ସୋରଡ଼ା,୨୭। ୭(ଡି.ଏନ୍.ଏ.): ଗଞ୍ଜାମ ଜିଲା ସୋରଡ଼ା ବିଧାୟକ ପୂର୍ଣ୍ଣଚନ୍ଦ୍ର ସ୍ବାଇଁଙ୍କ ବାପାଙ୍କ ଶ୍ରାଦ୍ଧ ଦିବସ ଉପଲକ୍ଷେ ସୋମବାର ପୈତୃକ ଗ୍ରାମରେ ଜୀବନ ବିନ୍ଦୁ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଏଥିରେ ବ୍ରହ୍ମପୁର ବ୍ଲଡ ବ୍ୟାଙ୍କର ଡାକ୍ତରୀ ଦଳ ୫୦୧ ୟୁନିଟ ରକ୍ତ ସଂଗ୍ରହ କରିଥିଲେ। ଶ୍ରାଦ୍ଧ ଦିବସରେ ହନୁମାନ ଚାଳିଶା ପାଠ, ବେଦ ପାଠ ହୋଇଥିବା ବେଳେ ସୋରଡ଼ା ବ୍ଲକର ୨୬ ପଞ୍ଚାୟତରୁ ଜନସାଧାରଣ ଯୋଗଦେଇଥିଲେ। ତେବେ ସେଠାରେ କୋଭିଡ୍ ନିୟମ ଉଲ୍ଲଂଘନ କରି ଶତାଧିକ ଲୋକଙ୍କ ଭିଡ଼ ଜମିଥିବା ନେଇ କେତେକ ଗଣମାଧ୍ୟମରେ ଚର୍ଚ୍ଚା ଚାଲିଥିବା ବେଳେ ବିଜେଡି ବ୍ଲକ ସଭାପତି ବସନ୍ତ ସ୍ବାଇଁ ଏହାକୁ ଖଣ୍ଡନ କରିଛନ୍ତି। ଯେଉଁମାନେ ରକ୍ତଦାନ କରିବାକୁ ଆସିଥିଲେ ସେମାନଙ୍କ ପାଇଁ ପ୍ରସାଦ ସେବନ ବ୍ୟବସ୍ଥା କରାଯାଇଥିଲା ଏବଂ ଶିବିରରେ କୋଭିଡ୍ ନିୟମକୁ ପାଳନ କରାଯାଇଥିଲା ବୋଲି ସେ କହିଛନ୍ତି। ଏ ସମ୍ପର୍କରେ ବିଧାୟକ ପୂର୍ଣ୍ଣଚନ୍ଦ୍ର ସ୍ବାଇଁଙ୍କୁ ପଚାରିବାରୁ ଶିବିରରେ ୫୦୧ ଲୋକ ରକ୍ତଦାନ କଲେ ଏବଂ ଶିବିର ପରିଚାଳନା ପାଇଁ କିଛି ଖାଦ୍ୟ ବ୍ୟବସ୍ଥା କରାଯାଇଥିଲା। ଏହି ସମୟରେ ଗ୍ରାମରେ ଅନ୍ୟ ଜଣେ ବ୍ୟକ୍ତିଙ୍କର ଭୋଜି ଚାଲିଥିଲା। ସେ ଭୋଜିରେ କ’ଣ ହୋଇଥିବ ଆମେ ଜାଣିନୁ। କିନ୍ତୁ ଆମେ ଶିବିରରେ କୋଭିଡ୍ ନିୟମ ପାଳନ କରି ରକ୍ତଦାନ ସମ୍ପାଦନ କରିଥିଲୁ ବୋଲି ସେ କହିଛନ୍ତି।
