ଭୋଗରାଇ, ୧୫।୨(ପ୍ରଦୀପ ଦାସ): ଆଜି ହେଉଛି ପବିତ୍ର ମହାଶିବରାତ୍ରି। ସମସ୍ତ ଶୈବପୀଠ ହୋଇଛି ଭକ୍ତମୟ। ସବୁଠି ଓଁ ନମଃ ଶିବାୟରେ ପ୍ରକମ୍ପିତ ହେଉଛି ମନ୍ଦିର l ଏଭଳି ସ୍ଥିତିରେ ରବିବାର ପୂର୍ବ ଭାରତର ପ୍ରସିଦ୍ଧ ଶୈବପୀଠ ଚନ୍ଦନେଶ୍ୱର ଓ ଏସିଆର ସର୍ବବୃହତ ଶିବଲିଙ୍ଗ ଭୂଷଣ୍ଡେଶ୍ୱର ମନ୍ଦିରରେ ବଙ୍ଗ, ଝାଡ଼ଖଣ୍ଡ – ଓଡ଼ିଶାର ଅସଂଖ୍ୟ ଶ୍ରଦ୍ଧାଳୁ ନିଶିବସାନରୁ ଏକାଠି ହୋଇ ଭଗବାନଙ୍କୁ ଆରାଧନା କରୁଛନ୍ତି। ଭୋଗରାଇ ସୀମାନ୍ତ ହୁଗୁଳି ଗ୍ରାମର କୂଳ ପାଉ ନ ଥିବା ଜଳଯନ୍ତ୍ର ଦେବତା ଚନ୍ଦନେଶ୍ୱର ଓ ସୁବର୍ଣ୍ଣରେଖା ନଦୀ ପାର୍ଶସ୍ଥ ବିଶାଳକାୟ ଶିବଲିଙ୍ଗ ଭୂଷଣ୍ଡେଶ୍ୱର ମହାଦେବଙ୍କ ଠାରେ ଭୋର ୪ ଟାରୁ ଶୈବଭକ୍ତଙ୍କ ପୂଜାର୍ଚ୍ଚନା, ଜଳାଭିଷେକ, ନୀତିକାନ୍ତ ପୂଜାପାଠ, ରୃଦ୍ରାଭିଷେକରେ ସମଗ୍ର ଅଞ୍ଚଳ ଅଧ୍ୟାତ୍ମିକ ପରିବେଶ ସୃଷ୍ଟି ହୋଇଛି।
ଭୂଷଣ୍ଡେଶ୍ୱର ମହାଦେବଙ୍କ ଠାରେ ମନ୍ଦିର ପରିଚାଳନା କମିଟି ପକ୍ଷରୁ ଶୈବଭକ୍ତ ଇଂ ଅଭିଜିତ ଦାସ ସା ୬ ଟାରେ ଦୀପ ପ୍ରଜ୍ଜ୍ୱଳନର ଶୁଭାରମ୍ଭ କରିବେ। ଦୂରଦୂରାନ୍ତରୁ ଜାଗର ଜଳିବାକୁ ଆସିଥିବା ଶୈବଭକ୍ତଙ୍କ ଆଗମନରେ ଚନ୍ଦନେଶ୍ୱର, ଭୂଷଣ୍ଡେଶ୍ୱର ମନ୍ଦିର ଭକ୍ତମୟ ହୋଇଛି । ଭୋଗରାଇ ଚୌକି ଗ୍ରାମର ନୀଳକଣ୍ଠେଶର, ଦେଉଳାହାଟରେ ଅନନ୍ତ ପୁରୁଷୋତ୍ତମ, ଭୋଗରାଇ ଓ କମର୍ଦ୍ଦାରେ ବାରଦେଉଳି, କୁମ୍ଭାରମୂଳିରେ ଧବଳେଶ୍ୱର, କଳାହିରେ ସିଦ୍ଧେଶ୍ୱର, ଗୋବର୍ଦ୍ଧନପୁରରେ ଝଗ ପୁଟିନାରେ ପୁଟିଣେଶ୍ୱର, କୁସୁଡାରେ ବ ଆରୁହାବୃତ୍ତିରେ ଅଷ୍ଟଶମ୍ଭୁ ସହିତ ପସରବିନ୍ଧା, ଭୋଗରାଇ ଲକ, ମହେଶପୁର, ବାଉଁଶଡିହା ପ୍ରଭୃତି ଶତାଧିକ ଗ୍ରାମୀଣ ମହାଦେବଙ୍କ ଠାରେ ପଇଡ଼, କ୍ଷୀର, ବେଲପତ୍ର,କଦଳୀ, ଅରୁଆ ଚାଉଳ, ଫୁଲ ଚନ୍ଦନ, ଧୂପ, ଝୁଣାଓ ଫୁଲ ଡାଲାରେ ଫଳମୂଳ ସଜେଇ ଶୈବଭକ୍ତ ମାନେ ଆରାଧନା କରୁଛନ୍ତି l ସଞ୍ଜ ନଇଁ ଆସିଲେ ସମସ୍ତ ଶୈବପୀଠରେ ଦୀପ,ଫୁଲମାଳ ଓ ରଙ୍ଗୀନ ବିଦ୍ୟୁତ ଆଲୋକ ମାଳାରେ ମହାଦେବ ମନ୍ଦିର ଝଲସି ଉଠିବ । ଭୋର ୪ ଟା ୩ ୦ ମିନିଟରେ ମହାଦୀପ ଉଠିବ। ପରେ ବ୍ରତଚାରୀମାନେ ମହାଦେବଙ୍କ ପଞ୍ଚାମୃତ ପାନ କରି ମନସ୍କାମନା ପୂର୍ବକ ବ୍ରତ ଶେଷ କରିବେ। ମହାଶିବ ରାତ୍ରିରେ ମହାଦେବଙ୍କ ଠାରେ ଆରାଧନା, ଭଜନ ସନ୍ଧ୍ୟା, ଧାର୍ମିକ ପ୍ରବଚନ, ସାଂସ୍କୃତିକ କାର୍ଯ୍ୟକ୍ରମ ବିମୋହିତ କରିବ । ଶ୍ରଦ୍ଧାଳୁଙ୍କ ନିମନ୍ତେ ପାନୀୟ ଜଳ, ସ୍ବାସ୍ଥ୍ୟସେବା,ଶୌଚାଳାୟ ପ୍ରତି ଟ୍ରଷ୍ଟ ବୋର୍ଡ଼ ପକ୍ଷରୁ ଗୁରୁତ୍ୱ ଦିଆଯାଇଛି। ଶାନ୍ତି ଶୃଙ୍ଖଳା ପାଇଁ ଚନ୍ଦନେଶ୍ୱରରେ ୩ ପ୍ଲାଟୁନ ଓ ଭୂଷଣ୍ଡେଶ୍ୱର ମନ୍ଦିରରେ ୧ ପ୍ଲାଟୁନ ପୋଲିସ ଫୋର୍ସ ମୁତୟନ ହୋଇଥିବାର ଜଳେଶ୍ୱର ଏସଡ଼ିପିଓ ସୂଚନା ଦେଇଛନ୍ତି।
