ଦିଗପହଣ୍ଡି,୨।୮(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ବଡ଼ଡୁମ୍ବୁଳା ପଞ୍ଚାୟତ କୃଷ୍ଣପୁର ଗ୍ରାମରୁ ଅଭାବନୀୟ ଘଟଣା ସାମ୍ନାକୁ ଆସିଛି । ସ୍ଥାନୀୟ ଜଣେ ମହିଳା ଚାଷଜମିରେ କାମ କରୁଥିବା ବେଳେ ବଜ୍ରପାତ ହୋଇଥିଲା । ରବିବାର ଅପରାହ୍ନ ପ୍ରାୟ ସାଢେ ୪ଟାରେ ବଜ୍ରପାତ ଯୋଗୁଁ ଗ୍ରାମର ସାରଥି ଦଳେଇଙ୍କ ସ୍ତ୍ରୀ ସନ୍ତୋଷୀ ଦଳେଇ(୪୦) ଗୁରୁତର ଆହାତ ହୋଇଛନ୍ତି ।
ସନ୍ତୋଷୀ ଗ୍ରାମର ଅନ୍ୟ କିଛି ମହିଳାଙ୍କ ସହ ଜମିରେ ଧାନ ତଳି ରୋଇବା ପାଇଁ ଯାଇଥିଲେ । ସନ୍ତୋଷୀ ଚାଷଜମିରେ କାମ କରୁଥିବା ବେଳେ ପ୍ରବଳ ବର୍ଷା ସହ ଘନ ଘନ ବଜ୍ରପାତ ହୋଇଥିଲା। ବଜ୍ରପାତ ପ୍ରଭାବରେ ସନ୍ତୋଷୀ ଚାଷଜମିରେ ପଡ଼ିଯାଇଥିଲେ । ଆଖପାଖ ଜମିରେ କାମ କରୁଥିବା କିଛି ବ୍ୟକ୍ତି ଦୌଡ଼ି ଆସି ତାଙ୍କୁ ଅଚେତ ଅବସ୍ଥାରେ ଉଦ୍ଧାର କରି ଦିଗପହଣ୍ଡି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ । ସେଠାରେ ଆବଶ୍ୟକ ଚିକିତ୍ସା କରାଯିବା ପରେ ତାଙ୍କ ଅବସ୍ଥା ସ୍ଥିର ଥିବା ଜଣାପଡିଛି ।