ଅମରାବତୀ, ୧୯।୧୧: ଆନ୍ଧ୍ରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ତଥା ତେଲୁଗୁଦେଶମ୍ ପାର୍ଟି (ଟିଡିପି) ନେତା ଏନ୍. ଚନ୍ଦ୍ରାବାବୁ ନାଇଡୁ ଶୁକ୍ରବାର ରାଜ୍ୟ ବିଧାନସଭାରୁ କକ୍ଷତ୍ୟାଗ କରିବା ସମୟରେ କାନ୍ଦି ପକାଇଥିଲେ। ଶାସକ ଓ୍ବାଇଏସ୍ଆର୍ କଂଗ୍ରେସ ପାର୍ଟି ସଦସ୍ୟମାନଙ୍କ ଅପମାନଜନକ ମନ୍ତବ୍ୟରେ କ୍ଷୁବ୍ଧ ଚନ୍ଦ୍ରାବାବୁ ବିଧାନସଭାକୁ ତାଙ୍କ କାର୍ଯ୍ୟକାଳର ଅବଶିଷ୍ଟ ସମୟ ପାଇଁ ଆଉ ଆସିବେ ନାହିଁ ବୋଲି ପ୍ରତିଜ୍ଞା କରିଛନ୍ତି। ମୁଖ୍ୟମନ୍ତ୍ରୀ ହେବା ପରେ ସେ ଗୃହକୁ ଫେରିବେ ବୋଲି ୭୧ ବର୍ଷୀୟ ଟିଡିପି ନେତା କହିଛନ୍ତି। ବିଧାନସଭା ଶୀତ ଅଧିବେଶନରେ ଦ୍ୱିତୀୟ ଦିନ ପାଇଁ ମହିଳା ସଶକ୍ତିକରଣ ଉପରେ ଆଲୋଚନା ଚାଲିଥିବାବେଳେ ଶାସକ ଦଳର କେତେଜଣ ସଦସ୍ୟ ତାଙ୍କ ସ୍ତ୍ରୀଙ୍କୁ ଆକ୍ଷେପ କରି ଅପମାନଜନକ ମନ୍ତବ୍ୟ ଦେଇଥିଲେ।
ଟିଡିପି ମୁଖ୍ୟାଳୟଠାରେ ଖବରଦାତା ସମ୍ମିଳନୀକୁ ଉଦ୍ବୋଧନ ଦେବା ବେଳେ ଚନ୍ଦ୍ରାବାବୁ କାନ୍ଦିବା ସହ କିଛି ସମୟ ମୁହଁକୁ ହାତରେ ଘୋଡ଼ାଇ ରଖିଥିଲେ ଓ କିଛି କହିପାରି ନ ଥିଲେ। ସେ କହିଥିଲେ, ତାଙ୍କ ସ୍ତ୍ରୀ କଦାପି ରାଜନୀତିରେ ନାହାନ୍ତି। ସେ କ୍ଷମତାରେ ଥାଆନ୍ତୁ କି ନ ଥାଆନ୍ତୁ ସ୍ତ୍ରୀ କେବେ ବି ରାଜନୀତିରେ ହସ୍ତକ୍ଷେପ କରି ନ ଥାନ୍ତି। ତଥାପି ଶାସକ ଦଳ ସଦସ୍ୟ ତାଙ୍କ ସ୍ତ୍ରୀଙ୍କୁ ନେଇ ଅପମାନଜନକ ମନ୍ତବ୍ୟ ଦେଉଛନ୍ତି। ନିଜ ୪୦ ବର୍ଷର ରାଜନୈତିକ କ୍ୟାରିୟର ମଧ୍ୟରେ ସେ କେବେ ଏଭଳି ଅପମାନିତ ହୋଇ ନ ଥିଲେ ବୋଲି ଚନ୍ଦ୍ରାବାବୁ କହିଛନ୍ତି।
