ନୂଆଦିଲ୍ଲୀ, ୨୩।୬: ମହାରାଷ୍ଟ୍ରର ସାଙ୍ଗଲି ଜିଲାରେ ଏକ ହୃଦୟବିଦାରକ ଘଟଣା ଘଟିଛି। ନୀଟ (ନ୍ୟାସନାଲ ଏଲିଜିବିଲିଟି କମ୍ ଏଂଟ୍ରାନ୍ସ ଟେଷ୍ଟ) ମକ୍ ଟେଷ୍ଟରେ କମ୍ ମାର୍କ ରଖିଥିବାରୁ ଜଣେ ୧୭ ବର୍ଷୀୟା ଝିଅକୁ ତାଙ୍କ ବାପା ନିର୍ମମ ଭାବେ ପିଟି ପିଟି ହତ୍ୟା କରିଛନ୍ତି। ଏହି ଅଭିଯୁକ୍ତ ବାପା ଜଣେ ସ୍କୁଲ ଶିକ୍ଷକ ତଥା ପ୍ରିନ୍ସିପାଲ ଥିବା ଜଣାପଡ଼ିଛି।
ଅଟପାଡି ତାଲୁକାର ନେଲକାରଞ୍ଜୀ ଗାଁରେ ଶନିବାର ରାତିରେ ଏହି ଘଟଣା ଘଟିଥିଲା। ପୁଲିସ ସୂଚନା ଅନୁଯାୟୀ, ଅଭିଯୁକ୍ତ ଧୋଣ୍ଡିରାମ ଭୋଂସଲେ (୪୫) ତାଙ୍କ ଝିଅ ସାଧନା ଭୋଂସଲେଙ୍କ ନୀଟ ମକ୍ ଟେଷ୍ଟରେ କମ୍ ମାର୍କ ଆସିବାକୁ ନେଇ ଅତ୍ୟନ୍ତ ରାଗି ଯାଇଥିଲେ। ଏହାକୁ ନେଇ ବାପା-ଝିଅଙ୍କ ମଧ୍ୟରେ ଝଗଡା ହୋଇଥିଲା। ରାଗରେ ଧୋଣ୍ଡିରାମ ଗୋଟିଏ ପଥର ଗ୍ରାଇଣ୍ଡରର କାଠ ହ୍ୟାଣ୍ଡେଲ (କାଠ ଡଣ୍ଡା) ଧରି ସାଧନାଙ୍କୁ ତାଙ୍କ ସ୍ତ୍ରୀ ଓ ପୁଅଙ୍କ ସାମ୍ନାରେ ନିର୍ମମ ଭାବେ ଆକ୍ରମଣ କରିଥିଲେ।
ସାଧନା ଦ୍ୱାଦଶ ଶ୍ରେଣୀରେ ପଢ଼ୁଥିବା ଜଣେ ଛାତ୍ରୀ ଥିଲେ ଏବଂ ଡାକ୍ତର ହେବାର ସ୍ୱପ୍ନ ଦେଖୁଥିଲେ। ସେ ଦଶମ ଶ୍ରେଣୀ ବୋର୍ଡ ପରୀକ୍ଷାରେ ୯୨.୬୦ ପ୍ରତିଶତ ମାର୍କ ରଖି ଜଣେ ଉଜ୍ଜ୍ୱଳ ଛାତ୍ରୀ ଥିଲେ। ନୀଟ ପରୀକ୍ଷା ପାଇଁ ପ୍ରସ୍ତୁତି ନେଉଥିବା ସାଧନା ମକ୍ ଟେଷ୍ଟରେ କମ୍ ମାର୍କ ଆଣିଥିଲେ, ଯାହା ତାଙ୍କ ବାପାଙ୍କୁ କ୍ରୋଧିତ କରିଥିଲା। ରିପୋର୍ଟ ଅନୁଯାୟୀ, ଧୋଣ୍ଡିରାମ ତାଙ୍କୁ ଗାଳିଗୁଲଜ କରି କହିଥିଲେ, “ଏତେ କମ୍ ମାର୍କ କିପରି ଆଣିଲୁ? ଏମିତି ହେଲେ ତୁ ଡାକ୍ତର ହେବୁ କିପରି?” ଏହାର