ଗୋପ,୬।୯(ଡି.ଏନ୍.ଏ.): ଧନୁଆ ନଦୀର ବନ୍ୟାଜଳ ଏବେ ବି କମି ନ ଥିବାବେଳେ ଗୋପ ବ୍ଲକର ଅଞ୍ଚଳର ଅଧିକାଂଶ ବିପନ୍ନ ପାଣିଘେରରେ ରହିଛନ୍ତି। ଅନ୍ୟପଟେ ସେମାନଙ୍କୁ ଏପର୍ଯ୍ୟନ୍ତ ଠିକ୍ ଭାବେ ରିଲିଫ ସାମଗ୍ରୀ ମିଳି ନ ଥିବାରୁ ତୀବ୍ର ଅସନ୍ତୋଷ ଦେଖାଦେଇଛି। ସରକାର ମୁଣ୍ଡପିଛା ୧ କିଲୋ ଚୁଡ଼ା ବିପନ୍ନଙ୍କୁ ଦେବା ପାଇଁ ନିର୍ଦ୍ଦେଶ ଦେଇଥିବାବେଳେ ବିଭିନ୍ନ ପଞ୍ଚାୟତରେ ପ୍ରାୟ ରାଜ୍ୟ ବାହାରେ ଥିବା ଲୋକଙ୍କ ନାଁରେ ରିଲିଫ ହଡ଼ପ ହେଉଥିବା ଅଭିଯୋଗ ହୋଇଛି। ଫଳରେ ଗ୍ରାମରେ ଥିବା ବିପନ୍ନମାନଙ୍କୁ କମ୍ ପରିମାଣର ରିଲିଫ ମିଳିବାରୁ ଶନିବାର ଅଣ୍ତରା-ଇଚ୍ଛାପୁର ପଞ୍ଚାୟତର ତରଡ଼ାପଡ଼ା ଗାଁର କେତେଜଣ ବିପନ୍ନ ବ୍ଲକରେ ଚୁଡ଼ା ଗୁଡ଼ ଫେରାଇ ଦେଇଛନ୍ତି। ବ୍ଲକର ବନ୍ୟାପ୍ଳାବିତ ଅଞ୍ଚଳ କୁହାଯାଉଥିବା ଗଣେଶ୍ବରପୁର, ରାହାଙ୍ଗଗୋରଡା, ଡଭାର, ନୂଆଖୋଲମରା ଓ ଅଣ୍ତରା-ଇଚ୍ଛାପୁର ପଞ୍ଚାୟତର ଶତାଧିକ ଗାଁ ଧନୁଆ ନଦୀର ବନ୍ୟାଜଳ ଘେରରେ ରହିଛି। ୫/୬ ଦିନ ପରେ ବିପନ୍ନମାନଙ୍କ ପାଇଁ ବ୍ଲକ ପ୍ରଶାସନ ରିଲିଫ ବ୍ୟବସ୍ଥା କରାଇଥିଲେ। ହେଲେ ପ୍ରଶାସନ ଲୋକ ପ୍ରତିନିଧି ଜରିଆରେ ରିଲିଫ ସାମଗ୍ରୀ ବଣ୍ଟନ ବ୍ୟବସ୍ଥା କରିବାରୁ ଅନିୟମିତତା ହୋଇଥିଲା। ଅଣ୍ତରା-ଇଛାପୁର ପଞ୍ଚାୟତର ତରଡ଼ାପଡ଼ା ଗାଁରେ ଅଧିକାଂଶ ଲୋକ ବାହାର ରାଜ୍ୟରେ ରହୁଥିବା ବେଳେ ଶନିବାର ସେମାନଙ୍କ ନାମରେ ରିଲିଫ ବଣ୍ଟନ କରାଯିବାରେ ବିବାଦ ଦେଖା ଦେଇଥିଲା। ଫଳରେ ବିପନ୍ନମାନଙ୍କୁ ମୁଣ୍ଡପିଛା ୧କିଲୋ ବଦଳରେ ୪୦୦ ଗ୍ରାମ ଚୁଡା ଓ ୫୦ ଗ୍ରାମ ଗୁଡ଼ ଦିଆଯିବାରୁ ଅସନ୍ତୁଷ୍ଟ ହୋଇଥିଲେ। ଏ ନେଇ ଶନିବାର ବିପନ୍ନ ମିଳିଥିବା ଚୁଡ଼ା ଓ ଗୁଡକୁ ବ୍ଲକକୁ ଆଣି ଫେରାଇ ଦେବା ସହ ବିଡିଓଙ୍କୁ ଏକ ଅଭିଯୋଗପତ୍ର ଦେଇଛନ୍ତି। ଏ ସମ୍ପର୍କରେ ବିଡିଓ ଦୀପ୍ତିରାଣୀ ଦାସଙ୍କୁ ପଚାରିବାରୁ ଅଭିଯୋଗ ପାଇଥିବାବେଳେ ଖୁବଶୀଘ୍ର ତଦନ୍ତ କରିବେ ବୋଲି କହିଛନ୍ତିି।
