ନୂଆଦିଲ୍ଲୀ, ୧୯ା୧୦: ୨୫ ବର୍ଷ ପରେ ଇଣ୍ଟରପୋଲ ସାଧାରଣ ସଭାର ୯୦ତମ ଅଧିବେଶନ ମଙ୍ଗଳବାର ଜାତୀୟ ରାଜଧାନୀ ନୂଆଦିଲ୍ଲୀର ପ୍ରଗତି ମଇଦାନରେ ଆରମ୍ଭ ହୋଇଛି। ୪ ଦିନ ଧରି ଚାଲିବାକୁ ଥିବା ଏହି ସମ୍ମିଳନୀରେ ୧୯୫ ଦେଶର ପ୍ରତିନିଧି ଯୋଗ ଦେଇଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏଥିରେ ଉଦ୍ବୋଧନ ଦେଇ ଆତଙ୍କବାଦ, ଡ୍ରଗ୍ସ ଚାଲାଣ, ସାଇବର ଅପରାଧ ଏବଂ ବେଆଇନ କାର୍ଯକଳାପ ରୋକିବା ଉପରେ ଗୁରୁତ୍ୱ ଦେଇଛନ୍ତି। ଆତଙ୍କବାଦ ଶେଷ କରିବା ପାଇଁ ବିଶ୍ୱ ସମୁଦାୟ ଏକଜୁଟ ହେବା ଜରୁରୀ। କୌଣସି ଗୋଟିଏ ସ୍ଥାନ ଯେପରି ଆତଙ୍କବାଦୀଙ୍କ ସ୍ବର୍ଗ ନ ପାଲଟେ ତାହା ସୁନିଶ୍ଚିତ କରିବା ସମସ୍ତଙ୍କ ଦାୟିତ୍ୱ। କେବଳ ଆଞ୍ଚଳିକ ସ୍ତରରେ ବୈଶ୍ୱିକ ବିପଦର ମୁକାବିଲା କରାଯାଇପାରିବ ନାହିଁ। ସମାଜର ମଙ୍ଗଳ ପାଇଁ ବିଶ୍ୱ ସମୁଦାୟର ସହଯୋଗ ଲୋଡ଼ା ବୋଲି ମୋଦି କହିଥିଲେ। ଏଥିସହ ଦୁର୍ନୀତି, ଆର୍ଥିକ ଅପରାଧ ମଧ୍ୟ ଅନେକ ଦେଶ ପାଇଁ ଏକ ବଡ଼ ଚ୍ୟାଲେଞ୍ଜ ପାଲଟିଛି। ଜଳବାୟୁ ପରିବର୍ତ୍ତନ, କରୋନା ମହାମାରୀ ଭଳି ବୈଶ୍ୱିକ ବିପଦବେଳେ ଭାରତର ପଦକ୍ଷେପ ଏହା ଦର୍ଶାଉଛି ଯେ ଆମେ ଯେ କୌଣସି ବିପର୍ଯ୍ୟୟର ମୁକାବିଲା ନିମନ୍ତେ ନେତୃତ୍ୱ ନେବା ପାଇଁ ଦକ୍ଷ ଏବଂ ଇଚ୍ଛୁକ।
ମହାସଭାରେ ପାକିସ୍ତାନ ଫେଡେରାଲ ଇନ୍ଭେଷ୍ଟିଗେଶନ ଏଜେନ୍ସି (ଏଫ୍ଆଇଏ) ମୁଖ୍ୟ ମୋହସିନ୍ ହାସନ ବଟ୍ଟ ଯୋଗ ଦେଇଥିଲେ। ପ୍ରଧାନମନ୍ତ୍ରୀ ମୋଦିଙ୍କ ଉଦ୍ବୋଧନ ଶେଷ ହେବା ପରେ ଗଣମାଧ୍ୟମ ପ୍ରତିନିଧିମାନେ ମୋହସିନ୍ଙ୍କୁ ୧୯୯୩ ମୁମ୍ବାଇ ଆତଙ୍କବାଦୀ ଆକ୍ରମଣର ମାଷ୍ଟରମାଇଣ୍ଡ ଦାଉଦ୍ ଇବ୍ରାହିମ୍ଙ୍କୁ ନେଇ ପ୍ରଶ୍ନ କରିଥିଲେ। ଜାତିସଂଘ ଦ୍ୱାରା ଆତଙ୍କବାଦୀ ଘୋଷିତ ଦାଉଦ୍ଙ୍କୁ ପାକିସ୍ତାନ ଭାରତକୁ ହସ୍ତାନ୍ତର କରିବ କି ବୋଲି ସେମାନେ ପଚାରିଥିଲେ। ଏଥିସହ ଜୈଶ-ଇ-ମହମ୍ମଦ ମୁଖ୍ୟ ମାଶୁଦ ଆଝାର, ୯/୧୧ ମାଷ୍ଟରମାଇଣ୍ଡ ହାଫିଜ୍ ସଇଦଙ୍କୁ ହସ୍ତାନ୍ତର କରିବା ଉପରେ ପ୍ରଶ୍ନ କରିଥିଲେ। ହେଲେ ଏହା ଉପରେ ମୋହସିନ୍ ନିଜ ଆଙ୍ଗୁଠିକୁ ଓଠ ଉପରେ ରଖି (ନୀରବ ରହିବାକୁ ଇଙ୍ଗିତ କରି) ସେଠାରୁ ଚାଲିଯାଇଥିଲେ।
