କୋଲକାତା,୨୯।୫: ପଶ୍ଚିମବଙ୍ଗ ଗସ୍ତ ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଟିଏମସି ସରକାରଙ୍କୁ ଟାର୍ଗେଟ କରିଛନ୍ତି। ଏହା ପରେ ରାଜ୍ୟ ମୁଖ୍ୟମନ୍ତ୍ରୀ ମମତା ବାନାର୍ଜୀ ତାଙ୍କ ପ୍ରତିକ୍ରିୟା ଦେଇଛନ୍ତି। ସେ କହିଛନ୍ତି, ବଙ୍ଗଳା ବିରୋଧରେ ବୟାନବାଜି ଠିକ ନୁହେଁ। ପ୍ରଧାନମନ୍ତ୍ରୀ ମୋଦି ଆଜି ଯାହା କହିଛନ୍ତି ତାହା ଶୁଣି ଆମେ କେବଳ ଆଶ୍ଚର୍ଯ୍ୟ ହୋଇନାହୁଁ, ବରଂ ଏହା ଶୁଣିବା ଦୁର୍ଭାଗ୍ୟଜନକ।
ମମତା କହିଛନ୍ତି, ସମ୍ପୂର୍ଣ୍ଣ ବିରୋଧୀ ଦଳ ବିଶ୍ୱରେ ଦେଶକୁ ପ୍ରତିନିଧିତ୍ୱ କରୁଛନ୍ତି, ସେମାନେ ଦେଶର ଜାତୀୟ ସ୍ବାର୍ଥକୁ ସୁରକ୍ଷା ଦେବା ପାଇଁ ଏକ ସାହସିକ ପଦକ୍ଷେପ ନେଇଛନ୍ତି, କିନ୍ତୁ ପ୍ରଧାନମନ୍ତ୍ରୀ ମୋଦି ଏବଂ ତାଙ୍କ ନେତାମାନେ କହିବାର ସମୟ ଆସିଛି ଯେ ସେମାନେ ମଧ୍ୟ ଅପରେଶନ ସିନ୍ଦୂର ପରି ଅପରେଶନ ବେଙ୍ଗଲ କରିବେ। ଯଦି ସେମାନଙ୍କ ପାଖରେ ଆସନ୍ତାକାଲି ନିର୍ବାଚନ ଲଢ଼ିବାର ସାହସ ଅଛି, ତେବେ ମୁଁ ସେମାନଙ୍କୁ ଚ୍ୟାଲେଞ୍ଜ କରୁଛି, ଆମେ ପ୍ରସ୍ତୁତ ଏବଂ ବଙ୍ଗ ଆପଣଙ୍କ ଚ୍ୟାଲେଞ୍ଜକୁ ଗ୍ରହଣ କରିବାକୁ ପ୍ରସ୍ତୁତ।
ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଛନ୍ତି, ଆମର ପ୍ରତିନିଧି ଅଭିଷେକ ବାନାର୍ଜୀ ମଧ୍ୟ ବିଦେଶ ଯାଇଥିବା ପ୍ରତିନିଧି ଦଳରେ ଅଛନ୍ତି ଏବଂ ସେ ପ୍ରତିଦିନ ଆତଙ୍କବାଦ ବିରୋଧରେ କହୁଛନ୍ତି। ସେ ବ୍ୟଙ୍ଗ କରି କହିଛନ୍ତି, ଆପଣ (ପ୍ରଧାନମନ୍ତ୍ରୀ ମୋଦି) ଏହି ସମୟରେ ବିରୋଧୀଙ୍କୁ ଦୋଷ ଦେବାକୁ ଚାହୁଁଛନ୍ତି, ଯାହା ଦାରା ଭାଜପା ଜୁମଲା ପାର୍ଟିର ନେତାଙ୍କ ପରି ରାଜନୀତିକରଣ କରାଯାଇପାରିବ।
