ନୂଆଦିଲ୍ଲୀ,୨୧।୧୦: ଫେସବୁକ୍ରେ ଲାଇଭ୍ ଷ୍ଟ୍ରିମିଂ କରି ଆତ୍ମହତ୍ୟା ଉଦ୍ୟମ କରିଥିବା ଜଣେ ୪୩ ବର୍ଷୀୟ ଯୁବକ ଅଳ୍ପକେ ବର୍ତ୍ତି ଯାଇଛନ୍ତି। ସୋସିଆଲ ମିଡିଆ ପକ୍ଷରୁ ଇ-ମେଲ ପାଇବା ପରେ ତୁରନ୍ତ ପୋଲିସର କାର୍ଯ୍ୟାନୁଷ୍ଠାନ ଯୋଗୁ ଏହା ସମ୍ଭବ ହୋଇପାରିଛି ବୋଲି ଦିଲ୍ଲୀ ପୋଲିସ ପକ୍ଷରୁ କୁହାଯାଇଛି।
ଡିସିପି କେ ପି ଏସ୍ ମଲହୋତ୍ରା କହିଛନ୍ତି, ଜଣେ ବ୍ୟକ୍ତି ଲାଇଭ୍ ଭିଡିଓ ଜରିଆରେ ଅପରାହ୍ନ ୧ଟା ୩୦ରେ ଆତ୍ମହତ୍ୟା ଉଦ୍ୟମ କରିଥିଲେ। ଏ ନେଇ ଅପରାହ୍ନ ୨ଟାରେ ଫେସବୁକରୁ ଏକ ଜରୁରୀକାଳିନ ଇ-ମେଲ ଆସିଥିଲା। ଏହାପରେ ତଦନ୍ତ ଆରମ୍ଭ କରିଥିଲା ଦିଲ୍ଲୀ ପୋଲିସର ସାଇବର ସେଲ। ପ୍ରଥମେ ଆକାଉଣ୍ଟ ସହ ଜଡ଼ିତ କଣ୍ଟାକ୍ଟ ନମ୍ବର ମିଳିବା ପରେ ନମ୍ବରକୁ ଟ୍ରେସ କରିବାରୁ ଆତ୍ମହତ୍ୟା ଉଦ୍ୟମ କରିଥିବା ଯୁବକଙ୍କ ଘର ଦିଲ୍ଲୀର ରାଜୋରି ଗାର୍ଡେନ ଅଞ୍ଚଳରେ ବୋଲି ଜଣାପଡ଼ିଥିଲା।
ଏହି ସୂଚନା ଆମେ ରାଜୋରି ଗାର୍ଡେନ ପୋଲିସ ସହ ଶେୟାର କରିଥିଲୁ। ସେମାନେ ଅପରାହ୍ନ ୩ଟା ୧୫ରେ ଉକ୍ତ ଯୁବକଙ୍କ ବାସଭବନରେ ପହଞ୍ଚିଥିଲେ। ସେତେବେଳେ ଉକ୍ତ ବ୍ୟକ୍ତି ଚେତା ହରାଇ ସାରିଥିଲେ।
ତଦନ୍ତରୁ ଜଣାପଡ଼ିଲା ଯେ, ଥାଇରଏଡ୍ ରୋଗର ଚିକିତ୍ସାରେ ବ୍ୟବହୃତ ହେଉଥିବା ସିରପର ମାତ୍ରାଧିକ ସେବନ କରିଥିଲେ। ୩ ବର୍ଷ ତଳେ ତାଙ୍କ ଚାକିରି ଚାଲିଯିବାରୁ ଘର ଛାଡ଼ି ପଳାଇଥିଲେ ସ୍ତ୍ରୀ। ବିଭିନ୍ନ ରୋଗରେ ପୀଡ଼ିତ ଥିବାରୁ ସେ ମାନସିକ ଚାପରେ ରହୁଥିଲେ। ଘଟଣା ଦିନ ସକାଳେ ପତ୍ନୀଙ୍କ ସହ ଫୋନରେ କଥା ହୋଇ ଘରକୁ ଫେରିବାକୁ କହିଥିଲେ। କିନ୍ତୁ ସେ ମନା କରି ଦେଇଥିଲେ।
