କାଳୀପୂଜା ପାଇଁ ଭଦ୍ରକର ଅଧିଷ୍ଠାତ୍ରୀ ଦେବୀ ମା’ ଭଦ୍ରକାଳୀଙ୍କ ପୀଠ ଚଳଚଞ୍ଚଳ ହୋଇଉଠିଛି। ପ୍ରସ୍ତୁତି ଚୂଡ଼ାନ୍ତ ହେବା ସହ ପୀଠର ପରିବେଶ ଆକର୍ଷଣୀୟ ହୋଇଛି। ଏଠାକାର କାଳୀପୂଜା ଗଣପର୍ବରେ ପରିଣତ ହୋଇଛି। ଆଉ ଭଦ୍ରକାଳୀଙ୍କ ପୀଠରେ ହେଉଥିବା ପୂଜାର ଆକର୍ଷଣ ନିଆରା। ଭଦ୍ରକ ବ୍ଲକର ଖଣ୍ଡତରା ପଞ୍ଚାୟତ ଆହାରପଦା ଭଦ୍ରକାଳୀ ସାହିରେ ବିଶ୍ୱମାତା ରୂପରେ ମା’ ପୂଜା ପାଇଆସୁଛନ୍ତି। ଅନେକ ଜନଶ୍ରୁତି ଓ କିମ୍ବଦନ୍ତୀ ଏହି ପୀଠର ମହିମାକୁ ବହୁଗୁଣିତ କରିଛି। ଦୀପାବଳିଠାରୁ ପୀଠରେ ହେବ ସ୍ବତନ୍ତ୍ର ନୀତିକାନ୍ତି। ସାତଦିନରେ ସପ୍ତମାତୃକା ବେଶରେ ମା’ ପୂଜା ପାଇବେ। ପ୍ରଥମ ଦିନ ବେଦମାତା, ଦ୍ୱିତୀୟ ଦିନ ମହାକାଳୀ, ତୃତୀୟ ଦିନ ରାଜରାଜେଶ୍ୱରୀ, ଚତୁର୍ଥ ଦିନ ସିଂହବାହିନୀ, ପଞ୍ଚମ ଦିନ ଜଗଦ୍ଧାତ୍ରୀ, ଷଷ୍ଠ ଦିନ ମହାସରସ୍ବତୀ ଓ ସପ୍ତମ ଦିନରେ ମହାଲକ୍ଷ୍ମୀ ବେଶରେ ଦର୍ଶନ ଦେବେ। ଅନ୍ୟବର୍ଷ ପରି ଚଳିତବର୍ଷ ଜଗତ କଲ୍ୟାଣ ଉଦ୍ଦେଶ୍ୟରେ ରବିବାରଠାରୁ ୭ ଦିନ ବ୍ୟାପୀ ମହାଯଜ୍ଞ ଅନୁଷ୍ଠିତ ହେବ।
ରହିଛି ଯେ, ମୟୂରଭଞ୍ଜ ଜିଲାର ମେଘାସନ ପର୍ବତରେ ତାପସ ଋଷି ମା’ଙ୍କୁ ପୂଜାର୍ଚ୍ଚନା କରୁଥିଲେ। ତାଙ୍କର ଦେହାନ୍ତ ପରେ ତାଙ୍କ ଶିଷ୍ୟ ଭଦ୍ରନାଥଙ୍କୁ ଭଦ୍ରକାଳୀ ସ୍ବପ୍ନାକୃତ କରି କହିବା ପରେ ସେ ମା’ଙ୍କୁ ଏଠାରେ ପ୍ରତିଷ୍ଠା କରିଥିଲେ। ପରେ ସ୍ଥାନୀୟ ରାଜା ମନ୍ଦିର ନିର୍ମାଣ କରିବା ସହ ସମ୍ପତ୍ତି ଦାନ କରିଥିଲେ। ପୂଜାର୍ଚ୍ଚନା ପାଇଁ ଆମ ପୂର୍ବଜଙ୍କୁ ସେବାୟତ ଭାବେ ଆଣି ରଖାଇଥିଲେ ବୋଲି ସେବାୟତ ନିରଞ୍ଜନ ଦୀକ୍ଷିତ କହିଛନ୍ତି।
ସାଳନ୍ଦୀ ନଦୀର ଆହାରପଦା ଘାଟରୁ ମାନସିକଧାରୀ ଭକ୍ତମାନେ ଘଟୋତ୍ତଳନ କରି ଶୋଭାଯାତ୍ରାରେ ମଣ୍ଡପରେ ପହଞ୍ଚତ୍ ଘଟ ସ୍ଥାପନ କରିବେ। ପରେ ୨୧ଜଣ ବେଦବିତ୍ ବ୍ରାହ୍ମଣଙ୍କ ଦ୍ୱାରା ମହାଯଜ୍ଞ ଆରମ୍ଭ ହେବ। ମନ୍ଦିର ପ୍ରଶାସନ ପକ୍ଷରୁ ଆଇନଶୃଙ୍ଖଳା ସ୍ଥିତି, ସ୍ବାସ୍ଥ୍ୟ ଓ ପରିମଳ ବ୍ୟବସ୍ଥା, ପାନୀୟଜଳ, ରାସ୍ତାଘାଟ ପରିଷ୍କାର ପରିଚ୍ଛନ୍ନତା, ତୋରଣ ଓ ଆଲୋକ ବ୍ୟବସ୍ଥା ଉପରେ ଅଧିକ ଗୁରୁତ୍ୱ ଦିଆଯାଇଛି। ମା’ଙ୍କ ସପ୍ତମାତୃକା ବେଶ, ମଙ୍ଗଳ ଆଳତି, ନାମ ସଂକୀର୍ତ୍ତନ, ପ୍ରବଚନ, ସପ୍ତଚଣ୍ଡୀ ପାଠ, ଦୀପଯଜ୍ଞ, ପହଡ଼ ଭୋଗ ଓ ଯଜ୍ଞ ମଣ୍ଡପର ସାଜସଜ୍ଜା ନେଇ ସେବାୟତମାନଙ୍କ ପ୍ରସ୍ତୁତି ବୈଠକରେ ଚୂଡ଼ାନ୍ତ କରାଯାଇଛି।
-ରିପୋର୍ଟ: ସନାତନ ରାଉତ, ଭଦ୍ରକ
