ଭଞ୍ଜନଗର, ୧୯।୯ (ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗରସ୍ଥିତ ଶ୍ରୀ ଜଗନ୍ନାଥ ରିସର୍ଟଠାରେ ଶନିବାର ସନ୍ଧ୍ୟାରେ ଜଗନ୍ନାଥପ୍ରସାଦ ବ୍ଲକର ବରିଷ୍ଠ କର୍ମଚାରୀ ଶେଶାନନ୍ଦ ଆରୁଖଙ୍କ ଜନ୍ମଦିନ ଏକ ସମ୍ପୂର୍ଣ୍ଣ ନିଆରା ଓ ସାରସ୍ୱତ ପରିବେଶ ମଧ୍ୟରେ ପାଳିତ ହୋଇଯାଇଛି। ଏହି ଜନ୍ମଦିନକୁ ଚିରସ୍ମରଣୀୟ କରିବା ଉଦ୍ଦେଶ୍ୟରେ ଲୋହରାଖଣ୍ଡି ସାହିତ୍ୟ ସଂସଦ, ଭଞ୍ଜନଗର ପକ୍ଷରୁ ଏକ ଭବ୍ୟ କବିତା ପାଠୋତ୍ସବର ଆୟୋଜନ କରାଯାଇଥିଲା।
ଏହି ସାରସ୍ୱତ ସମାରୋହରେ ବହୁ କବି, କବୟିତ୍ରୀ, ସାହିତ୍ୟିକ ଓ ସାହିତ୍ୟପ୍ରେମୀ ଯୋଗଦେଇ ଆପଣାର ସ୍ୱରଚିତ କବିତା ପାଠ କରିଥିଲେ। କବିତା ପାଠ ସହ ଗଠନମୂଳକ ସାହିତ୍ୟିକ ଆଲୋଚନା ସମଗ୍ର କାର୍ଯ୍ୟକ୍ରମକୁ ଏକ ଆଧ୍ୟାତ୍ମିକ ଓ ସୃଜନଶୀଳ ଆବହୋୱା ପ୍ରଦାନ କରିଥିଲା।
ଉକ୍ତ ଉତ୍ସବରେ ଶେଶାନନ୍ଦଙ୍କ ଭାଇ ତଥା ଭଞ୍ଜନଗର କ୍ଷୁଦ୍ର ଜଳସେଚନ ବିଭାଗର ନିର୍ବାହୀ ଯନ୍ତ୍ରୀ ସନ୍ତୋଷ କୁମାର ଆରୁଖ ଅତିଥି ଭାବେ ଯୋଗଦେଇଥିଲେ। ପ୍ରଫେସର କୃତ୍ତିବାସ ବିଶ୍ୱାଳ ସମ୍ମାନିତ ଅତିଥି ଏବଂ ବରିଷ୍ଠ ଲେଖକ ପ୍ରଶାନ୍ତ ମହାନ୍ତି ମୁଖ୍ୟ ବକ୍ତା ଭାବେ ଯୋଗଦେଇ ନିଜର ବକ୍ତବ୍ୟ ରଖିଥିଲେ। ସାହିତ୍ୟ ସଂସଦର ପରିଚାଳନା ସମ୍ପାଦିକା ପ୍ରଭାତୀ ମଞ୍ଜରୀ ବେହେରା କାର୍ଯ୍ୟକ୍ରମଟିକୁ ସୁଚାରୁରୂପେ ପରିଚାଳନା କରିଥିଲେ।
ଜନ୍ମଦିନ ପରି ଏକ ବ୍ୟକ୍ତିଗତ ଉତ୍ସବକୁ କେବଳ ଆଡ଼ମ୍ବର ମଧ୍ୟରେ ସୀମିତ ନରଖି ସାହିତ୍ୟ ଓ ସୃଜନଶୀଳତା ସହ ଯୋଡ଼ିବାର ଏହି ପ୍ରଶଂସନୀୟ ପ୍ରୟାସକୁ ଉପସ୍ଥିତ ସାହିତ୍ୟପ୍ରେମୀମାନେ ଭୂୟସୀ ପ୍ରଶଂସା କରିଥିଲେ। କବି ବିମ୍ବାଧର ଷଡ଼ଙ୍ଗୀ ଓ ଚନ୍ଦନ ବାଡତ୍ୟା କାର୍ଯ୍ୟକ୍ରମକୁ ସଂଯୋଜନା କରିଥିଲେ। ଏହି ଅବସରରେ ସଂସଦର କାର୍ଯ୍ୟକାରୀ ସଭାପତି ପ୍ରଦୀପ ସ୍ୱାଇଁ, ସଭାନେତ୍ରୀ ଡ. ସଂଯୁକ୍ତା ପଣ୍ଡା, ସମ୍ପାଦକ ଚିନ୍ମୟ କୁମାର ବେବର୍ତ୍ତା ଏବଂ ଶିକ୍ଷୟତ୍ରୀ କଳ୍ପନା ପ୍ରଧାନଙ୍କ ସମେତ ଅନେକ ଗଣ୍ୟମାନ୍ୟ ବ୍ୟକ୍ତି ଉପସ୍ଥିତ ଥିଲେ।
