ଖଣ୍ଡପଡ଼ା,୧୬ା୧୦(ସ୍ବ.ପ୍ର.): କରୋନାଜନିତ ଲକ୍ଡାଉନ ଓ ଶଟ୍ଡାଉନ ଯୋଗୁ ଗତ ୭ମାସ ହେଲା ଅଧିକାଂଶ ଲୋକ କାମଧନ୍ଦା ହରାଇଛନ୍ତି। ଏପରି ସମୟରେ ପେଟ ପୋଷିବା ପାଇଁ ଖଣ୍ଡପଡ଼ା ବ୍ଲକ କଣ୍ଟିଲୋ ଅଞ୍ଚଳର କେତେକ ମହିଳା ମାଟି ବ୍ୟବସାୟକୁ ଆଦରି ନେଇଛନ୍ତି।
ଢଳେଇ ଆଲୁମିନିୟମ କାରଖାନା ପାଇଁ ଗୁଣ୍ଡମାଟିର ଆବଶ୍ୟକତା ରହିଛି। ଏଥିରେ ଗରା, ଢାଳ, କରେଇ ଆଦି ସାମଗ୍ରୀ ପାଇଁ ଛାଞ୍ଚ ପ୍ରସ୍ତୁତ କରାଯାଇଥାଏ। ଏହି ମାଟି ଅତୀତରେ ଦକ୍ଷିଣ ଭାରତର ଗୋଦାବରୀ ନଦୀ କୂଳରୁ ଆସୁଥିଲା ଓ କଣ୍ଟିଲୋଠାରେ ପ୍ରଥମ କରି ପ୍ରତିଷ୍ଠିତ ବୃନ୍ଦାବନ ମହାରଣାଙ୍କ ଢଳେଇ ଆଲୁମିନିୟମ କାରଖାନାରେ ଢଳେଇ ଛାଞ୍ଚ କରାଯାଇ ବାସନ ସାମଗ୍ରୀ ତିଆରି ହେଉଥିଲା। ପରବର୍ତ୍ତୀ ସମୟରେ କଣ୍ଟିଲୋ ସମେତ ଗଞ୍ଜାମ, ବାଳକାଟି, ସୁନାଖଳା ଆଦି ସ୍ଥାନରେ ଆଲୁମିନିୟମ ଢଳେଇ କାରଖାନା ପ୍ରତିଷ୍ଠା ହୋଇଛି। ଏଥିପାଇଁ ଆବଶ୍ୟକ ହେଉଥିବା ଗୁଣ୍ଡମାଟିର ପ୍ରସ୍ତୁତି ପ୍ରଣାଳୀ କଣ୍ଟିଲୋ ଅଞ୍ଚଳର କେତେକ ମହିଳା ଓ ଯୁବକଙ୍କୁ ଭଲଭାବେ ଜଣା। ସେମାନେ ମହାନଦୀ ଓ କମେଇ ନଦୀ ପଠାରୁ ମାଟି ସଂଗ୍ରହ କରି ଖରାରେ ଶୁଖିଲା ପରେ ତାକୁ ଗୁଣ୍ଡକରି ସିମେଣ୍ଟ ଜରି ବସ୍ତାରେ ପ୍ୟାକିଂ କରିଥାନ୍ତି। କାରଖାନା ମାଲିକମାନେ ଖର୍ଚ୍ଚାନ୍ତ ହୋଇ ରାଜ୍ୟ ବାହାରୁ ଗୁଣ୍ଡମାଟି ନ ଆଣି ସ୍ଥାନୀୟ ମାଟି ଉପରେ ନିର୍ଭର କରୁଛନ୍ତି। କଣ୍ଟିଲୋର କେତେକ ମହିଳାଙ୍କ ସହ ବୃଦ୍ଧା କାଞ୍ଚନ ଖଟେଇ ମଧ୍ୟ ଏହି କାମରେ ନିୟୋଜିତ ଅଛନ୍ତି। ବ୍ରହ୍ମପୁର, ବୋଇରାଣୀ, ବାଳକାଟି ଅଞ୍ଚଳର କାରଖାନା ମାଲିକ ଗୁଣ୍ଡମାଟି ବସ୍ତା ପ୍ରତି ୧୨୦ ଟଙ୍କାରେ କ୍ରୟକରି ନେଉଛନ୍ତି।
