ଗଞ୍ଜାମ,୧୨।୧୦(ବିଦ୍ୟାଧର ସାହୁ): ଗଞ୍ଜାମ ସହର ବଡ଼ ବଜାରଠାରେ ମହା ଆଡମ୍ବରରେ ଚାଲିଥିବା ମା’ ଗଜଲକ୍ଷ୍ମୀଙ୍କୁ ମେଲାଣି ପରେ ରବିବାର ବିଦାୟ ଦିଆଯାଇଛି। ୭ ଦିନ ମା’ ଅସ୍ଥାୟୀ ମଣ୍ଡପରେ ପୂଜା ପାଇବା ପରେ ମା’ ବିଦାୟ ନେଇଛନ୍ତି। ଏହି ଅବସରେ ମା’ଙ୍କ ପ୍ରତିମୃର୍ତ୍ତି ଏକ ବିରାଟ ଶୋଭାଯାତ୍ରାରେ ବଜାର ପରିକ୍ରମା କରାଯିବା ପରେ ଋଷିକୂଲ୍ୟା ନଦୀରେ ବିସର୍ଜନ କରାଯାଇଛି। ବିଭିନ୍ନ ଅତ୍ୟାଧୁନିକ ଆଲୋକମାଳାରେ ବଜାର ଝଲସୁଛି ଉଠୁଥିଲା l ପ୍ରତ୍ୟେକ ସାରେ ମା’ଙ୍କ ଆଳତି ସମୟରେ ଢୋଲିଆଙ୍କ ଢୋଲ ଶବ୍ଦରେ କମ୍ପି ଉଠୁଥିଲା ସହର l ଏଥିସହ ମା’ଙ୍କ ଜଣାଣ ସହ ଆଳତି ଦର୍ଶନ ପାଇଁ ଆଖପାଖ ଅଞ୍ଚଳର ବହୁ ଭକ୍ତଙ୍କ ଭିଡ଼ ଜମୁଥିବା ଦେଖିବାକୁ ମିଳିଥିଲା । ହୂମ୍ବର ଗ୍ରାମର ଢୋଲିଆ ଦଳର ଢୋଲିଆ ଦିନେଶ କୁମାର ଦାସ, ସନାତନ ଦାସ, ଗିନି ଘଣ୍ଟ ବାଦକ ଉମାକାନ୍ତ ଦାସ ଓ ଜଗା ପଲାଇଙ୍କ ସହ ଗାୟକ ରାମ ବେହେରା ମା ଗଜଲକ୍ଷ୍ମୀଙ୍କ ସଙ୍ଗୀତ ଗାନ କରିଥିଲେ। ଏହି ପୂଜା ଦୀର୍ଘ ତିରିଶି ବର୍ଷରୁ ଉର୍ଦ୍ଧ ହେବ ବଡ଼ ବଜାର ବଣିକ ସଂଘ ପକ୍ଷରୁ ଆୟୋଜିତ ହେଉଥିବା ସଙ୍ଘ ପକ୍ଷରୁ କୁହାଯାଇଛି। ଏହାକୁ ସଂଘ ସମ୍ପାଦକ କାହ୍ନୁ ଚରଣ ପଣ୍ଡା, କୋଷାଧକ୍ଷ ଜି ରାମଦାସ ରେଡି, ରମେଶ ମହାପାତ୍ର, ଦେବଦାସଙ୍କ ସମେତ ସଂଘ ସଦସ୍ୟମାନେ ପରିଚାଳନା କରୁଛନ୍ତି । ଶନିବାର ମା’ ଗଜଲକ୍ଷ୍ମୀଙ୍କ ଅସ୍ଥାୟୀ ପୂଜା ମଣ୍ଡପ ସମ୍ମୁଖରେ ଭଜନ ସମାରୋହ ଅନୁଷ୍ଠିତ ହୋଇଥିଲା l ପ୍ରତ୍ୟେକ ଦିନ ପରିଚାଳନା କମିଟି ପକ୍ଷରୁ ଅନ୍ନ ପ୍ରସାଦର ବ୍ୟବସ୍ଥା କରାଯାଇଥିଲା ।
