ବ୍ରହ୍ମପୁର ଅଫିସ,୧ା୧୦: ବ୍ରହ୍ମପୁର ସହରରେ ଚୋରମାନେ ତାଲାବନ୍ଦ ଘରକୁ ଟାର୍ଗେଟ କରୁଛନ୍ତି। ଗୁରୁବାର ବିଳମ୍ବିତ ରାତିରେ ଜଣେ ପୋଲିସ କନଷ୍ଟେବଳଙ୍କ ଘରେ କଳାକନା ବୁଲାଇଛନ୍ତି। ବୈଦ୍ୟନାଥପୁର ଥାନା ଅଧୀନ ସିଦ୍ଧାର୍ଥ ନଗର ଦ୍ୱିତୀୟ ସାରଣୀରେ ରହୁଥିବା କନଷ୍ଟେବଳ ପ୍ରଣତୀ ପଣ୍ଡାଙ୍କ ଅନୁପସ୍ଥିତିର ସୁଯୋଗ ନେଇ ଏକ ଚୋର ଗ୍ୟାଙ୍ଗ ଘର ତାଲା ଭାଙ୍ଗି ୬ ଭରି ସୁନାଗହଣା ଓ ଟଙ୍କା ନେଇ ଯାଇଛନ୍ତି। ଶୁକ୍ରବାର ସକାଳେ ପ୍ରଣତୀ ଘରକୁ ଫେରିବା ପରେ ଘର ତାଲା ଭଙ୍ଗା ଯାଇଥିବା ଦେଖି ପୋଲିସକୁ ଖବର କରିଥିଲେ। ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି। ସାଇଣ୍ଟିଫିକ ଟିମ ଓ ସନ୍ଧାନୀ କୁକୁର ସହାୟତାରେ ତଦନ୍ତ ଜାରି ରହିଛି। ପ୍ରଣତୀ ବ୍ରହ୍ମପୁର ପୋଲିସ ମୁଖ୍ୟାଳୟରେ କନଷ୍ଟେବଳ ଭାବେ କାମ କରନ୍ତି। ସିଦ୍ଧାର୍ଥ ନଗରରେ ସେ ଘର ଭଡ଼ା ନେଇ ରହୁଛନ୍ତି। ଘର ମାଲିକ ଉପର ମହଲାରେ ରହୁଥିବା ବେଳେ ସେ ତଳ ମହଲାରେ ରହୁଛନ୍ତି। ଗୁରୁବାର ଅପରାହ୍ନରେ ସେ ଘରେ ତାଲା ପକାଇ କୌଣସି କାମରେ ଦିଗପହଣ୍ଡି ଯାଇଥିଲେ। ଶୁକ୍ରବାର ଫେରିବାରେ ଘରେ ଆଲମିରା ଭଙ୍ଗା ଯାଇଥିବା ଦେଖିଥିଲେ। ତାଙ୍କର ଗୋଟିଏ ସୁନାହାର, ମଙ୍ଗଳସୁତ୍ର, ଦୁଇ ହଳ କାନଫୁଲ, ୮ଟି ସୁନା ମୁଦି ଓ ୨୦ ହଜାର ଟଙ୍କା ଚୋରି ହୋଇଛି। ସେହିପରି ବଡବଜାର ଥାନା ଅନ୍ତର୍ଗତ ପ୍ରେମନଗର ଷଷ୍ଠ ସାରଣୀରେ ରହୁଥିବା ବି.ରାଜେଶ୍ୱର ରାଓଙ୍କ ତାଲାବନ୍ଦ ଘରେ ମଧ୍ୟ ଚୋରଗ୍ୟାଙ୍ଗ ବୁଧବାର ବିଳମ୍ବିତ ରାତିରେ କଳାକନା ବୁଲାଇଥିଲେ।
