ଅନୁଗୋଳ ଅଫିସ, ୨୩।୮: ତାଳଚେର-ଅନୁଗୋଳ-ମେରାମଣ୍ଡଳୀ ଉନ୍ନୟନ କର୍ତ୍ତୃପକ୍ଷ (ତାମଡା)ଙ୍କ ନିକଟରୁ ଅନୁଗୋଳ ପୌରପାଳିକାକୁ କ୍ଷମତା ଆସିବା ପରେ ପ୍ରଥମ ଥର ବେଆଇନ୍ ନିର୍ମାଣ ଉପରେ ଚଢ଼ାଇ କରି ସିଲ୍ କରାଯାଉଛି। ଏକ ଶପିଂମଲ୍ ମାଲିକ ସନ୍ତୋଷଜନକ ଦସ୍ତାବିତ୍ ଦେଖାଇ ପାରି ନ ଥିବାରୁ ଏହାକୁ ସିଲ୍ କରାଯାଇଥିବା ପୌର ନିର୍ବାହୀ ଅଧିକାରୀ ଗିରିଜା ଶଙ୍କର ମଲ୍ଲିକ କହିଛନ୍ତି। ତେବେ ଆଦେଶ ଅନୁଯାୟୀ ଠିକ୍ ଦସ୍ତାବିଜ ପ୍ରଦାନ ନ କରିବା ପର୍ଯ୍ୟନ୍ତ ଉକ୍ତ ମଲ୍ଟି ବନ୍ଦ ରହିବ ବୋଲି ସେ କହିଛନ୍ତି।
ପ୍ରକାଶ ଯେ, ଅନୁଗୋଳ ସହର ଶଙ୍କର ସିନେମା ରୋଡ୍ରୁ ଗାନ୍ଧୀମାର୍ଗ ରାସ୍ତାରେ ସବୁଠାରୁ ବଡ଼ ଶପିଂ ମଲ୍ ଗଢ଼ି ଉଠିଥିଲା। କିନ୍ତୁ ଉକ୍ତ ମଲ ଗୋଟିଏ କାର୍ଯ୍ୟ ପାଇଁ ତାମଡା ନିକଟରୁ ଅନୁମତି ନେଇଥିବା ବେଳେ ଅନ୍ୟ କାର୍ଯ୍ୟରେ ବ୍ୟବହାର ହେଉଥିଲା। ବେଆଇନ ଭାବେ କିଛି ନିର୍ମାଣ ମଧ୍ୟ କରାଯାଇଥିଲା ବେଳେ ପାର୍କିଂ ବ୍ୟବସ୍ଥା କରାଯାଇ ନ ଥିଲା। କେବଳ ସେତିକି ନୁହେଁ, ନିର୍ମାଣ ହୋଇଥିବା ସ୍ଥାନ ଜଣଙ୍କ ନାମରେ ଥିବାବେଳେ ଅଟ୍ଟାଳିକା ନିର୍ମାଣ ପାଇଁ ଅନୁମତି ତାମଡା ପକ୍ଷରୁ ଅନ୍ୟ ଜଣେ ନେଇଥିଲେ। ଏପରି କି ଅନ୍ୟ ଜଣେ ଚୁକ୍ତିନାମା କରିଥିଲେ। ଏହି ମଲ୍ ଗତ ମେ ମାସରେ କାର୍ଯ୍ୟକ୍ଷମ ହୋଇଥିଲା। ଏପରି କାର୍ଯ୍ୟ ପାଇଁ ତାମଡା ପକ୍ଷରୁ ବିଭିନ୍ନ ସମୟରେ ନୋଟିସ୍ ପ୍ରଦାନ କରାଯାଇଥିଲା। କିନ୍ତୁ ମଲ୍ ମାଲିକ ଏହାକୁ ଖାତିର କରି ନ ଥିଲେ। ବିନା ହୋଲ୍ଡିଂ ଟ୍ୟାକ୍ସରେ ଏହା କାଯର୍ୟକ୍ଷମ ରହିଥିଲା। ଏହି ଶପିଂ ମଲ୍ରେ ଚାଲିଥିବା ବ୍ୟବସାୟିକ ପ୍ରତିଷ୍ଠାନର ଟ୍ରେଡ୍ ଲାଇସେନ୍ସ ନ ଥିବା ମଧ୍ୟ ପୌରପାଳିକା ପକ୍ଷରୁ କୁହାଯାଇଛି। ଏ ନେଇ ବାରମ୍ବର ମଲ୍ ମାଲିକଙ୍କୁ ପୌର କର୍ତ୍ତୃପକ୍ଷ ଯୋଗାଯୋଗ କରିଥିଲେ ମଧ୍ୟ ସେମାନେ ଧରାଛୁଆଁ ଦେଇ ନ ଥିଲେ। ତେବେ ପୁଳା ପୁଳା ବେଆଇନ୍ ତଥ୍ୟ ପୌରପାଳିକା ପାଇବା ପରେ ଉକ୍ତ ମଲ୍ଟିକୁ ସୋମବାର ସନ୍ଧ୍ୟାରେ ସିଲ୍ କରାଯାଇଛି। ସୂଚନାଯୋଗ୍ୟ, ଓଡ଼ିଶା ଉନ୍ନୟନ ନିୟମ ଅନୁସାରେ ପୌରପାଳିକାକୁ କ୍ଷମତା ପ୍ରଦାନ କରାଯାଇଛି। ତାମଡାର ସହରାଞ୍ଚଳର ପ୍ଲାନିଂ ଫଙ୍କସନ୍ (ବିଲ୍ଡିଂ ଅନୁମତି, ସବ୍ଡିଭିଜିନାଲ ଲେଆଉଟ୍, ଏନଫୋର୍ସମେଣ୍ଟ୍) ଆସିଛି। ଏହି କ୍ଷମତା ପାଇବା ପରେ ଅନୁଗୋଳ ପୌର କର୍ତ୍ତୃପକ୍ଷ ପ୍ରଥମ ଥର ପାଇଁ ଆକ୍ସନ ମୁଡ୍ରେ ଆସିଛନ୍ତି। ବେଆଇନ୍ ନିର୍ମାଣକୁ ପର୍ଯ୍ୟାୟକ୍ରମେ ଯାଞ୍ଚ କରାଯାଇ ସିଲ୍ କରାଯିବ ବୋଲି କର୍ତ୍ତୃପକ୍ଷ ସୂଚନା ପ୍ରଦାନ କରିଛନ୍ତି।
