ଖଇରା,୯।୭(ଉତ୍କଳବନ୍ଧୁ ପଣ୍ଡା): ବାଲେଶ୍ୱର ଜିଲା ଖଇରା ତହସିଲ ଅଧୀନ ମହତୀପୁର ନୂତନ ରାଜସ୍ବ କ୍ଷେତ୍ର ଭାବେ ଘୋଷଣାକୁ ପାଖାପାଖି ୩ବର୍ଷ ବିତିଯାଇଥିଲେ ହେଁ ଏ ପର୍ଯ୍ୟନ୍ତ ଉକ୍ତ କାର୍ଯ୍ୟାଳୟର ନୂତନ ଗୃହର ନିର୍ମାଣ କାର୍ଯ୍ୟ ଆରମ୍ଭ ହୋଇପାରିଲାନି। ଏହି ନୂତନ ରାଜସ୍ବ କ୍ଷେତ୍ର ଅଧୀନରେ ଥିବା ୨୬ଗ୍ରାମର ଅଧିବାସୀ ୩ବର୍ଷ ହେଲା ପୂର୍ବଭଳି ଖଇରାଠାରେ ଅସ୍ଥାୟୀ ଭାବେ ଚାଲିଥିବା କାର୍ଯ୍ୟାଳୟକୁ ଖର୍ଚ୍ଚାନ୍ତ ହୋଇ ଦୌଡୁଛନ୍ତି। ତୁରନ୍ତ ଟେଣ୍ଡର ପ୍ରକ୍ରିୟାକୁ ତ୍ୱରାନ୍ବିତ କରାଯାଇ ଗୃହ ନିର୍ମାଣ କରିବାକୁ ଉପରୋକ୍ତ ୨୬ ଗ୍ରାମର ୫ ହଜାରରୁ ଊର୍ଦ୍ଧ୍ୱ ଗ୍ରାମବାସୀ ଦାବି କରିଛନ୍ତି।
ଜୁଲାଇରେ ବାଲେଶ୍ୱର ଜିଲାରେ ୪୫ଟି ନୂଆ ରାଜସ୍ବ ନିରୀକ୍ଷକ କ୍ଷେତ୍ର ସୃଷ୍ଟି କରାଯାଇଥିବା ବେଳେ ଏଥିରେ ଖଇରା ତହସିଲ ଅଧୀନରେ ମହତୀପୁର, ଗୋଳିହା ଓ କୋଚିଆକୋଇଲି ସ୍ଥାନ ପାଇଥିଲା। ମହତୀପୁର ରାଜସ୍ବ କ୍ଷେତ୍ର ଅଧୀନରେ ମହତୀପୁର ସମେତ ମଇତାପୁର, ମଠନୂଆଗାଁ, ରୁଢିଙ୍ଗିଆ, ସୁଙ୍ଗୁଡା, ସୁଣ୍ଢିରା-ଗଣ୍ଡିବେଡ, ପିତାପାଣିଆ, ପୂର୍ବପଡା, ଫଗୁଆ, ବଟେଶ୍ୱର, ବୀଣାପୁର, ବ୍ରହ୍ମଚାରୀ, ଚକମହାସମପୁର, ତେଲଦିଆ, ଅଘାପଦା, ଅଣ୍ଡାଇଲୋ, ଅସୁରିଆ, କଣ୍ଟାପଡା, କଲରାପାଳ, କଳାଝାଟିଆ, ଗନ୍ଧାଳି, ଗୋପାଳବେଡା ଗୋପିନାଥପୁର, ଘୁଷୁରିଗଡିଆା ଗ୍ରାମ ସାମିଲ ହୋଇଥିଲା।
ଗୋଳିହା ଓ କୋଚିଆକୋଇଲି ରାଜସ୍ବ କ୍ଷେତ୍ରର ନୂତନ କାର୍ଯ୍ୟାଳୟର କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଥିବା ବେଳେ ମହତୀପୁରରେ ଏ ପର୍ଯ୍ୟନ୍ତ ଆରମ୍ଭ ହୋଇପାରୁନାହିଁ। ମହତୀପୁର ହାଇସ୍କୁଲ ନିକଟରେ ଜାଗା ଚିହ୍ନଟ ପରେ ଏଥପାଇଁ ବର୍ଷେ ତଳୁ ଟେଣ୍ଡର ପ୍ରକ୍ରିୟା ଶେଷ ହୋଇଥିଲା। ହେଲେ ଏ ପର୍ଯ୍ୟନ୍ତ ଏହା ଶେଷ ହୋଇ ନ ଥିବା ବେଳେ ଏହାକୁ ନେଇ ଗ୍ରାମ୍ୟ ଉନ୍ନୟନ ବିଭାଗ ଓ ଠିକାଦାର ପରସ୍ପର ଉପରେ ଦୋଷ ଲଦିଛନ୍ତି ା ଟେଣ୍ଡର ପ୍ରକ୍ରିୟା ଶେଷ ପରେ ଚୁକ୍ତିପାଇଁ ବିଭାଗ ଡାକି ନ ଥିବାରୁ ଚୁକ୍ତି ବିଳମ୍ବ ହୋଇଥିବା ନେଇ କାର୍ଯ୍ୟାଦେଶ ପାଇଥିବା ଠିକାଦାର ଅନୀଲ କୁମାର ପଣ୍ଡା କହିଛନ୍ତି। ଗ୍ରାମ୍ୟ ଉନ୍ନୟନ ବିଭାଗ କନିଷ୍ଠଯନ୍ତ୍ରୀ ମନୋଜ କୁମାର ସେଣ୍ଟଙ୍କୁ ପଚାରିବାରେ ଠିକାଦାର ଟେଣ୍ଡର ପରେ ଚୁକ୍ତି ପାଇଁ ଡକାଯାଇଥିଲେ ହେଁ ସେ ନ ଆସିବାରୁ ଏହି କାର୍ଯ୍ୟ ପୁନଃ ଟେଣ୍ଡର ପାଇଁ ଯାଇଥିବା କଥା କହିଛନ୍ତି। ଲୋକଙ୍କ ଆବଶ୍ୟକତାକୁ ଦୃଷ୍ଟିରେ ରଖି ତୁରନ୍ତ ଗୃହ କାର୍ଯ୍ୟ ଆରମ୍ଭ କରିବାକୁ ମହତୀପୁର ସମିତିସଭ୍ୟା ପ୍ରତିନିଧି ରମାକାନ୍ତ ମହାରଣା ଦାବି କରିଛନ୍ତି।
