କୋଲକାତା,୧୪।୧୧: ବିହାର ବିଧାନସଭା ନିର୍ବାଚନରେ ଏନ୍ଡିଏ ମେଣ୍ଟର ବିଜୟ ସୁନିଶ୍ଚିତ ହୋଇଥିବା ବେଳେ ପଶ୍ଚିମବଙ୍ଗର ମମତା ଶିବିରର ଚିନ୍ତା ବଢ଼ିଥିବା ଚର୍ଚ୍ଚା ଜୋର ଧରିଛି। ଏମିତିରେ ତୃଣମୂଳ କଂଗ୍ରେସ(ଟିଏମ୍ସି) ଶୁକ୍ରବାର ବିହାର ଫଳାଫଳ ନେଇ ମତ ରଖିଛି। ଦଳ କହିଛି ଯେ ବିହାର ନିର୍ବାଚନ ଫଳାଫଳର କୌଣସି ପ୍ରଭାବ ପଶ୍ଚିମବଙ୍ଗରେ ଆସନ୍ତା ବର୍ଷ ହେବାକୁ ଥିବା ବିଧାନସଭା ନିର୍ବାଚନ ଉପରେ ପଡ଼ିବ ନାହିଁ।
ତୃଣମୂଳ କଂଗ୍ରେସର ମୁଖପାତ୍ର କୁଣାଲ ଘୋଷ ‘ଏକ୍ସ’ରେ ଏକ ପୋଷ୍ଟରେ ଦାବି କରିଛନ୍ତି ଯେ, ଆସନ୍ତା ବର୍ଷ ନିର୍ବାଚନ ପରେ ମମତା ବାନାର୍ଜୀଙ୍କ ନେତୃତ୍ୱାଧୀନ ଦଳ ୨୫୦ରୁ ଅଧିକ ଆସନ ଜିତି ଚତୁର୍ଥ ଥର ପାଇଁ ସତ୍ତାକୁ ଆସିବ। ବିହାର ନିର୍ବାଚନ ଫଳାଫଳ ପୁଣି ପ୍ରମାଣ କରିଛି ଯେ ଭାଜପା ବିରୋଧରେ କଂଗ୍ରେସ ବିଫଳ ହୋଇଛି।
ରାଜ୍ୟ ସଭାର ପୂର୍ବତନ ସଦସ୍ୟ ଥିବା ଘୋଷ କହିଛନ୍ତି, ”ଏହା ବିହାରର ସମୀକରଣ। ଏହାର ପଶ୍ଚିମବଙ୍ଗ ସହ କୌଣସି ସମ୍ପର୍କ ନାହିଁ। ଏହାର କୌଣସି ପ୍ରଭାବ ପଡ଼ିବ ନାହିଁ। ପଶ୍ଚିମବଙ୍ଗରେ ବିକାଶ, ଏକତା, ସଦ୍ଭାବ, ଅଧିକାର ଏବଂ ସ୍ବାଭିମାନ ହିଁ ନିର୍ଣ୍ଣାୟକ କାରକ। ୨୫୦ରୁ ଅଧିକ ଆସନ ସହିତ ମମତା ବାନାର୍ଜୀ ପୁଣି ଥରେ ମୁଖ୍ୟମନ୍ତ୍ରୀ ହେବେ।“
ସେ ଆହୁରି ମଧ୍ୟ କହିଛନ୍ତି ଯେ, ବିହାରରେ ଭାଜପା-ଜେଡି(ୟୁ) ସମ୍ପର୍କ କେଉଁ ଦିଗରେ ଯାଉଛି ତାହାକୁ ନେଇ ଉତ୍ସୁକତା ରହିବ। ଏହାଛଡ଼ା ଭାଜପା ଏଜେନ୍ସିଂ ଏବଂ କେନ୍ଦ୍ରୀୟ ଶକ୍ତିର ଦୁରୁପଯୋଗ ପଶ୍ଚିମବଙ୍ଗ ନିର୍ବାଚନ ସମୟରେ କରିବ। ଏହା ବିରୋଧରେ ତୃଣମୂଳର ଆନ୍ଦୋଳନ ଜାରି ରହିବ। ପଶ୍ଚିମବଙ୍ଗ ଜନସାଧାରଣଙ୍କ ନିକଟତର ହୋଇ ତୃଣମୂଳ ବିଜେପିର ସବୁ ଷଡ଼ଯନ୍ତ୍ରକୁ ନଷ୍ଟ କରିଦେବ ବୋଲି ସେ କହିଛନ୍ତି।
