ଭବାନୀପାଟଣା,୨୪ା୧୨(ସ୍ବ.ପ୍ର.): ବହୁ ଚର୍ଚ୍ଚିତ ମମିତା ମେହେର ହତ୍ୟା ଘଟଣାର ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁ ଜେଲରେ ଆତ୍ମହତ୍ୟା କରିଥିଲେ। ଗୋବିନ୍ଦଙ୍କ ପରିବାର ଲୋକେ ଏହାକୁ ହତ୍ୟା ଅଭିଯୋଗ ଆଣିଥିଲେ। ଏହି ଘଟଣାକୁ ନେଇ ବର୍ତ୍ତମାନ କ୍ରାଇମବ୍ରାଞ୍ଚ ଟିମ୍ ଘଟଣାର ତଦନ୍ତ କରୁଥିବା ବେଳେ ଶନିବାର ଗୋବିନ୍ଦ ସାହୁଙ୍କ ଗାଁ ମହାଲିଙ୍ଗରେ ପହଞ୍ଚିଥିଲା କ୍ରାଇମବ୍ରାଞ୍ଚ ଟିମ୍।
ସୂଚନା ଅନୁଯାୟୀ, ଗୋବିନ୍ଦ ଆତ୍ମହତ୍ୟା କରିଥିବା ସମୟରେ ତାଙ୍କ ଜ୍ୟାକେଟରୁ ଗୋଟିଏ ସୁସାଇଡ୍ ନୋଟ୍ ବାହାରିଥିବା ଜଣାପଡ଼ିଥିଲା। ଏହି ନୋଟ୍ରେ କାହା ହାତଲେଖା ରହିଛି, ତାହା ସେ ନିଜେ ଲେଖିଥିଲେ ନା ଆଉ କିଏ ଲେଖିଥିଲା; ତାହାକୁ ନେଇ ସୁସାଇଡ୍ ନୋଟ୍ରେ ଥିବା ହାତଲେଖାକୁ ମ୍ୟାଚ୍ କରିବା ପାଇଁ ଆଜି କ୍ରାଇମବ୍ରାଞ୍ଚ ଡିଏସ୍ପି ବିଜୟ କୁମାର ମଲ୍ଲିକଙ୍କ ନେତୃତ୍ୱରେ ଏକ ଟିମ୍ ପ୍ରଥମେ ମହାଲିଙ୍ଗ ଆଞ୍ଚଳିକ ଉଚ୍ଚ ମାଧ୍ୟମିକ ବିଦ୍ୟାଳୟରେ ପହଞ୍ଚିଥିଲେ। ସେଠାରେ ସେମାନେ ଅନେକ ଦିଗକୁ ନେଇ ତଦନ୍ତ କରୁଥିବା ଜଣାପଡ଼ିଛି। କଲେଜରେ ପହଞ୍ଚି ପରିଚାଳନା କମିଟିର ସମ୍ପାଦକ କିରଣ କୁମାର ସିଂ ଓ ଭାରପ୍ରାପ୍ତ ଅଧ୍ୟକ୍ଷ ଜୟଦେବ ମିଶ୍ରଙ୍କ ସହିତ ଆଲୋଚନା କରିବା ପରେ ହାତଲେଖା ମ୍ୟାଚ କରିବା ପାଇଁ କଲେଜରୁ ଗୋଟିଏ ରେଜିଷ୍ଟର ଜବତ କରିଥିଲେ। ପରେ ଗୋବିନ୍ଦଙ୍କ ଘରକୁ ଯାଇଥିଲେ। ଗୋବିନ୍ଦଙ୍କ ପରିବାର ସହିତ ଦୀର୍ଘ ଘଣ୍ଟା ଆଲୋଚନା କରିବା ପରେ ଘରେ ଥିବା ଅନେକ କାଗଜପତ୍ର ଯାଞ୍ଚ କରିବା ପରେ ଘରୁ ମଧ୍ୟ ଗୋବିନ୍ଦଙ୍କ ଏକ ହାତ ଲେଖା ଡାଏରୀ ଜବତ କରିଛି କ୍ରାଇମବ୍ରାଞ୍ଚ ଟିମ୍। ଯାହା ସୂଚନା ରହିଛି କି, ସୁସାଇଡ ନୋଟ୍ ସହିତ ତାଙ୍କ ହାତ ଲେଖା ମ୍ୟାଚ୍ କରିବା ପାଇଁ ଡାଏରୀ ଜବତ କରିଥିବା ମୃତ ଗୋବିନ୍ଦଙ୍କ ଭାଇ ସନ୍ତୋଷ ଓ କଲେଜ ସମ୍ପାଦକ କିରଣ କୁମାର ସିଂ ପ୍ରକାଶ କରିଛନ୍ତି।