ବଙ୍ଗଳାର ମୁଖ୍ୟମନ୍ତ୍ରୀ କହିଛନ୍ତି, ପ୍ରଧାନମନ୍ତ୍ରୀ ମୋଦି ମିଛ କହୁଛନ୍ତି। ସେମାନେ ଦେଶକୁ ଲୁଟନ୍ତି ଏବଂ ପଳାୟନ କରନ୍ତି। ଏପରି କଥା କହିବା ଭଲ ଲାଗୁନାହିଁ। ଆତଙ୍କବାଦ ବିରୋଧରେ ଆମେ କେନ୍ଦ୍ରକୁ ସମର୍ଥନ କରୁଥିବା ସମୟରେ ପ୍ରଧାନମନ୍ତ୍ରୀ ମୋଦି ପଶ୍ଚିମବଙ୍ଗର ସମାଲୋଚନା କରୁଛନ୍ତି। ସେମାନଙ୍କର ନୀତି ହେଉଛି ବିଭାଜନ ରାଜନୀତି। କେନ୍ଦ୍ର ରାଜନୈତିକ ଉଦ୍ଦେଶ୍ୟ ରଖି ଅପରେସନ ସିନ୍ଦୂରର ନାମ ଦେଇଛି।
ସୂଚନାଯୋଗ୍ୟ, ମମତା ସରକାରଙ୍କୁ ଟାର୍ଗେଟ କରି ପ୍ରଧାନମନ୍ତ୍ରୀ ମୋଦି କହିଛନ୍ତି, ବଙ୍ଗଳାର ଲୋକମାନେ ଆଉ ଟିଏମସି ସରକାରଙ୍କ ବ୍ୟବସ୍ଥା ଉପରେ ବିଶ୍ୱାସ କରୁ ନାହାନ୍ତି। ଏଠାକାର ଲୋକଙ୍କ ପାଖରେ ଏବେ କେବଳ କୋର୍ଟ ଉପରେ ନିର୍ଭର କରିବା ପାଇଁ ଅଛି, ତେଣୁ ସମଗ୍ର ବଙ୍ଗଳା କହୁଛି – ଆମେ ଏକ ନିଷ୍ଠୁର ସରକାର ଚାହୁଁନାହୁଁ। ଆଜି ପଶ୍ଚିମବଙ୍ଗ ଏକକାଳୀନ ଅନେକ ସଙ୍କଟରେ ଘେରି ରହିଛି। ପ୍ରଥମ ସଙ୍କଟ ହେଉଛି ସମାଜରେ ହିଂସା ଏବଂ ଅରାଜକତା ବ୍ୟାପିଛି। ଦ୍ୱିତୀୟ ସଙ୍କଟ ହେଉଛି ମା’ ଏବଂ ଭଉଣୀମାନଙ୍କ ଅସୁରକ୍ଷା, ସେମାନଙ୍କ ବିରୋଧରେ ଘଟୁଥିବା ଜଘନ୍ୟ ଅପରାଧ। ତୃତୀୟ ସଙ୍କଟ ହେଉଛି ଯୁବପିଢ଼ିଙ୍କ ମଧ୍ୟରେ ଚରମ ହତାଶା ବ୍ୟାପିବା, ବ୍ୟାପକ ବେକାରୀ। ଚତୁର୍ଥ ସଙ୍କଟ ହେଉଛି ବ୍ୟାପକ ଦୁର୍ନୀତି, ଏଠାରେ ବ୍ୟବସ୍ଥା ଉପରେ କ୍ରମାଗତ ଭାବରେ ହ୍ରାସ ପାଉଥିବା ଜନସାଧାରଣଙ୍କ ବିଶ୍ୱାସ। ପଞ୍ଚମ ସଙ୍କଟ ହେଉଛି ଶାସକ ଦଳର ସ୍ବାର୍ଥପର ରାଜନୀତି ଯାହା ଗରିବଙ୍କ ଅଧିକାରକୁ ଛଡ଼ାଇ ନେଉଛି।
