ନବରଙ୍ଗପୁର,୧୨।୩(ବି.ପ୍ର.): ନବରଙ୍ଗପୁର ମହିଳା ସ୍ନାତକ ମହାବିଦ୍ୟାଳୟର ଓଡ଼ିଆ ବିଭାଗ ପକ୍ଷରୁ ଶାସ୍ତ୍ରୀୟ ଓଡ଼ିଆ ଭାଷା ଦିବସ ପାଳିତ ହୋଇଯାଇଛି। ଏଥିରେ ଓଡ଼ିଆ ବିଭାଗର ମୁଖ୍ୟ ତଥା ମହିଳା ସ୍ନାତକ ମହାବିଦ୍ୟାଳୟର ଅଧ୍ୟକ୍ଷା ମାଲେଶ୍ବରୀ ସାହୁ ଅଧ୍ୟକ୍ଷତା କରି ଶାସ୍ତ୍ରୀୟ ଓଡ଼ିଆ ଭାଷା ଦିବସର ମହତ୍ତ୍ବ ସମ୍ପର୍କରେ ଅବଗତ କରାଇଥିଲେ। ଆଦର୍ଶ ସ୍ନାତକ ମହାବିଦ୍ୟାଳୟ, ନବରଙ୍ଗପୁରର ଅଧ୍ୟକ୍ଷ ଡ. ରଞ୍ଜନ ବେହେରା ମୁଖ୍ୟ ଅତିଥି ଭାବେ ଯୋଗଦେଇ ଓଡ଼ିଆ ଭାଷାର ଉତ୍ପତ୍ତି, ବିକାଶକ୍ରମ ସହିତ ଶାସ୍ତ୍ରୀୟ ମାନ୍ୟତା ପାଇବା ପଛରେ କ’ଣ ସବୁ ଉଦ୍ଦେଶ୍ୟ ରହିଥିଲା ସେ ସମ୍ପର୍କରେ ସୂଚାଇଥିଲେ। ମହାବିଦ୍ୟାଳୟର ଶିକ୍ଷା ବିଭାଗର ଅଧ୍ୟାପିକା ଡ. ସଂଯୁକ୍ତା ପଣ୍ଡା ଅନ୍ୟତମ ବକ୍ତା ଭାବରେ ଯୋଗଦେଇ ନିଜ ଜନ୍ମଦାତ୍ରୀ ମାଆ, ମାତୃଭୂମି, ମାତୃଭାଷାକୁ ଜଣେ ଖାଣ୍ଟି ଓଡ଼ିଆ ଭାବରେ କିଭଳି ଭଲ ପାଇବା ଆବଶ୍ୟକ ସେ ସମ୍ପର୍କରେ ବୁଝାଇଥିଲେ। ଓଡ଼ିଆ ବିଭାଗର ଛାତ୍ରୀମାନେ ଏହି ଦିବସର ମହତ୍ତ୍ବ ସମ୍ପର୍କରେ ନିଜ ବକ୍ତବ୍ୟ ଉପସ୍ଥାପନ କରିଥିଲେ। ଏଥିରେ ମହାବିଦ୍ୟାଳୟ ଅଧ୍ୟାପକ ବିନୋଦ ବିହାରୀ ପ୍ରଧାନ, ନୃପେନ୍ଦ୍ର ନାଥ ଖୋସ୍ଲା, ଅଧ୍ୟାପିକା ତାଇରା ବେଗମ୍, ଡ. ଏମ୍ ରୋହିଣୀ ରାଣୀ, ତରନୁମ୍ ଆରା ଯୋଗଦେଇଥିଲେ। ଓଡ଼ିଆ ବିଭାଗର ଅନ୍ୟତମ ଅଧ୍ୟାପକ ଲକ୍ଷ୍ମୀକାନ୍ତ ସୌରା କାର୍ଯ୍ୟକ୍ରମ ପରିଚାଳନା କରିଥିଲେ।
