ଆନନ୍ଦପୁର,୩୧ା୫(ସ୍ବ.ପ୍ର.): କେନ୍ଦୁଝର ଜିଲା ଆନନ୍ଦପୁର ଅତିରିକ୍ତ ଜିଲା ଦୌରାଜଜ୍ଙ୍କ କୋର୍ଟରେ ବୁଧବାର ଏକ ମାମଲାର ବିଚାର କରାଯାଇ ଅଭିଯୁକ୍ତଙ୍କୁ ଆଜୀବନ କାରାଦଣ୍ଡାଦେଶ ହୋଇଛି। ନନ୍ଦିପଦା ଥାନା କେସ୍ ନଂ ୭୩/୨୦୧୯ ତଥା ଏସ୍ଟି କେସ୍ ନଂ ୫୮/୨୦୧୯ର ବିଚାର କରି ୩୧ ଜଣ ସାକ୍ଷୀଙ୍କ ବୟାନକୁ ଆଧାର କରି ଆନନ୍ଦପୁର ଅତିରିକ୍ତ ଜିଲା ଦୌରାଜଜ୍ ପ୍ରଜ୍ୟୋତି ରାଉତ ଅଭିଯୁକ୍ତ ନନ୍ଦିପଦା ଥାନା ଅଣା ଗ୍ରାମର ପ୍ରଦୀପ କୁମାର ମଲ୍ଲିକଙ୍କୁ ଆଜୀବନ କାରାଦଣ୍ଡାଦେଶର ରାୟ ପ୍ରକାଶ କରିଛନ୍ତି। ଦଫା ୩୦୨ ଆଧାରରେ ୧୦ ହଜାର ଜୋରିମାନା ଓ ଦଫା ୨୦୧ ଆଧାରରେ ୫ ହଜାର ଟଙ୍କାର ଜରିମାନାର ଆଦେଶ ଶୁଣାଇଛନ୍ତି।
ସୂଚନାଯୋଗ୍ୟ, ୯ା୮ା୨୦୧୯ରେ ଗ୍ରାମରକ୍ଷୀ ଗୌରାଙ୍ଗ ଚରଣ ଜେନାଙ୍କ ଅଭିଯୋଗ ଆଧାରରେ ନନ୍ଦିପଦା ଥାନାରେ ମାମଲା ଦାୟର ହୋଇଥିଲା। ଅଭିଯୋଗ ଅନୁଯାୟୀ, ଅଭିଯୁକ୍ତ ପ୍ରଦୀପ ଭଲପାଇ ବିବାହ କରିଥିବା ସ୍ତ୍ରୀ ମଧୁସ୍ମିତା ନାୟକ/ମଲ୍ଲିକଙ୍କୁ ମାଡ଼ ମାରି ହତ୍ୟା କରିବା ଏବଂ ଘର ପଛପଟେ ପୋତିଦେଇଥିଲା। ପରେ ସେ ଘଟଣାସ୍ଥଳରୁ ଫେରାର ହୋଇଯାଇଥିଲା। ଘଟଣାର କିଛି ଦିନ ଅନ୍ତରରେ ପୋତାଯାଇଥିବା ମୃତଦେହରୁ ଦୁର୍ଗନ୍ଧ ବାହାରିବାରୁ ଘଟଣାକୁ ନେଇ ଗ୍ରାମରକ୍ଷୀ ନନ୍ଦିପଦା ଥାନାରେ ଅଭିଯୋଗ କରିଥିଲେ। ଏହି ମାମଲାକୁ ସରକାରୀ ଆଇନଜୀବୀ ଅଶ୍ୱିନୀ କୁମାର ମଲ୍ଲିକ ପରିଚାଳନା କରୁଥିଲେ।
