ପାଣିକୋଇଲି,୨ା୯(ଡି.ଏନ.ଏ.): ପାଣିକୋଇଲି ଥାନା ଅନ୍ତର୍ଗତ ୧୬ ନମ୍ବର ଜାତୀୟ ରାଜପଥ କଡ଼ରେ ଥିବା ଏକ ଲଜ୍ରେ ଦେହ ବ୍ୟବସାୟ ଚାଲୁଥିବା ଖବର ପାଇ ପୋଲିସ ବୁଧବାର ସକାଳେ ଚଢ଼ାଉ କରିଥିବାବେଳେ ତାହାକୁ ସିଲ୍ କରିଛି। ଏଥିସହିତ ଗୁରୁବାର ଜଣେ ଗ୍ରାହକ, ମାଲିକ, କର୍ମଚାରୀ ଓ ସହଯୋଗୀଙ୍କୁ ମିଶାଇ ମୋଟ୍ ୬ ଜଣଙ୍କୁ ଗିରଫ କରି କୋର୍ଟଚାଲାଣ କରିଛି। ଗ୍ରାହକ କୋରେଇ ଥାନା ଅନ୍ତର୍ଗତ ବରୁଣ୍ଡାଇ ଉତ୍ତର ଖଜିରା ଗ୍ରାମର ମାନସ ମିଶ୍ର (୩୮), ଲଜ୍ ମାଲିକ ସୋତି ଗ୍ରାମର ଚନ୍ଦ୍ରକାନ୍ତ ଖଣ୍ଡାଇ(୪୧), କର୍ମଚାରୀ କେନ୍ଦ୍ରାପଡ଼ା ଜିଲା କଳପଡ଼ା ଗ୍ରାମର ଅଭୟ ସାହୁ (୫୧), ଗୋଳେଇପୁର ପଞ୍ଚାୟତ ମିର୍ଜାପୁର ଗ୍ରାମର ରଞ୍ଜନ ମଳିକ(୨୬), ସହଯୋଗୀ କେଳାଗଡିଆ ଗ୍ରାମର ଦେବାଶିଷ ମଲିକ(୨୦) ଓ ଭଦ୍ରକ ଜିଲା ଧାମନଗର ଥାନା ନୃସିଂହ ପ୍ରସାଦ ଗ୍ରାମର ହେମନ୍ତ କୁମାର ପ୍ରଧାନ(୩୫)। ଜାମିନ ନାମଞ୍ଜୁର ହେବାରୁ ସେମାନଙ୍କୁ ରଗଡ଼ିସ୍ଥିତ ଯାଜପୁରରୋଡ୍ ଉପକାରାଗାରକୁ ପଠାଇ ଦିଆଯାଇଛି।
ବୁଧବାର ପୋଲିସ ଚଢ଼ାଉ କରିବାବେଳେ ଜଣେ ଦେହଜୀବୀ ସହ ଜଣେ ଗ୍ରାହକଙ୍କୁ ଧରି ଥାନାକୁ ଆଣିଥିଲା। ପରେ ଅଧିକ ତଦନ୍ତ ନିମନ୍ତେ ଲଜର ଦୁଇ କର୍ମଚାରୀଙ୍କ ସମେତ ମାଲିକଙ୍କୁ ଥାନାକୁ ଡାକି ତଦନ୍ତ ପରିସରଭୁକ୍ତ କରିଥିଲା। ସନ୍ଧ୍ୟାରେ ସାଇଣ୍ଟିଫିକ୍ ଟିମ୍ ଦ୍ୱାରା ଥାନାଧିକାରୀ ଚିନ୍ମୟୀ ବେହେରା ଘଟଣାସ୍ଥଳରେ ପହଞ୍ଚତ୍ ତଦନ୍ତ କରିଥିଲେ। ପରେ ମାଜିଷ୍ଟ୍ରେଟ୍ ବ୍ୟାସନଗର ଅତିରିକ୍ତ ତହସିଲଦାର ବିକ୍ରମ କୁମାର ମଲ୍ଲିକଙ୍କ ଉପସ୍ଥିତିରେ ଲଜ୍କୁ ସିଲ୍ କରାଯାଇଥିଲା। ଦେହଜୀବୀଙ୍କ ସୂଚନା ମୁତାବକ ପୁଣି ରାତିରେ ଦୁଇ ଜଣଙ୍କୁ ପୋଲିସ ଉଠାଇ ଆଣିବା ସହ ଫୁଲବାଣୀ ଅଞ୍ଚଳର ଉକ୍ତ ଦେହଜୀବୀଙ୍କୁ ସ୍ବଧାର ଗୃହରେ ଛାଡିଥିଲା। ଲଜ୍ରେ ବେଆଇନ କାର୍ଯ୍ୟ ଚାଲୁ ରହିଥିବା ଓ ଲଜ ନିମନ୍ତେ କୌଣସି ଅନୁମତି ନ ଥିବା ପୋଲିସ ତଦନ୍ତରୁ ଜାଣିଥିଲା। ଏପରିକି କ୍ରମାଗତ ବାହାର ଜିଲାରୁ ଝିଅମାନଙ୍କୁ ଧରି ଗ୍ରାହକମାନେ ଆସୁଥିବା ଘଟଣା ସମ୍ନାକୁ ଆସିଥିଲା। ଏନେଇ ଥାନାରେ ଏକ ମାମଲା ନଂ.୨୦୦/୨୨ ରୁଜୁ କରାଯାଇଛି।
