ଥୁଆମୂଳ ରାମପୁର,୧।୪ (ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ ମୁଖ୍ୟାଳୟରେ ଅତି ଆଡ଼ମ୍ବର ସହକାରେ ଅନୁଷ୍ଠିତ ହେଉଥିବା ମା’ ଠାକୁରାଣୀଙ୍କ ପବିତ୍ର ଚୈତ୍ର ଘଣ୍ଟଯାତ୍ରା ମଙ୍ଗଳବାର ରାତିରେ ମହାସମାରୋହରେ ସମ୍ପନ୍ନ ହୋଇଯାଇଛି। ଦୀର୍ଘ ୮ ଦିନ ଧରି ବିଭିନ୍ନ ପଡ଼ା ଓ ସାହି ପରିକ୍ରମା କରିବା ପରେ ମା’ ପୁଣି ନିଜ ସ୍ଥାୟୀ ଆସନରେ ବିରାଜମାନ କରିଛନ୍ତି।
ସୂଚନା ଅନୁଯାୟୀ, ଗତ ମାର୍ଚ୍ଚ ୨୪ ତାରିଖ ଚୈତ୍ର ଶୁକ୍ଳ ଷଷ୍ଠୀ ତିଥିରୁ ଏହି ଯାତ୍ରା ଆରମ୍ଭ ହୋଇଥିଲା। ପ୍ରଥମ ଦିନରେ ମା’ଙ୍କ ପବିତ୍ର ଘଣ୍ଟକୁ ମୁଖ୍ୟ ପୂଜକଙ୍କ ଗୃହକୁ ଅଣାଯାଇ ବିଭିନ୍ନ ପୁଷ୍ପମାଲ୍ୟରେ ଶୃଙ୍ଗାର ବେଶ କରାଯାଇ ପୂଜାର୍ଚ୍ଚନା କରାଯାଇଥିଲା।
ମୁଖ୍ୟ ପୂଜକ ଡମ୍ବରୁଧର ପୁଝାରୀ ମା’ଙ୍କ ଘଣ୍ଟକୁ ନିଜ କାନ୍ଧରେ ବହନ କରିଥିବା ବେଳେ ଭୈରବ ଦେବଙ୍କ ପୂଜାରୀ ମା’ଙ୍କ ଛତ୍ର ବହନ କରି ବିଭିନ୍ନ ସାହି ପଡ଼ା ବୁଲି ଭକ୍ତଙ୍କୁ ଦର୍ଶନ ଦେଇଥିଲେ। ଅଷ୍ଟମ ଦିବସରେ ମା’ଙ୍କ ଘଣ୍ଟ ସହର ପରିକ୍ରମା କରି ମନ୍ଦିର ଅଭିମୁଖେ ଯିବା ସମୟରେ ଏକ ଭକ୍ତିମୟ ପରିବେଶ ସୃଷ୍ଟି ହୋଇଥିଲା। ଶ୍ରଦ୍ଧାଳୁମାନେ ରାସ୍ତାର ଛକ ମାନଙ୍କରେ ଝୁଣା, ପଣାପାଣି ଓ ଗଜାମୁହାଁ ଅର୍ପଣ କରି ପୂଜାର୍ଚ୍ଚନା କରିଥିଲେ। ମହିଳାମାନଙ୍କ ହୁଳହୁଳି ଓ ପାରମ୍ପରିକ ବାଦ୍ୟର ତାଳେ ତାଳେ ମା’ ନିଜ ମନ୍ଦିରରେ ପ୍ରବେଶ କରିଥିଲେ।
ଲୋକ ବିଶ୍ୱାସ ଅନୁଯାୟୀ, ମା’ଙ୍କ ଏହି ଚୈତ୍ର ଯାତ୍ରା ଦ୍ୱାରା ଅଞ୍ଚଳରୁ ରୋଗବ୍ୟାଧି ଦୂର ହେବା ସହ ସର୍ବମଙ୍ଗଳ ସାଧିତ ହୁଏ। ସମାପନ ରାତିରେ ସାଂସ୍କୃତିକ କାର୍ଯ୍ୟକ୍ରମରେ ନାଟକ ପରିବେଷଣ କରାଯାଇଥିଲା, ଯେଉଁଥିରେ ହଜାର ହଜାର ଲୋକଙ୍କ ସମାଗମ ହୋଇଥିଲା। କେବଳ ବ୍ଲକ ମୁଖ୍ୟାଳୟ ନୁହେଁ, ବରଂ ଗୋପାଳପୁର, ବିଷମଗିରି, ଦୋଳଗୁଡ଼ା, ଗୁଣୁପୁର, କର୍ଲାପାଟ ଓ ମହୁଲ ପାଟଣାଠାରେ ମଧ୍ୟ ଏହି ଯାତ୍ରା ଶାନ୍ତି ଶୃଙ୍ଖଳାର ସହ ସମ୍ପନ୍ନ ହୋଇଥିବା ସୂଚନା ମିଳିଛି।
Dharitri – Odisha’s No.1 Odia Daily
