କଣାସ,୨୯ା୯(ସ୍ବ.ପ୍ର.): ପୁରୀ ଜିଲା କଣାସ ବ୍ଲକ ଅଧୀନ ଗଡ଼ସାନପୁଟ ପଞ୍ଚାୟତର ଚଉଦମୌଜା ବିଦ୍ୟୁତ୍ ସ୍ନାତକ ମହାବିଦ୍ୟାଳୟରେ ଜଣେ ଓଡ଼ିଆ ଅଧ୍ୟାପକ ସ୍ନାତକ (ବି.ଏ.) ପାସ୍ ନ କରି ସ୍ନାତକୋତ୍ତର (ଏମ୍.ଏ) ପାସ୍ ସାର୍ଟିଫିକେଟ୍ ଦେଇ ଦୀର୍ଘଦିନ ହେଲା କାର୍ଯ୍ୟ କରୁଥିବା ଅଭିଯୋଗ ହେଉଛି। ସେ ଜାଲ୍ ପ୍ରମାଣପତ୍ର ବଳରେ ଏଭଳି ନିଯୁକ୍ତି ପାଇଥିବା ଜଣାପଡ଼ିଛି। ସମ୍ପ୍ରତି ସୂଚନା ଅଧିକାର ବଳରେ ଏହି ତଥ୍ୟ ସାମ୍ନାକୁ ଆସିଛି।
ସମ୍ପୃକ୍ତ ଅଧ୍ୟାପକ ଖୋର୍ଦ୍ଧାସ୍ଥିତ ପ୍ରାଣନାଥ ମହାବିଦ୍ୟାଳୟରେ ୧୯୯୧-୯୨ ମସିହାରେ ବି.ଏ. ଫାଇନାଲ୍ ପରୀକ୍ଷା ଦେଇ ମାଲ୍ପ୍ରାକ୍ଟିସ୍ରେ ଧରା ପଡ଼ିଥିବାବେଳେ ୧୯୯୪ ମସିହାରେ ରୋଲ ନଂ-୨୧୯୦୩ ପି୫୬୯ରେ ଏମ୍ଏ ପାସ୍ କରିଥିବା ସାର୍ଟିଫିକେଟ୍ ଦାଖଲ କରି କାର୍ଯ୍ୟରେ ଯୋଗଦେଇଛନ୍ତି। ଅନ୍ୟପକ୍ଷରେ ବିଏରେ ସେ ମାଲ୍ପ୍ରାକ୍ଟିସ୍ ହୋଇଥିବାବେଳେ ଆଞ୍ଚଳିକ ଉଚ୍ଚଶିକ୍ଷା ନିର୍ଦ୍ଦେଶାଳୟରୁ କିପରି ପ୍ରୋଭିଜିନାଲ ସାର୍ଟିଫିକେଟ୍ ଓ ମାର୍କଶିଟ୍ ଜାଲିଆତି କରି ଏମ୍ଏରେ ନାମ ଲେଖାଇଲେ ତାହା ପ୍ରଶ୍ନବାଚୀ ହୋଇଛି। ଉତ୍କଳ ୟୁନିଭର୍ସିଟିର କୌଣସି କର୍ମଚାରୀ ଏହି ଜାଲିଆତିରେ ସମ୍ପୃକ୍ତ ଥିବା ଅଭିଯୋଗ ହେଉଛି। ସମ୍ପୃକ୍ତ ଅଧ୍ୟାପକଙ୍କର ବିଏ ଫାଇନାଲ ସାର୍ଟିଫିକେଟ୍ ନ ଥିବା ନେଇ ଉତ୍କଳ ୟୁନିଭର୍ସିଟି ପରୀକ୍ଷା ନିୟନ୍ତ୍ରକଙ୍କ କାର୍ଯ୍ୟାଳୟର ଚିଠି ନଂ-୧୬୦୫୯୩ (୧୨) ୮.୪.୨୦୨୨ରେ କାରଣ ଦର୍ଶାଅ ନୋଟିସ୍ ଜାରି କରିଥିଲେ।
ସେହିପରି ପ୍ରାଣନାଥ ମହାବିଦ୍ୟାଳୟ ପକ୍ଷରୁ ସ୍ପଷ୍ଟ କରାଯାଇଛି ଯେ, ସମ୍ପୃକ୍ତ ଅଧ୍ୟାପକଙ୍କୁ କୌଣସି ସାର୍ଟିଫିକେଟ୍ ଓ ମାର୍କସିଟ୍ ଦିଆଯାଇନାହିଁ। ତାଙ୍କୁ ବିଏ ପରୀକ୍ଷାରେ ମାଲ୍ପ୍ରାକ୍ଟିସ୍ କରାଯାଇଥିବା ମହାବିଦ୍ୟାଳୟ କର୍ତ୍ତୃପକ୍ଷ କହିଛନ୍ତି। ସମ୍ପ୍ରତି ସୂଚନା ଅଧିକାର ଆଇନ ବଳରେ ଏହି ତଥ୍ୟ ହସ୍ତଗତ ହୋଇଛି। ଶିକ୍ଷା ବିଭାଗର ଆଞ୍ଚଳିକ ନିର୍ଦ୍ଦେଶକ ଏହାର ତଦନ୍ତ କରିବା ପାଇଁ ଚିଠି ନଂ- ଇ.ସି-୧୧୬୫୯୩ (୧୨) ତା. ୪.୮.୨୦୨୨ରେ ପ୍ରାଣନାଥ କଲେଜ୍ ଅଧ୍ୟକ୍ଷ, ଚଉଦମୌଜା ବିଦ୍ୟୁତ୍ ମହାବିଦ୍ୟାଳୟର ଅଧ୍ୟକ୍ଷ, ଉତ୍କଳ ୟୁନିଭର୍ସିଟିର ସୂଚନା ଅଧିକାରୀ, ଡେପୁଟି କଣ୍ଟ୍ରୋଲର (ପରୀକ୍ଷା) ଏବଂ କୁଳପତିଙ୍କ ସଚିବଙ୍କୁ ନିର୍ଦ୍ଦେଶ ଦେଇଛନ୍ତି। ଏ ସମ୍ପର୍କରେ ଚଉଦମୌଜା ବିଦ୍ୟୁତ୍ ମହାବିଦ୍ୟାଳୟର ଅଧ୍ୟକ୍ଷ ବିଜୟ କୁମାର ସାମନ୍ତରାୟଙ୍କୁ ପଚାରିବାରୁ କହିଛନ୍ତି, ତଦନ୍ତ ପାଇଁ ଉତ୍କଳ ୟୁନିଭର୍ସିଟିରୁ ଚିଠି ଆସିଥିଲା। ମୁଁ ସମସ୍ତ କାଗଜପତ୍ର ୟୁନିଭର୍ସିଟିରେ ଜମା କରିଦେଇଛି। ସେମାନେ ଯାହା ନିଷ୍ପତ୍ତି ନେବେ।
