ବ୍ରହ୍ମବରଦା,୨୪ା୩(ଡି.ଏନ୍.ଏ.): ବ୍ରହ୍ମବରଦା ଥାନା ଅଞ୍ଚଳର ବହୁ ଗ୍ରାମରେ ବେଧଡ଼କ ଭାବେ ଚାଲିଛି ଚୋରା ମଦ କାରବାର। ବିଶେଷକରି ବ୍ରହ୍ମବରଦା ପଞ୍ଚାୟତରେ ୨ ସରକାରୀ ମଦ ଦୋକାନ ଥିବା ସତ୍ତ୍ୱେ ଚୋରା ମଦ ବେପାର ଓ ନିଶା କାରବାର ସହ ମଦ୍ୟପଙ୍କ ସଂଖ୍ୟା ଉଦ୍ବେଗଜନକ ଭାବେ ବୃଦ୍ଧି ପାଇବାରେ ଲାଗିଛି। ଦିନ ଦ୍ୱିପ୍ରହରରେ ବରୁଆଁ-ବାଲିଚନ୍ଦ୍ରପୁର ମୁଖ୍ୟରାସ୍ତାରେ ମଦ୍ୟପଙ୍କ ପ୍ରାଦୁର୍ଭାବ ବଢ଼ିବାରେ ଲାଗିଲାଣି। ଫଳରେ ସ୍କୁଲ୍, କଲେଜର ଛାତ୍ରୀଛାତ୍ରଙ୍କ ସହ ଉକ୍ତ ରାସ୍ତାରେ ଯାତାୟାତ କରୁଥିବା ଝିଅ, ବୋହୂ ତଥା ସାଧାରଣ ଲୋକ ମଦ୍ୟପଙ୍କ ଆକ୍ରୋଶର ଶିକାର ହେଉଛନ୍ତି। ଚୋରା ମଦ ବେପାରୀ ଲାଇସେନ୍ସପ୍ରାପ୍ତ ମଦ ଦୋକାନରୁ ପେଟିପେଟି ମଦ କ୍ରୟ କରି ଆଣି ଗାଁଗୁଡ଼ିକରେ ଚଢ଼ା ଦରରେ ମଦ ବିକ୍ରି କରୁଛନ୍ତି। ଚୋରାମଦ କାରବାର ବିଷୟରେ ଜାଣି ମଧ୍ୟ ପୋଲିସ ଓ ପ୍ରଶାସନ ନିଦବିଷ୍ଣୁ ସାଜିଛି। ମଦ୍ୟପଙ୍କ ପ୍ରାଦୁର୍ଭାବରୁ ସାମାଜିକ ଚଳଣି ବାଧାପ୍ରାପ୍ତ ହେବା ସହିତ କୋମଳମତି ପିଲାଙ୍କ ଉପରେ ଏହାର କୁପ୍ରବାହ ପଡୁଛି। ବିଭିନ୍ନ ସମୟରେ ଅତ୍ୟଧିକ ମଦ୍ୟପାନ କରି ଲୋକଙ୍କ ମୃତ୍ୟୁ ଘଟିଥିବା ଦେଖିବାକୁ ମିଳୁଛି। ସହଜରେ ଘରେଘରେ ଚୋରାମଦ ମିଳୁଥିବାରୁ ଛୋଟଛୋଟ ପିଲାମାନେ ମଧ୍ୟ କୌଣସି ଆନୁଷ୍ଠାନିକ କାର୍ଯ୍ୟ ହେଉ କିମ୍ବା ମେଳା ମଉଚ୍ଛୁକ ମଦ୍ୟ ପାନକୁ ଆପଣାଇ ବିପଦଗାମୀ ହେଉଛନ୍ତି ଏବଂ ଯୁବପିଢ଼ି ପଥଭ୍ରଷ୍ଟ ହେବାରେ ଲାଗୁଛନ୍ତି। ଚୋରା ମଦର କାରବାର ସହ ଜୁଆ ଖେଳକୁ ନେଇ ଏକାଧିକ ପରିବାରରେ ବିଶୃଙ୍ଖଳା ସୃଷ୍ଟି ହେଉଥିବା ଦେଖିବାକୁ ମିଳୁଛି। ସେହିପରି ସରକାରୀ ଦେଶୀ ମଦ ଦୋକାନ ବ୍ରହ୍ମବରଦା ହାଟ ତଥା ଶ୍ମଶାନ ଘାଟଠାରେ ସ୍ଥାପନ କରାଯାଇଛି। ପ୍ରତ୍ୟେକ ଦିନ ଶତାଧିକ ଲୋକେ ହାଟବଜାରଠୁ ଆରମ୍ଭ କରି ସାମଗ୍ରୀ ପାଇଁ ବ୍ରହ୍ମବାରଦା ଉପରେ ନିର୍ଭର କରୁଥିବାରୁ ଏହି ଦେଶୀ ମଦ ଦୋକାନ ପଥଚାରୀଙ୍କ ପାଇଁ ସମସ୍ୟା ସୃଷ୍ଟି କରୁଛି। ଦୋକାନ ପଛପଟେ ୧୦ରୁ ଊର୍ଦ୍ଧ୍ୱ ପରିବାର ରହୁଥିବାରୁ ସେମାନେ ନାନା ସମସ୍ୟାର ସମ୍ମୁଖୀନ ହେଉଛନ୍ତି। ତେଣୁ ଜିଲା ପ୍ରଶାସନ ଓ ପୋଲିସ ଚୋରା ମଦ କାରବାର ବନ୍ଦ କରିବା ସହ ସରକାରୀ ଦେଶୀ ମଦ ଦୋକାନକୁ ଅନ୍ୟତ୍ର ସ୍ଥାନାନ୍ତର କରିବାକୁ ଲୋକେ ଦାବି କରିଛନ୍ତି। ଏ ସମ୍ପର୍କରେ ଥାନା ଅଧିକାରୀ ଏସ୍. ଦାଶରଥି ପାତ୍ରଙ୍କୁ ପଚାରିବାରେ ସେ କହିଛନ୍ତି, ଚୋରାମଦ କାରବାର ସ୍ଥାନରେ ଅତର୍କିତ ଚଢ଼ାଉ କରାଯାଇ ବେପାରୀଙ୍କୁ ଗିରଫ କରାଯାଉଛି। ଆଗକୁ ଚଢ଼ାଉ ଜାରି ରହିବ।
