ମୁମ୍ବାଇ,୯।୩: ମହାରାଷ୍ଟ୍ର ସରକାରଙ୍କ ଉପମୁଖ୍ୟମନ୍ତ୍ରୀ ତଥା ରାଜ୍ୟ ଅର୍ଥମନ୍ତ୍ରୀ ଦେବେନ୍ଦ୍ର ଫଡନଭିସ ଗୁରୁବାର ବିଧାନସଭାରେ ରାଜ୍ୟର ବାର୍ଷିକ ବଜେଟ ୨୦୨୩-୨୪ ଉପସ୍ଥାପନ କରିଛନ୍ତି। ବଜେଟରେ ସରକାର କେତେକ ବଡ଼ ଘୋଷଣା କରିଛନ୍ତି। ବଜେଟରେ କୃଷକ, ମହିଳା, ଆଦିବାସୀ, ଓବିସି, ଭିତ୍ତିଭୂମି ବିକାଶ, ରୋଜଗାର ସୃଷ୍ଟି ଏବଂ ପରିବେଶ ସୁରକ୍ଷା ଉପରେ ବିଶେଷ ଧ୍ୟାନ ଦିଆଯାଇଛି। ଏପରିକି ଚାଷୀଙ୍କୁ ବାର୍ଷିକ ୬ ହଜାର ଟଙ୍କା ଯୋଗାଇ ଦେବା ପାଇଁ ଅର୍ଥମନ୍ତ୍ରୀ ଦେବେନ୍ଦ୍ର ବଜେଟ ଅଭିଭାଷଣରେ ସୂଚନା ଦେଇଛନ୍ତି। ଏଥିସହ ମହିଳାଙ୍କ ପାଇଁ ସରକାରୀ ବସ୍ରେ ଟିକେଟ ଉପରେ ଭଡ଼ା ଅଧା କରିବାକୁ ଶିନ୍ଦେ ସରକାର ବଜେଟରେ ଘୋଷଣା କରିଛନ୍ତି। ଉଦ୍ଧବ ଠାକରେଙ୍କ ନେତୃତ୍ୱାଧୀନ ଏମ୍ଭିଏ ସରକାରକୁ ହଟାଇ କ୍ଷମତାକୁ ଆସିବାର ୮ମାସ ପରେ ଶିନ୍ଦେ ସରକାରଙ୍କ ଏହା ପ୍ରଥମ ବଜେଟ। ଏପରିକି ବଜେଟରେ ଆଶା ସ୍ବେଚ୍ଛାସେବୀମାନଙ୍କ ଦରମା ୩୫୦୦ରୁ ୫୦୦୦ଟଙ୍କାକୁ ବୃଦ୍ଧି କରାଯିବା ସହ ଅଙ୍ଗନୱାଡି କର୍ମୀଙ୍କ ଦରମା ୮୩୨୫ରୁ ୧୦ ହଜାରକୁ ବୃଦ୍ଧି କରାଯାଇଛି।
