ଭୁବନେଶ୍ୱର,୨୦ା୪(ବ୍ୟୁରୋ): ମହାନଦୀ ଜଳ ବିବାଦ ଟ୍ରିବ୍ୟୁନାଲ ବୁଧବାର କ୍ଷେତ୍ରସ୍ତରୀୟ ସର୍ଭେ ଆରମ୍ଭ କରିଛନ୍ତି। ଟ୍ରିବ୍ୟୁନାଲ ଟିମ୍ ଛତିଶଗଡ଼ର ଫରସିୟା ଗ୍ରାମ ନିକଟରେ ମହାନଦୀର ଉତ୍ପତ୍ତି ସ୍ଥଳ ବୁଲି ଦେଖିଛନ୍ତି। ଏହି ଟିମ୍ରେ ଟ୍ରିବ୍ୟୁନାଲ ଖଣ୍ଡପୀଠ ଜଷ୍ଟିସ୍ ଏ.ଏମ୍. ଖାନଓ୍ବାଲିକର, ରବି ରଞ୍ଜନ ଏବଂ ଇନ୍ଦ୍ରମିତ କୌର କୋଚରଙ୍କ ସମେତ ମୂଲ୍ୟାୟନକାରୀ(ଆସେସର) ଏବଂ ରେଜିଷ୍ଟ୍ରାର ସର୍ଭେ ଆରମ୍ଭ କରିଛନ୍ତି। ଟ୍ରିବୁ୍ୟୁନାଲ ଫରସିୟା ଗ୍ରାମ ଓ ଶିହାଓ୍ବା ଅଞ୍ଚଳ ପରିଦର୍ଶନ କରିଛନ୍ତି। ଗୁରୁବାର ଟିମ୍ ସୋନ୍ଦୁର ଡ୍ୟାମ୍ ପରିଦର୍ଶନ କରିବେ। ତୃତୀୟ ଦିନରେ ମୁରୁମଶିଲି ଡ୍ୟାମ୍, ରବିଶଙ୍କର ସାଗର ଜଳ ଭଣ୍ଡାର ଓ ନବନିର୍ମାଣ ରୁଦ୍ରୀ ବ୍ୟାରେଜ ବୁଲି ସର୍ଭେ କରିବେ। ସେହିପରି ଟ୍ରିବ୍ୟୁନାଲ ଟିମ୍ ଚତୁର୍ଥ ଦିନରେ ଧାମଡ଼ାଠାରେ ଥିବା ତେମାରି, ଖଇରାଗଡ଼ଠାରେ ଥିବା ଉଦୟପୁର, ଛୁଇଖାଦାନଠାରେ ଥିବା ସିଧିବାବା ମାଇନର ଟ୍ୟାଙ୍କ୍ ଓ ପିପାରିଆ ଡ୍ୟାମ୍ ପର୍ଯ୍ୟବେକ୍ଷଣ କରିବା କାର୍ଯ୍ୟକ୍ରମ ରହିଛି। ପ୍ରଥମ ପର୍ଯ୍ୟାୟର ଶେଷ ଦିବସରେ ଟ୍ରିବ୍ୟୁନାଲ ଟିମ୍ ରାଜୀବ ସମୋଦା ନିସଦା ଡାଇଭର୍ସନ ଏବଂ ସମୋଦା ବ୍ୟାରେଜ ପରିଦର୍ଶନ କରିବେ। ଛତିଶଗଡ଼ରେ ଟ୍ରିବ୍ୟୁନାଲ ଟିମ୍ ଦୁଇଟି ପର୍ଯ୍ୟାୟରେ ଅଣମୌସୁମୀ ସମୟରେ ମହାନଦୀରେ ଜଳ ପ୍ରବାହ, ତଳମୁଣ୍ଡରେ ଗଚ୍ଛିତ ହେଉଥିବା ଜଳ ଓ ଏହାର ବିନିଯୋଗକୁ ଅନୁଧ୍ୟାନ କରିବେ। ଅନ୍ୟପକ୍ଷରେ ଛତିଶଗଡ଼ ମୁଖ୍ୟମନ୍ତ୍ରୀ ଭୂପେଶ ବାଘେଲ କହିଛନ୍ତି, ଜଳ ବିବାଦ ଯୋଗୁ ବ୍ୟାରେଜ ନିର୍ମାଣ କରିବାରେ ରାଜ୍ୟ ବିଫଳ ହୋଇଛି। ମହାନଦୀ ଛତିଶଗଡ଼ରୁ ଉତ୍ପତ୍ତି ହୋଇଛି। ରାଜ୍ୟରେ କୌଣସି ଡ୍ୟାମ୍ ନାହିଁ। କେବଳ ୭ଟି ଡ୍ୟାମ୍ ନିର୍ମାଣକୁ ନେଇ ଦ୍ୱନ୍ଦ୍ୱ ଦେଖାଦେଇଛି। ଏହି ମାମଲା ଟ୍ରିବ୍ୟୁନାଲକୁ ଯିବା ପରେ ବ୍ୟାରେଜ ନିର୍ମାଣ ବନ୍ଦ ରହିଛି। ସମସ୍ତ ପାଣି ଓଡ଼ିଶାକୁ ଚାଲିଯାଉଥିବାରୁ ବ୍ୟାରେଜ ନିର୍ମାଣ ପାଇଁ ଅନୁମତି ମିଳିବା ଦରକାର ବୋଲି ଛତିଶଗଡ଼ ମୁଖ୍ୟମନ୍ତ୍ରୀ କହିଛନ୍ତି। କେନ୍ଦ୍ର ଜଳଶକ୍ତି ରାଷ୍ଟ୍ରମନ୍ତ୍ରୀ ବିଶ୍ୱେଶ୍ୱର ଟୁଡୁ କହିଛନ୍ତି, ଛୋଟ ବ୍ୟାରେଜ ନିର୍ମାଣ କରିବା ପାଇଁ କେନ୍ଦ୍ରର ଅନୁମତି ଦରକାର ନାହିଁ। ଓଡ଼ିଶା ସରକାର ଚାହିଁଲେ ମହାନଦୀ ଉପରେ ଛୋଟ ବ୍ୟାରେଜ ନିର୍ମାଣ କରିପାରିବେ। ଆଗକୁ ନିର୍ବାଚନ ଆସୁଥିବାରୁ ରାଜ୍ୟ ସରକାର ମହାନଦୀକୁ ନେଇ ଡ୍ରାମା କରୁଛନ୍ତି।
