ଯାଜପୁର ଟାଉନ,୨୨ା୧୦(ପ୍ରଯକ୍ତା ପ୍ରିୟଦର୍ଶନୀ ମହାନ୍ତି):ଯାଜପୁରର ଅଧିଷ୍ଠାତ୍ରୀ ଦେବୀ ମା’ବିରଜାଙ୍କ ପୀଠରେ ଶନିବାର ମହାଷ୍ଟମୀ ପାଳିତ ହୋଇଯାଇଛି। ପ୍ରାତଃ ସମୟରୁ ମା’ଙ୍କ ମହାଷ୍ଟମୀ ବେଶ ଦେଖିବା ପାଇଁ ୫୦ ହଜାରରୁ ଊର୍ଦ୍ଧ୍ୱ ଶ୍ରଦ୍ଧାଳୁଙ୍କ ସମାଗମ ହୋଇଥିଲା। ମା’ଙ୍କ ସ୍ବର୍ଣ୍ଣବେଶ କରାଯିବା ସହ ବିଭିନ୍ନ ଫୁଲରେ ସଜ୍ଜିତ କରାଯାଇଥିଲା। ମନ୍ଦିରର ପ୍ରବେଶ ଦ୍ୱାରଠାରୁ ଆରମ୍ଭ କରି ବଳି ମଣ୍ଡପ ପର୍ଯ୍ୟନ୍ତ ବିଭିନ୍ନ ଫୁଲରେ ସଜାଯିବା ସହ ମନ୍ଦିରକୁ ଆଲୋକମାଳରେ ସଜ୍ଜିତ କରାଯାଇଥିଲା। ସେହିପରି ମା’ଙ୍କ ରଥଯାତ୍ରା ଅଷ୍ଟମ ଦିନରେ ପହଞ୍ଚଛି। ଦ୍ୱିତୀୟାଷ୍ଟମିରୁ ଆରମ୍ଭ ହୋଇଥିବା ବିଶେଷ ଷୋଡ଼ଶୋପଚାର ପୂଜା ପଞ୍ଚଦଶ ଦିନରେ ଶେଷ ହୋଇଛି। ପ୍ରାତଃ ସମୟରୁ ଦଶାଶ୍ୱମେଧ ଘାଟ ବ୍ରାହ୍ମଣଙ୍କ ଦ୍ୱରା ଅଣାଯାଇଥିବା ବୈତରଣୀ ଜଳରେ ମା’ଙ୍କୁ ସ୍ନାନ କରାଯିବା ପରେ ସ୍ବର୍ଣ୍ଣବେଶ କରାଯାଇ ନୈବିଦ୍ୟ ଅର୍ପଣ କରାଯାଇଥିଲା। ଅପରାହ୍ନରେ ବିଶେଷ ଷୋଡ଼ଶୋପଚାର ପୂଜା ଆରମ୍ଭ ହୋଇ ଯଜ୍ଞ ବେଦିରେ କଳସ ପୂଜା ହୋଇଥିଲା। ରଥରେ ବିଜେ ପ୍ରତିମାଙ୍କ ପୂଜା ସରିବା ପରେ ମା’ଙ୍କୁ ନୀତି ଲାଗି ପହୁଡ଼ ହୋଇଥିଲା। ଅପରାହ୍ନରେ ମା’ଙ୍କ ପହଡ଼ ଖୋଲିବା ପରେ ଅଙ୍ଗଲାଗି ସେବାୟତ ଗର୍ଭଗୃହରୁ ମା’ଙ୍କର ଆର୍ଶବାଡ଼ି ଧରି ରଥରେ ବିଜେ ହେବା ପରେ ରଥଟଣା ହୋଇଥିଲା।
ସନ୍ଧ୍ୟାରେ ରଥ ଟଣାପରେ ମା’ଙ୍କର ଆର୍ଶାବାଡି ଗର୍ଭ ଗୃହରେ ଅଙ୍ଗଲାଗି ସେବାୟତ ରଖିଥିଲେ। ପରେ ମା’ଙ୍କ ଆରତି ହୋଇଥିଲା। ଅଷ୍ଟମି ତିଥି ଅନୁଯାୟୀ ମା’ଙ୍କ ଷୋଡଶୋପାଚାର ପୂଜା ସହିତ କଳସ ପୂଜା ହୋଇଥିଲା। ପଞ୍ଚମୀ ଦିନରୁ ଆରମ୍ଭ ହୋଇଥିବା ଯାଜ୍ଞ ମହାଷ୍ଟରେ ପୂର୍ଣ୍ଣାହୁତି ହୋଇଛି। ଷୋଳକଳସ ପୂଜା ମଧ୍ୟ ଶେଷ ହୋଇଛି। ରଥରେ ବିଜେ ପ୍ରତିମାଙ୍କ ଷୋଡ଼ଶୋପଚାର ହେବା ପରେ ମା’ଙ୍କୁ ନୀତି ଅର୍ପଣ କରାଯାଇ ପହଡ଼ କରାଯାଇଥିଲା। ମା’ଙ୍କ ଷୋଡ଼ଶୋପାଚାର ପୂଜା, ଯଜ୍ଞ କାର୍ଯ୍ୟକ୍ରମ, ରଥରେ ବିଜେପ୍ରତିମା ପୂଜା ଏବଂ ଷୋଳକଳସ ପୂଜାକୁ ମନ୍ଦିରର ପୁରୋଧା, ପୂଜକ ଓ ମା’ଙ୍କ ଶ୍ରୀଅଙ୍ଗଲାଗି ସେବାୟତମାନେ ନିର୍ବାହ କରିଥିଲେ।
