କୋଲକାତା,୧୬ା୫: ୨୦୧୧ରୁ ଜାରି ହୋଇଥିବା ସମସ୍ତ ୧.୬୯ କୋଟି SC-ST-OBC ବର୍ଗ ପ୍ରମାଣପତ୍ରକୁ ପୁନଃ ଯାଞ୍ଚ କରିବାକୁ ପଶ୍ଚିମବଙ୍ଗର ଶୁଭେନ୍ଦୁ ସରକାର ଜିଲା ମାଜିଷ୍ଟ୍ରେଟ୍ମାନଙ୍କୁ ନିର୍ଦ୍ଦେଶ ଦେଇଛନ୍ତି। କାରଣ ଗତ କିଛି ବର୍ଷ ମଧ୍ୟରେ ଡକ୍ୟୁମେଣ୍ଟଗୁଡ଼ିକର ପ୍ରାମାଣିକତା ଉପରେ ପ୍ରଶ୍ନ ଉଠିଛି।
ଗୁରୁବାର ପଛୁଆବର୍ଗ କଲ୍ୟାଣ ବିଭାଗ (BCW) ସଚିବଙ୍କ ଦ୍ୱାରା ଜାରି ଏକ ଆଦେଶରେ କୁହାଯାଇଛି, ଆପଣମାନେ ଜାଣନ୍ତି ଯେ,୨୦୧୧ରୁ ପ୍ରାୟ ୧.୬୯ କୋଟି ଜାତି ପ୍ରମାଣପତ୍ର ପ୍ରଦାନ କରାଯାଇଛି। ଏବେ ଦେଖାଯାଇଛି ୨୦୧୧ରୁ ଜାରି ହୋଇଥିବା କିଛି ଜାତି ପ୍ରମାଣପତ୍ରର ପ୍ରାମାଣିକତା ଏବଂ ସତ୍ୟତା ଉପରେ ବିଭିନ୍ନ ପକ୍ଷ ପ୍ରଶ୍ନ ଉଠାଇଛନ୍ତି।
ଆଦେଶରେ ଆହୁରି କୁହାଯାଇଛି ଯେ, ସମସ୍ତ ଉପ-ବିଭାଗୀୟ ଅଧିକାରୀମାନେ ସମସ୍ତ ଜାତି ପ୍ରମାଣପତ୍ର ପୁନଃ ଯାଞ୍ଚ କରିବାକୁ ପ୍ରମାଣପତ୍ର ପ୍ରଦାନକାରୀ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେବା ଉଚିତ।
ରିପୋର୍ଟ ଅନୁଯାୟୀ, ରାଜ୍ୟ ପ୍ରଶାସନର ସୂତ୍ର କହିଛନ୍ତି ଗତ କିଛି ବର୍ଷ ଧରି ଅଭିଯୋଗ ଆସିଛି ଯେ, ପୂର୍ବତନ ତୃଣମୂଳ କଂଗ୍ରେସ ସରକାର ଅଯୋଗ୍ୟ ଲୋକଙ୍କୁ ସେମାନଙ୍କର ପୃଷ୍ଠଭୂମି ଯାଞ୍ଚ ନ କରି ଅନୁସୂଚିତ ଜାତି (SC), ଅନୁସୂଚିତ ଜନଜାତି (ST) ଏବଂ ଅନ୍ୟାନ୍ୟ ପଛୁଆ ବର୍ଗ (OBC) ପ୍ରମାଣପତ୍ର ପ୍ରଦାନ କରିଥିଲେ। ୨୦୨୧ ବିଧାନସଭା ନିର୍ବାଚନର ଠିକ ପୂର୍ବରୁ ମମତା ସରକାର ନିଜର ଦଖଲକୁ ମଜବୁତ କରିବା ପାଇଁ ଅଯୋଗ୍ୟ ଲୋକଙ୍କୁ ଜାତି ପ୍ରମାଣପତ୍ର ପ୍ରଦାନ କରିଥିଲେ। ୨୦୧୯ ଲୋକ ସଭା ନିର୍ବାଚନରେ ଭାଜପା ଅନେକ ଆସନ ଜିତିଥିଲା। ୨୦୨୦ରେ ସରକାର ଏହାର ‘ଦୁଆରେ ସରକାର’ କାର୍ଯ୍ୟକ୍ରମ ଆରମ୍ଭ କରିବା ପରେ ଏହି ଧାରା ଆରମ୍ଭ ହୋଇଥିଲା।
‘ଦୁଆରେ ସରକାର’ ଶିବିରରେ ପ୍ରାପ୍ତ ଆବେଦନଗୁଡ଼ିକୁ ଆଧାର କରି ପ୍ରାୟ ୪୭.୮ ଲକ୍ଷ ପ୍ରମାଣପତ୍ର ପ୍ରଦାନ କରାଯାଇଥିଲା।ଯେଉଁଥିରେ ୩୨.୫୧ ଲକ୍ଷ ଅନୁସୂଚିତ ଜାତି ପ୍ରମାଣପତ୍ର, ୬.୬୫ ଲକ୍ଷ ଅନୁସୂଚିତ ଜନଜାତି ପ୍ରମାଣପତ୍ର ଏବଂ ୮.୬୪ ଲକ୍ଷ ଅନ୍ୟାନ୍ୟ ପଛୁଆ ବର୍ଗ ପ୍ରମାଣପତ୍ର ଅନ୍ତର୍ଭୁକ୍ତ।