ସୋର, ୨୭ା୧୨(ଡି.ଏନ.ଏ.): ଏକ ବସ୍ ଭିତରେ ଲୁଟ ହୋଇଥିବା ଅଳଙ୍କାର ଶିଶୁଙ୍କ ଡାଇପରରୁ ମିଳିବା ଘଟଣାରେ ଅଟକ ଥିବା ୨ ମହିଳାଙ୍କୁ ସୋମବାର କୋର୍ଟ ଚାଲାଣ କରାଯାଇଛି। ଏହାସହ ୨ ନାବାଳିକାଙ୍କୁ ସୋର ପୋଲିସ ଚାଇଲ୍ଡଲାଇନକୁ ହସ୍ତାନ୍ତର କରିଛି।
ଭଦ୍ରକ ଜିଲା ବାସୁଦେବପୁର ଥାନା ରାଧାବଲ୍ଲଭପୁର ଗ୍ରାମର ବିକ୍ରମକେଶରୀ ମହାନ୍ତିଙ୍କ ସ୍ତ୍ରୀ ଅଞ୍ଜନା ମହାନ୍ତି ଓ ପୁଅ ରବିବାର ପୂର୍ବାହ୍ନରେ ସୋରରୁ ବାସୁଦେବପୁର ଯିବାପାଇଁ ସୋର ବସଷ୍ଟାଣ୍ଡରୁ ଧାମରା ଯାଉଥିବା ମାଣିକ ବସ୍ରେ ଚଢ଼ିଥିଲେ। ବସରେ ପ୍ରବଳ ଭିଡ ଥିବାରୁ ଅଞ୍ଜନା ମହାନ୍ତିଙ୍କର ଲକ୍ଷାଧିକ ଟଙ୍କାର ଅଳଙ୍କାର ଓ କିଛି ଟଙ୍କା ଚୋରି ହୋଇଯାଇଥିଲା। ଅଞ୍ଜନାଙ୍କୁ ଜାମୁଝାଡି ନିକଟରେ ବସ୍ କଣ୍ଡକ୍ଟର ଭଡ଼ା ମାଗିବାରୁ ଅଞ୍ଜନା ଭଡା ଦେବାକୁ ବ୍ୟାଗ ଭିତରେ ଅଳଙ୍କାର ସମେତ ଟଙ୍କା ଥିବା ଛୋଟ ପର୍ସ ଚୋରିହୋଇଥିବା ଜାଣିବାକୁ ପାଇଥିଲେ। ପରେ ଜାମୁଝାଡ଼ିଠାରେ ବସ୍ରୁ ଓହ୍ଲାଇ ଖୋଜାଖୋଜି କରି ଉତ୍ତରେଶ୍ୱର ବସ୍ଷ୍ଟାଣ୍ଡରେ ବସିଥିବା ବନଜାରା ଶିଶୁକୁ ଚିହ୍ନିପାରି ୨ଜଣ ମହିଳା, ଦୁଇ ନାବାଳିକା ଏବଂ ଦୁଇ ଶିଶୁଙ୍କୁ ସୋର ଥାନାକୁ ଆଣି ଏକ ଲିଖିତ ଅଭିଯୋଗ କରିଥିଲେ। ପୋଲିସ ଅଭିଯୋଗକୁ ଭିତ୍ତି କରି ମହିଳା ଓ ଶିଶୁଠାରେ ଖୋଜାଖୋଜି ପରେ ଦୁଇ ଶିଶୁ ପିନ୍ଧିଥିବା ଡାଇପରରୁ ଚୋରି ଅଳଙ୍କାର ବାହାରିବା ସହିତ ଦୁଇ ମହିଳାଙ୍କ ନିକଟରୁ କିଛି ଟଙ୍କା ମିଳିଥିଲା ।
ପୋଲିସ ଏମାନଙ୍କୁ ଅଟକ ରଖି ବିକ୍ରମ ମହାନ୍ତିଙ୍କ ଅଭିଯୋଗ ଅନୁଯାୟୀ ଏକ ମାମଲା(ନଂ. ୫୫୩/୨୨) ରୁଜୁ କରି ତଦନ୍ତ ଆରମ୍ଭ କରିଥିଲା। ତଦନ୍ତ ପରେ ପଶ୍ଚିମ ମେଦିନୀପୁର ଜିଲା ଖଡ଼ଗପୁର ନୟାବସ୍ତି ଗ୍ରାମର ରୁଦ୍ର ସିଂଙ୍କ ସ୍ତ୍ରୀ ମୁଖ ସିଂଙ୍କ ନିକଟରୁ ସୁନା ଜଉ ବଳା ଏକ ହଳ, ସୁନା କାନ ଚେନ ଏକ ହଳ, ସୁନା କାନ ଫୁଲ ଏକ ହଳ, ରୁପା ଗୋଡ଼ ମୁଦି ୨ଟା ସମେତ ୪ ହଜାର ଟଙ୍କା ଏବଂ ଗଡ଼ବେଟା ଜିଲା ଚନ୍ଦ୍ରକଣା ରୋଡ଼ ଗ୍ରାମରରୁଦ୍ର ସିଂଙ୍କ ସ୍ତ୍ରୀ ସୀମା ସିଂଠାରୁ ରୁପା ପାଉଁଜି ଏକ ହଳ, ରୁପା ହାର ଏକ ହଳ, ଏକଟି ସୁନା ଲକେଟ ସମେତ ୭ ହଜାର ଟଙ୍କା ମିଳିଥିଲା। ସୋମବାର ଉଭୟଙ୍କୁ କୋର୍ଟ ଚାଲାଣ କରାଯାଇଛି।