ଜବାବରେ ସାଧନା କହିଥିଲେ, “ଆପଣ ମଧ୍ୟ କମ୍ ମାର୍କ ଆଣୁଥିଲେ। ଆପଣ କ’ଣ କଲେକ୍ଟର ହେଲେ? ଶେଷରେ ତ ଶିକ୍ଷକ ହେଲେ!” ଏହି ଜବାବ ଧୋଣ୍ଡିରାମଙ୍କୁ ଆହୁରି ରାଗିଗଲା ଏବଂ ସେ ଝିଅକୁ ଲଗାତାର ପିଟିଥିଲେ।
ମାଡ଼ ଖାଇ ସାଧନା ଗୁରୁତର ଆହତ ହୋଇଥିଲେ। ତାଙ୍କ ମୁଣ୍ଡରେ ଗଭୀର ଆଘାତ ଲାଗିଥିଲା। ତେବେ ତାଙ୍କ ବାପା ତୁରନ୍ତ ତାଙ୍କୁ ଡାକ୍ତରଖାନା ନେବା ପରିବର୍ତ୍ତେ ନିଜ ସ୍କୁଲରେ ଆନ୍ତର୍ଜାତୀୟ ଯୋଗ ଦିବସ କାର୍ଯ୍ୟକ୍ରମରେ ଯୋଗ ଦେବାକୁ ଚାଲିଯାଇଥିଲେ। ଘରକୁ ଫେରି ସାଧନାଙ୍କୁ ଅଚେତ ଅବସ୍ଥାରେ ଦେଖି ତାଙ୍କୁ ସାଙ୍ଗଲିର ଉଷାକାଳ ହସ୍ପିଟାଲକୁ ନିଆଯାଇଥିଲା, କିନ୍ତୁ ଚିକିତ୍ସା ପୂର୍ବରୁ ତାଙ୍କର ମୃତ୍ୟୁ ହୋଇଥିଲା। ପୋଷ୍ଟମର୍ଟମ ରିପୋର୍ଟରୁ ଜଣାପଡ଼ିଛି ଯେ, ସାଧନାଙ୍କ ମୃତ୍ୟୁ ଏକାଧିକ ଆଘାତ ଯୋଗୁଁ ହୋଇଛି।
ସାଧନାଙ୍କ ମାଆ ପ୍ରୀତି ଭୋଂସଲେ, ଯିଏ ଜଣେ ପୂର୍ବତନ ସରପଞ୍ଚ ଅଟନ୍ତି, ତାଙ୍କ ସ୍ୱାମୀଙ୍କ ବିରୋଧରେ ଜୁନ ୨୨ରେ ଅଟପାଡି ଥାନାରେ ଏକ ଅଭିଯୋଗ ଦାୟର କରିଥିଲେ। ଏହା ଆଧାରରେ ପୋଲିସ ଧୋଣ୍ଡିରାମଙ୍କୁ ଗିରଫ କରିଛି ଏବଂ ଜୁନ ୨୪ ପର୍ଯ୍ୟନ୍ତ ପୋଲିସ ହେପାଜତରେ ରଖିଛି। ଅଭିଯୁକ୍ତ ନିଜର ଅପରାଧ ସ୍ୱୀକାର କରିଥିବା ଜଣାପଡ଼ିଛି।
ଅଟପାଡି ଥାନାର ସିନିୟର ଇନ୍ସପେକ୍ଟର ବିନୟ ବାହିରେ କହିଛନ୍ତି, “ଘଟଣାଟି ଜୁନ ୨୦ରେ ଆରମ୍ଭ ହୋଇଥିଲା। ସାଧନାଙ୍କୁ ପିଟିବା ପରେ ତାଙ୍କ ଅବସ୍ଥା ଗୁରୁତର ହୋଇଥିଲା। ତାଙ୍କ ମାଆ ତାଙ୍କୁ ବଞ୍ଚାଇବାକୁ ଚେଷ୍ଟା କରିଥିଲେ, କିନ୍ତୁ ପୁଣି ଥରେ ପିଟିବା ଯୋଗୁଁ ସେ ଗୁରୁତର ଆହତ ହୋଇଥିଲେ।”
