ନୂଆଦିଲ୍ଲୀ,୧୧।୮: ଲୋକ ସଭାକୁ ବୁଧବାର ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ ରଖାଯିବା ପରେ ବାଚସ୍ପତି ଓମ ବିର୍ଲା ଏକ ବୈଠକ କରିଛନ୍ତି। ଏଥିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା, କଂଗ୍ରେସର ଅନ୍ତରୀଣ ଅଧ୍ୟକ୍ଷ ସୋନିଆ ଗାନ୍ଧୀ ଓ କଂଗ୍ରେସ ଏମ୍ପି ଅଧିର ରଞ୍ଜନ ଚୌଧୁରୀ ସାମିଲ ହୋଇଥିଲେ। ଲୋକ ସଭା ସ୍ଥଗିତ ହେବା ପରେ ପ୍ରଧାନମନ୍ତ୍ରୀ ମୋଦି ଓ ଅମିତ ଶାହା ବାଚସ୍ପତି ଓମ ବିର୍ଲାଙ୍କୁ ଭେଟିଥିଲେ। ଏହି ବୈଠକ ବାଚସ୍ପତି ଓମ ବିର୍ଲାଙ୍କ ଚାମ୍ବରରେ ଅନୁଷ୍ଠିତ ହୋଇଥିଲା। ସେହିପରି କଂଗ୍ରେସ ଅନ୍ତରୀଣ ଅଧ୍ୟକ୍ଷ ସୋନିଆ ଗାନ୍ଧୀ ଓ କଂଗ୍ରେସ ନେତା ଅଧୀର ରଞ୍ଜନ ମଧ୍ୟ ବାଚସ୍ପତିଙ୍କୁ ସାକ୍ଷାତକାର କରିଥିଲେ। ଏତଦ୍ ବ୍ୟତୀତ ତୃଣମୂଳ କଂଗ୍ରେସ(ଟିଏମ୍ସି), ଅକାଳୀ ଦଳ, ଓ୍ବାଇଏସ୍ଆରସିପି, ବିଜେଡି ସମେତ ଅନେକ ବିରୋଧୀ ଦଳର ନେତା ମଧ୍ୟ ବାଚସ୍ପତିଙ୍କୁ ଭେଟିବା ପାଇଁ ପହଞ୍ଚିଥିଲେ। ଉକ୍ତ ବୈଠକରେ ଲୋକ ସଭା ବାଚସ୍ପତି ସମସ୍ତ ଦଳର ନେତାମାନଙ୍କୁ ଭବିଷ୍ୟତରେ ଗୃହରେ ଆଲୋଚନା ଏବଂ ସଂଳାପକୁ ଉତ୍ସାହିତ କରିବାକୁ ଅନୁରୋଧ କରିଥିଲେ। ଆଲୋଚନା ଏବଂ ସଂଳାପ ମାଧ୍ୟମରେ ହିଁ ଜନସାଧାରଣଙ୍କ କଲ୍ୟାଣ ହୋଇପାରିବ। କାରଣ ଆଲୋଚନା ଦ୍ୱାରା ହିଁ ଜନସାଧାରଣଙ୍କ ସମସ୍ୟା ଦୂର ହେବ ବୋଲି ଓମ୍ ବିର୍ଲା କହିଛନ୍ତି। ସୂଚନାଯୋଗ୍ୟ, ମୌସୁମୀ ଅଧିବେଶନରେ ବିରୋଧୀଙ୍କ ପ୍ରବଳ ହଟ୍ଟଗୋଳ ଯୋଗୁ ୨ଦିନ ପୂର୍ବରୁ ବୁଧବାର ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ ରଖାଯାଇଛି। ପେଗାସସ ଗୁପ୍ତଚର ମାମଲା, ୩ କେନ୍ଦ୍ରୀୟ କୃଷି ଆଇନ ପ୍ରତ୍ୟାହାର ଦାବି ସହ ଅନ୍ୟ ପ୍ରସଙ୍ଗରେ ବିରୋଧୀଙ୍କ ହୋହାଲ୍ଲା ଯୋଗୁ ଗୃହ ସଠିକ୍ ଭାବେ ଚାଲିପାରି ନ ଥିଲା। ଏଥିଯୋଗୁ ସମଗ୍ର ଅଧିବେଶନରେ ସଦନ କାର୍ଯ୍ୟ ବ୍ୟାହତ ହେବା ସହ ଗୃହକାର୍ଯ୍ୟ କେବଳ ୨୨ପ୍ରତିଶତ ହୋଇଛି ବୋଲି ସୂଚନା ରହିଛି।
