ଜୀବିକା ପାଇଁ ସଂଗ୍ରାମ କରୁଛନ୍ତି। କେନ୍ଦ୍ର ଓ ରାଜ୍ୟ ସରକାର ଅନୁସୂଚିତ ଜାତିଙ୍କ ପାଇଁ ଶିକ୍ଷାକ୍ଷେତ୍ରରେ ଅଗ୍ରାଧିକାର ଦେଉଛନ୍ତି। ମଞ୍ଜିତ୍ଙ୍କ ନିକଟରେ ଏହି ସରକାରୀ ଯୋଜନା ଅପହଞ୍ଚ ପାଲଟିଛି। ମଞ୍ଜିତ୍ ପଞ୍ଚମ ଶ୍ରେଣୀରେ ପଢୁଥିବା ବେଳେ ମା’ ଆପରପାରିକୁ ଚାଲିଗଲେ। ପରେ ମଞ୍ଜିତ୍ଙ୍କ ପାଠ ପଢ଼ାରେ ଡୋରି ବନ୍ଧା ହୋଇଛି। ଯେଉଁ ବୟସରେ ମଞ୍ଜିତ୍ କାନ୍ଧରେ ସ୍କୁଲ ବ୍ୟାଗ ପକାଇ ବିଦ୍ୟାଳୟ ଯିବା କଥା କିନ୍ତୁ ତାଙ୍କ କାନ୍ଧରେ ପ୍ଲାଷ୍ଟିକ ଭର୍ତ୍ତି ଅଖା। ସରକାର ଡ୍ରପ୍ ଆଉଟ୍ ଛାତ୍ରୀଛାତ୍ରମାନଙ୍କୁ ସମାଜର ମୁଖ୍ୟ ସ୍ରୋତରେ ସାମିଲ କରିବାକୁ ବିଦ୍ୟାଳୟଗୁଡ଼ିକରେ ମାଗଣାରେ ନାମ ଲେଖା, ପୋଷାକ, ପୁସ୍ତକ, ଖାଦ୍ୟ ଆଦି ବ୍ୟବସ୍ଥା କରିଛନ୍ତି। ମଞ୍ଜିତ୍ଙ୍କ ପାଇଁ ଏହି ଯୋଜନା ସାତସପନ ପାଲଟିଛି। ମଞ୍ଜିତ୍ଙ୍କ ଆଈ ବିଦୁଲତାଙ୍କ କହିବା କଥା ପର ଦୋକାନରେ ଝାଡୁ ମାରି ଚଳୁଛି। ଆଉ କେତେଦିନ ନାତିକୁ ପାଖରେ ରଖିବି। ସରକାରୀ, ବେସରକାରୀ ଅନୁଷ୍ଠାନ ମଞ୍ଜିତଙ୍କ ପଢା ଓ ଖାଇବା ଖର୍ଚ୍ଚ ଯୋଗାଇ ଦେଲେ ସେ ପଢି ପାରନ୍ତା। ଆଉ ଜରି ଗୋଟାଇବାରୁ ନିବୃତ୍ତ ରୁହନ୍ତା। ଏ ସମ୍ପର୍କରେ ମଞ୍ଜିତ୍ଙ୍କୁ ପଚାରିବାରେ ପଢ଼ିବା ପାଇଁ ଇଚ୍ଛା ଅଛି। ସୁବିଧା ସୁଯୋଗ ଯୋଗାଇ ଦେଲେ ନିଶ୍ଚୟ ପଢିବି ବୋଲି ସେ କହିଛନ୍ତି।
