ନୂଆଦିଲ୍ଲୀ, ୮ା୧୧:ଆଗକୁ ଆସୁଛି ପଶ୍ଚିମବଙ୍ଗ ପଞ୍ଚାୟତ ନିର୍ବାଚନ। ଏହାକୁ ଦୃଷ୍ଟିରେ ରଖି ମମତା ବାନାର୍ଜୀ ସରକାର ନକଲି ଚାକିରି ନଁାରେ ଲୋକଙ୍କୁ ବୋକା ବନାଇବା ଆରମ୍ଭ କରିଦେଇଛନ୍ତି। ରାଜ୍ୟ ସରକାର ନିଯୁକ୍ତି ସମ୍ପର୍କିତ ଭ୍ରମାତ୍ମକ ତଥ୍ୟ ଦେଉଛନ୍ତି। ଏହାର ଉପଯୁକ୍ତ ତଦନ୍ତ କରାଇବା ଲାଗି ପଶ୍ଚିମବଙ୍ଗ ବିରୋଧୀ ଦଳ ନେତା ଶୁଭେନ୍ଦୁ ଅଧିକାରୀ ସୋମବାର କେନ୍ଦ୍ର ଗ୍ରାମ୍ୟ ଉନ୍ନୟନ ଏବଂ ପଞ୍ଚାୟତିରାଜ ମନ୍ତ୍ରୀ ଗିରିରାଜ ସିଂଙ୍କୁ ପତ୍ର ଲେଖିଛନ୍ତି।
ଶୁଭେନ୍ଦୁ ତାଙ୍କ ପତ୍ରରେ ମମତା ସରକାରଙ୍କ ନାମରେ ସାଂଘାତିକ ଅଭିଯୋଗ ଆଣିଛନ୍ତି। ସେ ଉଲ୍ଲେଖ କରିଛନ୍ତି ଯେ, ପଶ୍ଚିମବଙ୍ଗ ସରକାର ଏବେ ନକଲି ନିଯୁକ୍ତି ପ୍ରସ୍ତୁତି ସହ ଭ୍ରମାତ୍ମକ ତଥ୍ୟ ପ୍ରସ୍ତୁତିରେ ଲାଗିପଡ଼ିଛନ୍ତି। ବିଶେଷଭାବେ ଗ୍ରାମାଞ୍ଚଳରେ ନକଲି ଚାକିରି ସୃଷ୍ଟି କରାଇବା ସହ ଜବ୍କାର୍ଡର ଦୁରୂପଯୋଗ କରି କେନ୍ଦ୍ରକୁ ଭ୍ରମାତ୍ମକ ତଥ୍ୟ ଦେଇ ଅନୁଦାନ ପାଇଁ ଦାବି କରୁଛନ୍ତି। ଆଗକୁ ପଞ୍ଚାୟତ ନିର୍ବାଚନ ଆସୁଥିବାରୁ ମୁଖ୍ୟମନ୍ତୀ ମମତା ସରକାରୀ କଳକୁ ଏଭଳି ବେଆଇନ କାର୍ଯ୍ୟରେ ଲଗାଇ ଦେଇଛନ୍ତି। ତେଣୁ ଏହି ଘଟଣାରେ ସିବିଆଇ କିମ୍ବା ଅନ୍ୟ କୌଣସି କେନ୍ଦ୍ରୀୟ ସଂସ୍ଥା ଦ୍ୱାରା ଏହାର ତଦନ୍ତ କରାଇବାକୁ କେନ୍ଦ୍ରମନ୍ତ୍ରୀ ଗିରିରାଜଙ୍କୁ ଲେଖିଥିବା ପତ୍ରରେ ଶୁଭେନ୍ଦୁ ଅନୁରୋଧ କରିଛନ୍ତି।