ଆୟୁଷ୍ମାନ ଯୋଜନା ସମ୍ପର୍କରେ ପ୍ରଧାନମନ୍ତ୍ରୀ ମୋଦି କହିଛନ୍ତି, କେନ୍ଦ୍ର ସରକାରଙ୍କ ଆୟୁଷ୍ମାନ ଭାରତ ଯୋଜନାରେ, ଦେଶର କୋଟି କୋଟି ଲୋକ ମାଗଣା ଚିକିତ୍ସା ପାଉଛନ୍ତି, ଯେଉଁଥିରେ ୭୦ ବର୍ଷରୁ ଅଧିକ ବୟସ୍କ ବ୍ୟକ୍ତି ମଧ୍ୟ ଅନ୍ତର୍ଭୁକ୍ତ, କିନ୍ତୁ ପଶ୍ଚିମବଙ୍ଗର ଟିଏମସି ସରକାର ଏହି ଯୋଜନାକୁ କାର୍ଯ୍ୟକାରୀ କରିବାକୁ ଦେଇ ନାହାନ୍ତି, ଯାହା ଫଳରେ ରାଜ୍ୟର ଲୋକମାନେ ଏହି ସୁବିଧାରୁ ବଞ୍ଚିତ ହୋଇଛନ୍ତି।
ବିଶ୍ୱକର୍ମା ଯୋଜନା ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ ମୋଦି କହିଛନ୍ତି, ଏହି ଯୋଜନା ଅଧୀନରେ, ସାରା ଦେଶରେ ଲକ୍ଷ ଲକ୍ଷ ଲୋକଙ୍କୁ ତାଲିମ ଏବଂ ଆର୍ଥିକ ସହାୟତା ଦିଆଯାଉଛି। ପଶ୍ଚିମବଙ୍ଗରେ, ଟିଏମସି ସରକାର ୮ ଲକ୍ଷ ଆବେଦନକୁ ବିଚାରାଧୀନ ରଖିଛନ୍ତି, ଯାହା ଯୋଗୁ ଏହି ଯୋଜନା ଏଠାରେ ମଧ୍ୟ କାର୍ଯ୍ୟକାରୀ ହେଉନାହିଁ। ପ୍ରଧାନମନ୍ତ୍ରୀ ଟିଏମସି ସରକାର ଶିକ୍ଷକ ଏବଂ ପିଲାମାନଙ୍କ ଭବିଷ୍ୟତ ସହିତ ଖେଳୁଥିବାର ମଧ୍ୟ ଅଭିଯୋଗ କରିଛନ୍ତି।
ସେ କହିଛନ୍ତି, ଟିଏମସି ଶାସନ ସମୟରେ, ହଜାର ହଜାର ଶିକ୍ଷକଙ୍କ ଭବିଷ୍ୟତ ନଷ୍ଟ ହୋଇଥିଲା ଏବଂ ଲକ୍ଷ ଲକ୍ଷ ପିଲାଙ୍କ ଭବିଷ୍ୟତ ଅନ୍ଧାରକୁ ଠେଲି ଦିଆଯାଇଥିଲା। ଟିଏମସି ନିଜର ଭୁଲକୁ ଗ୍ରହଣ ନକରି କୋର୍ଟକୁ ଦୋଷ ଦେଉଛି। ଟିଏମସି ଚା’ ବଗିଚାରେ କାମ କରୁଥିବା ଶ୍ରମିକମାନଙ୍କୁ ମଧ୍ୟ ଛାଡି ନାହିଁ। ସେମାନଙ୍କ ରୋଜଗାର ଲୁଟ ହେଉଛି ଏବଂ ଦୋଷୀମାନଙ୍କୁ ବଞ୍ଚାଇବା ପାଇଁ ପ୍ରୟାସ କରାଯାଉଛି।
