ମୁମ୍ବାଇ: ବଲିଉଡ୍ ନାୟିକା ମହିମା ଚୌଧୁରୀ ରବିବାର ତାଙ୍କର ୪୭ ତମ ଜନ୍ମଦିନ ପାଳନ କରିଛନ୍ତି । ଆଜି ସେ ବଡ ପରଦାଠାରୁ ଦୂରେଇ ଥିଲେ ବି ତାଙ୍କ ପ୍ରଶଂସକଙ୍କ ହୃଦୟରେ ଘର କରି ରହିଛନ୍ତି । ୯୦ ଦଶକର ଏହି ନାୟିକା କିଛି ହିଟ୍ ଫିଲ୍ମ ଭେଟି ଦେଇଥିବା ବେଳେ କାହିଁକି ବଡ ପରଦାରୁ ମୁହଁ ଫେରାଇ ନେଲେ ତାହା ଆଜିବି ଅନେକଙ୍କ ମନରେ ପ୍ରଶ୍ନବାଚୀ ହୋଇ ରହିଯାଇଛି । ମିସ୍ ଇଣ୍ଡିଆ ଟାଇଟଲ ଜିତିବା ପରେ ମହିମା ଟେଲିଭିଜନ ବିଜ୍ଞାପନରୁ କାମ ଆରମ୍ଭ କରିଥିଲେ । ୯୦ ଦଶକରେ ମହିମାଙ୍କ ପେପ୍ସି ବିଜ୍ଞାପନ ଖୁବ୍ ଲୋକପ୍ରିୟ ହୋଇଥିଲା । ଏଥିରେ ସେ ଆମିର ଖାଁ ଓ ଐଶ୍ୱର୍ଯ୍ୟା ରାୟ ବଚ୍ଚନଙ୍କ ସହ ନଜର ଆସିଥିଲେ । ୧୯୯୭ରେ ବଲିଉଡ୍ରେ ଡେବ୍ୟୁ କଲେ ମହିମା । ସୁଭାଷ ଘାଇଙ୍କ ନିର୍ଦ୍ଦେଶିତ ଫିଲ୍ମ ‘ପରଦେଶ’ ରେ ସେ ଶାହାରୁଖ ଖାଁଙ୍କ ନାୟିକା ଭାବେ ଦେଖାଦେଲେ । ଫିଲ୍ମ ବକ୍ସ ଅଫିସରେ ସୁପରହିଟ୍ ବି ହେଲା । ଏହାପରେ ସେ ଦାଗ: ଦ ଫାୟାର, ପ୍ୟାର କୋଇ ଖେଲ ନେହିଁ, କୁରୁକ୍ଷେତ୍ର, ୟେ ତେରା ଘର ୟେ ମେରା ଘର ଓ ଓମ ଜୟଜଗଦିଶ ଭଳି ଫିଲ୍ମରେ ନଜର ଆସିଥିଲେ । ଏହାରି ଭିତରେ ମହିମାଙ୍କ ରିଲେସନଶିପକୁ ନେଇ ହୋଇଥିଲା ଚର୍ଚ୍ଚା । ଟେନିସ ତାରକା ଲିୟଣ୍ଡର ପେସଙ୍କ ସହ ଡେଟିଂରେ ଚାଲିଲେ ମହିମା । ହେଲେ କିଛିଦିନ ପରେ ଏଥିରେ ଆସିଲା ଫାଟ । ଉଭୟ ହୋଇଗଲେ ଅଲଗା । ଏହାପରେ ୨୦୦୬ରେ ମହିମା ଆର୍କିଟେକ୍ଟ ତଥା ବିଜନେସ୍ ମ୍ୟାନ ବବି ମୁଖାର୍ଜୀଙ୍କୁ ଲୁଚିଛପି ବିବାହ କଲେ ବୋଲି କୁହାଯାଏ । ଆଉ ବିବାହର ଖୁବ୍ କମ୍ ଦିନ ଭିତରେ ସେ ଗର୍ଭବତୀ ଥିବା ଜଣାଇଲେ । ଆଲୋଚନା ହେଲା କି ବିବାହ ପୂର୍ବରୁ ସେ କୁଆଡେ ଗର୍ଭବତୀ ହୋଇଯାଇଥିଲେ । ଯାହାହେଉ ତାଙ୍କର ଏକ କନ୍ୟା ସନ୍ତାନ ଜନ୍ମ ନେବାର କିଛିଦିନ ପରେ ସେ ବବିଙ୍କଠାରୁ ଅଲଗା ହୋଇଗଲେ । ଏବେ ସେ ସିଙ୍ଗଲ ମଦର ଭାବେ ଝିଅ ଆରିୟାନା ସହ ରହୁଛନ୍ତି । ସୋସିଆଲ ମିଡିଆରେ ସବୁବେଳେ ଆକ୍ଟିଭ ଥିବା ମହିମା ତାଙ୍କ ପ୍ରଶଂସକଙ୍କ ସହ ଯୋଡି ହୋଇ ରହିଥାଆନ୍ତି ବୋଲି କୁହାଯାଏ ।
