ନୂଆଦିଲ୍ଲୀ,୧୨।୩: ଚଳିତ ଆର୍ଥିକ ବର୍ଷର ପ୍ରାରମ୍ଭରୁ ୨୦୨୩ ମାର୍ଚ୍ଚ ୧୦ ତାରିଖ ସୁଦ୍ଧା ପ୍ରତ୍ୟକ୍ଷ ଟିକସ ସଂଗ୍ରହ ନେଟ୍ ରିଫଣ୍ଡ ପରିମାଣ ବାଦ୍ ଯିବା ପରେ ପ୍ରାୟ ୧୪ (୧୩. ୭୩) ଲକ୍ଷ କୋଟି ଟଙ୍କା ସଂଗ୍ରହ ହୋଇଛି। ଏପରିକି ଗତ ବର୍ଷର ସମାନ ଅବଧି ମଧ୍ୟରେ ନେଟ୍ ସଂଗ୍ରହଠାରୁ ପ୍ରାୟ ୧୭% (୧୬.୭୮%) ବୋଲି ଶନିବାର କେନ୍ଦ୍ରୀୟ ପ୍ରତ୍ୟକ୍ଷ କର ବୋର୍ଡ (ସିବିଡିଟି) ପକ୍ଷରୁ କୁହାଯାଇଛି। ଏପରିକି ଏହି ସଂଗ୍ରହ ମୋଟ ବଜେଟ ଆକଳନର ପ୍ରାୟ ୯୭% (୯୬.୬୭%) ଏବଂ ୨୦୨୨-୨୩ ଆର୍ଥିକ ବର୍ଷର ସଂଶୋଧିତ ପ୍ରତ୍ୟକ୍ଷ ଟିକସ ଆକଳନର ୮୩%(୮୩.୧୯%)ରୁ ଅଧିକ ବୋଲି ସିବିଟିଡି ପକ୍ଷରୁ ସୂଚନା ଦିଆଯାଇଛି। ସେହିଭଳି ଦେଶରେ ସଂଗୃହୀତ ହୋଇଥିବା ପ୍ରତ୍ୟକ୍ଷ ଟିକସ ପରିମାଣରେ ନିରନ୍ତର ଅଭିବୃଦ୍ଧି ଘଟିଛି। ଏପରିକି ଚଳିତ ବର୍ଷ ମାର୍ଚ୍ଚ ୧୦ ସୁଦ୍ଧା ମୋଟ ପ୍ରତ୍ୟକ୍ଷ ଟିକସ ସଂଗ୍ରହ ପରିମାଣ ପ୍ରାୟ ୧୭(୧୬.୬୮) ଲକ୍ଷ କୋଟି ଟଙ୍କାରେ ପହଞ୍ଚତ୍ଛି। ପୂର୍ବ ବର୍ଷର ସମାନ ଅବଧି ମଧ୍ୟରେ ସଂଗୃହୀତ ପ୍ରତ୍ୟକ୍ଷ ଟିକସଠାରୁ ଏହା ପ୍ରାୟ ୨୩%(୨୨.୫୮%) ବୋଲି ସିବିଡିଟି ପକ୍ଷରୁ କୁହାଯାଇଛି। ସେହିପରି ବର୍ତ୍ତମାନ ସୁଦ୍ଧା କର୍ପୋରେଟ ଓ ବ୍ୟକ୍ତିଗତ ଆୟକରର ଅଭିବୃଦ୍ଧି ମୋଟ ରାଜସ୍ବ ସଂଗ୍ରହ ହିସାବରେ ଯଥାକ୍ରମେ ୧୮.୦୮% ଓ ୨୭.୫୭% ବୃଦ୍ଧି ଘଟିଛି। ବିଶେଷକରି ରିଫଣ୍ଡକୁ ଭଲ ଭାବେ ହିସାବ କରିବା ପରେ କର୍ପୋରେଟ ଆୟକରର ନେଟ୍ ଅଭିବୃଦ୍ଧି ୧୩. ୬୨% ଓ ବ୍ୟକ୍ତିଗତ ଆୟକର ୨୦.୦୬ % ଅଭିବୃଦ୍ଧି ହୋଇଛି। ଏପରିକି ଅଗ୍ରିମ ଟିକସ ଆକାରରେ ଟିକସଦାତାଙ୍କଠାରୁ ଯେଉଁ ଅଧିକ ଟିକସ ଆଦାୟ କରାଯାଇଥିଲା ତାହା ରିଫଣ୍ଡ ଆକାରରେ ହିତାଧିକାରୀଙ୍କୁ ଫେରାଯାଇଛି। ଉଲ୍ଲେଖଯୋଗ୍ୟ, ୨୦୨୨ ଏପ୍ରିଲ ୧ ରୁ ୨୦୨୩ ମାର୍ଚ୍ଚ ୧୦ତାରିଖ ମଧ୍ୟରେ ୨. ୯୫ ଲକ୍ଷ କୋଟି ଟଙ୍କା ରିଫଣ୍ଡ ଆକାରରେ ଟିକସଦାତାଙ୍କୁ ଦିଆଯାଇଛି। ପୂର୍ବବର୍ଷ ତୁଳନାରେ ଏହି ରିିଫଣ୍ଡ ପରିମାଣ ୫୯.୪୪% ବୋଲି ସିବିଟିଡି ପକ୍ଷରୁ ସୂଚନା ଦିଆଯାଇଛି।
