ନୂଆଦିଲ୍ଲୀ,୧୬ା୨: ଆତଙ୍କବାଦୀ କାର୍ଯ୍ୟକଳାପର ମାଷ୍ଟରମାଇଣ୍ଡଙ୍କୁ ସେମାନଙ୍କ କାର୍ଯ୍ୟ ଲାଗି ବିଶ୍ୱ ଉତ୍ତରଦାୟୀ କରିବା ଆବଶ୍ୟକ ବୋଲି ଜାତିସଂଘରେ ଭାରତ ଦାବି କରିଛି। ସେମାନେ ନିଜକୁ ଆତଙ୍କବାଦର ଶିକାର ବୋଲି ଚିତ୍ରଣ କରି ଅନ୍ତର୍ଜାତୀୟ ସମୁଦାୟଙ୍କୁ ବିଭ୍ରାନ୍ତ କରିବାକୁ ଦିଆ ନ ଯିବା ମଧ୍ୟ ଅନୁରୂପ ଗୁରୁତ୍ୱପୂର୍ଣ୍ଣ ବୋଲି ଭାରତ କହିଛି।
୨୦୦୮ ମୁମ୍ବାଇ ଆତଙ୍କବାଦୀ ଆକ୍ରମଣ, ୨୦୧୬ର ପଠାନକୋଟ ଆକ୍ରମଣ ଏବଂ ୨୦୧୯ର ପୁଲ୍ଓ୍ବାମା ଆକ୍ରମଣକୁ ସାରା ବିଶ୍ୱ ଦେଖିଛି। ଏହି ଅପରାଧୀମାନେ କେଉଁଠୁ ଆସିଥିଲେ, ତାହା ମଧ୍ୟ ସମସ୍ତେ ଜାଣନ୍ତି ବୋଲି ଜାତିସଂଘରେ ପାକିସ୍ତାନକୁ ଟାର୍ଗେଟ କରି ଭାରତର ସ୍ଥାୟୀ ମିଶନର କାଉସେଲର ରାଜେଶ ପରିହାର କହିଛନ୍ତି। ଅତ୍ୟନ୍ତ ପରିତାପର ବିଷୟ ଯେ, ଯେଉଁମାନେ ଏହିସବୁ ଆକ୍ରମଣ ଘଟାଇଥିଲେ, ସେମାନେ ଉକ୍ତ ରାଷ୍ଟ୍ରର ସମର୍ଥନ ଓ ଆତିଥେୟତା ପାଇଆସୁଛନ୍ତି। ଠିକ୍ ୩ ବର୍ଷ ପୂର୍ବେ ୨୦୧୯ ଫେବୃୟାରୀ ୧୪ରେ ଜମ୍ମୁ-କଶ୍ମୀରର ପୁଲ୍ଓ୍ବାମାରେ ଜୈଶ୍-ଇ-ମହମ୍ମଦ (ଜେଇଏମ୍) ଆତଙ୍କବାଦୀଙ୍କ ବିସ୍ଫୋରଣରେ ୪୦ ସିଆର୍ପିଏଫ୍ ଯବାନ ଶହୀଦ ହୋଇଥିଲେ। ସୋମବାର ଜାତିସଂଘର ଆତଙ୍କବାଦ ନିରୋଧୀ କମିଟିର ଖୋଲା ଆଲୋଚନାରେ ରାଜେଶ ଉପରୋକ୍ତ ମନ୍ତବ୍ୟ ରଖିଥିଲେ। ଆକ୍ରମଣରେ ମୃତକମାନଙ୍କ ପରିବାରକୁ ଏପର୍ଯ୍ୟନ୍ତ ନ୍ୟାୟ ମିଳିଲା ନାହିଁ। ଅନ୍ୟ ପକ୍ଷରେ ଅପରାଧୀ, ସେମାନଙ୍କୁ ପ୍ରେରଣ କରିଥିବା ଏବଂ ଅର୍ଥ ଯୋଗାଇଥିବା ବ୍ୟକ୍ତିମାନେ ମୁକ୍ତ ଭାବରେ ବୁଲୁଛନ୍ତି ଏବଂ ରାଷ୍ଟ୍ର ସମର୍ଥନ ଓ ଆତିଥେୟତା ଉପଭୋଗ କରୁଛନ୍ତି ବୋଲି ପାକିସ୍ତାନର ନଁା ନ ନେଇ ରାଜେଶ କହିଛନ୍ତି। ଜାତିସଂଘ ୧୫୦ରୁ ଊର୍ଦ୍ଧ୍ୱ ସଂଗଠନ ଓ ଏହାର ନେତାଙ୍କୁ ଆତଙ୍କବାଦୀ ତାଲିକାରେ ସାମିଲ କରିଛି। ଏହି କୁଖ୍ୟାତ ଆତଙ୍କବାଦୀ ନେତାଙ୍କୁ ଶହୀଦ ଆଖ୍ୟା ଦିଆଯାଉଛି। ନିକଟରେ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ ଅଲ୍-କାଏଦାର ନିହତ ନେତା ଓସାମା ବିନ୍ ଲାଡେନଙ୍କୁ ଶହୀଦ ବୋଲି କହିଥିଲେ। ଆତଙ୍କବାଦ ସୃଷ୍ଟିର କେନ୍ଦ୍ରସ୍ଥଳ ବିରୋଧରେ ଅବିଳମ୍ବେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଲାଗି ଭାରତ ଅନ୍ତର୍ଜାତୀୟ ସମୁଦାୟଙ୍କୁ ଆହ୍ବାନ ଦେଇଛି।
