ପାଟକୁରା,୧୩ା୮(ରବୀନ୍ଦ୍ର କୁମାର ବାରିକ) କେନ୍ଦ୍ରାପଡ଼ା ଜିଲା ଗରଦପୁର ବ୍ଲକ କୁହାନଗରୀ ହାଇସ୍କୁଲ ଉପରେ ଶନିବାର ବଜ୍ରପାତ ହୋଇଛି ା ଅପରାହ୍ନରେ ଘଟିଥିବା ଏହି ଦୁଃଖଦ ଘଟଣାରେ ୨୦ରୁ ଊର୍ଦ୍ଧ୍ୱ ଛାତ୍ରୀଛାତ୍ର ଗୁରୁତର ହୋଇଛନ୍ତି ା ସେମାନଙ୍କୁ ନିକଟସ୍ଥ ସିଏଚ୍ସିରେ ଭର୍ତ୍ତି କରାଯାଇଛି ା ଗୁରୁତରଙ୍କ ମଧ୍ୟରୁ ଅମ୍ରିତା ପଣ୍ଡା ଓ ଆଦ୍ୟାଶା ଲକ୍ଷ୍ମୀ ସାମଲଙ୍କ ଅବସ୍ଥା ଉଦ୍ବେଗଜନକ ହେବାରୁ କେନ୍ଦ୍ରାପଡ଼ା ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି ା ରିପୋର୍ଟ ଲେଖା ପର୍ଯ୍ୟନ୍ତ ସିଏଚ୍ସିରେ ଥିବା ଛାତ୍ରୀଛାତ୍ର ଚିକିତ୍ସା ପରେ
ଘରକୁ ଫେରିଛନ୍ତି। ଏସମ୍ପର୍କରେ ପ୍ରଧାନ ଶିକ୍ଷକ ସତ୍ୟାନନ୍ଦ ବିଶ୍ୱାଳ ସୂଚନା ଦେଇଛନ୍ତି, ଗୁରୁତର ହୋଇଥିବା ଛାତ୍ରୀଛାତ୍ରମାନେ ଗରଦପୁର ଆଦର୍ଶ ବିଦ୍ୟାଳୟର। ଆଦର୍ଶ ବିଦ୍ୟାଳୟ ନିର୍ମାଣ ଶେଷ ହୋଇ ନ ଥିବାରୁ ୧୫୦ ଛାତ୍ରୀଛାତ୍ର ଏହି ଶିକ୍ଷାନୁଷ୍ଠାନରେ ପଢ଼ୁଛନ୍ତି। ସ୍କୁଲ ନିକଟରେ ୧୧ କେଭିରୁ ଏଲଟି ଲାଇନ ପାଇଁ ଟ୍ରାନଫର୍ମର ବସିଛି। ଅପରାହ୍ନରେ ଏଠାରେ ବଜ୍ରପାତ ହେବାରୁ ଏଲଟି ଲାଇନରେ ଅଧିକ ବିଦ୍ୟୁତ ସରବରାହ ହୋଇ ସ୍କୁଲରେ ଓୟାରିଂ ହୋଇଥିବା ତାର ଜଳି ଯାଇଥିଲା। ଏଥିସହିତ ବଜ୍ରପାତ ଶବ୍ଦରେ ଭୟଭୀତ ହୋଇ ଛାତ୍ରୀଛାତ୍ରମାନେ ଉପରମହଲାରୁ ତଳକୁ ଓହ୍ଲାଇ ପଡିଥିଲେ ା ପ୍ରାୟ ୨୦ରୁ ଊର୍ଦ୍ଧ୍ୱ ଛାତ୍ରୀଛାତ୍ର ଡରି ଯାଇ ଅଚେତ ଅବସ୍ଥାକୁ ଆସି ଯାଇଥିଲେ ା ସେମାନଙ୍କୁ ସିଏଚ୍ସି ଓ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି ା ତେବେ ଏହି ଦୁର୍ଘଟଣାରେ କେହି ପୋଡ଼ି ଆହତ ହୋଇ ନ ଥିବା ପ୍ରଧାନ ଶିକ୍ଷକ କହିଛନ୍ତି ା
