ବଇଣ୍ଡା, ୬ା୮(ଡି.ଏନ.ଏ.) ଅନୁଗୋଳ ଜିଲା ଆଠମଲ୍ଲିକ ବ୍ଲକ କୁରୁମଟାପ ପଞ୍ଚାୟତର କୁରୁମଟାପ ଛକଠାରୁ ମନ୍ଦରବାହାଳ ପର୍ଯ୍ୟନ୍ତ ମୁଖ୍ୟରାସ୍ତାକୁ ସମ୍ପୂର୍ଣ୍ଣ ପକ୍କା କରାଯାଉ ନାହିଁ। ନିର୍ମାଣ କାର୍ଯ୍ୟ ବେଳେ ୪ ଶହ ମିଟର ଛାଡ଼ି ଦିଆଯାଇଥିବାରୁ ଯାତୟାତରେ ଅସୁବିଧା ଉପୁଜୁଛି। ସେହିପରି ଏକ ନାଳ ଉପରେ ଥିବା କଲଭର୍ଟ ସ୍ଥାନରେ ପୋଲଟିଏ କରା ନ ଯିବାରୁ ବର୍ଷା ବେଳେ ଅସୁବିଧା ହେଉଥିବା ବାଲିପଟା ଗ୍ରାମବାସୀ ବୁଧବାର ଅନୁଗୋଳ ଜିଲାପାଳଙ୍କୁ ଅଭିଯୋଗ କରିଛନ୍ତି।
ଅଭିଯୋଗପତ୍ରରେ ଦର୍ଶାଯାଇଛି, କୁରୁମଟାପରୁ ବାଲିପଟା ଭାୟା ଦାମୋଦରପୁର ଦେଇ ମନ୍ଦରବାହାଳ ପର୍ଯ୍ୟନ୍ତ ୪. ୭୧୦ କିଲୋମିଟର ରାସ୍ତାକୁ ପକ୍କା କରିବା ପାଇଁ ୨୦୧୩ ଏପ୍ରିଲରେ ପ୍ରଧାନମନ୍ତ୍ରୀ ସଡ଼କ ଯୋଜନାରେ କାମ ଆରମ୍ଭ ହୋଇଥିଲା। ଏଥିପାଇଁ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ୨ କୋଟି ୧୬ ଲକ୍ଷ ୭୩ ହଜାର ଟଙ୍କା ମଞ୍ଜୁର ହୋଇଥିଲା। ୨୦୧୪ ମାର୍ଚ୍ଚ ୧୧ରେ କାମ ଶେଷ ହୋଇଥିଲେ ମଧ୍ୟ ରାସ୍ତାର ୪ ଶହ ମିଟରକୁ ପକ୍କା ନ କରାଯାଇ ଛାଡ଼ି ଦିଆଯାଇଛି। ନିର୍ମାଣ ସମୟରେ ମୁଖ୍ୟ ରାସ୍ତାର କିଛି ଜମି ବେସରକାରୀ ଥିବାରୁ ସେତେବେଳେ ବିବାଦ ଦେଖାଦେଇଥିଲା। ହେଲେ ବିଭାଗୀୟ ଅଧିକାରୀମାନେ ଉକ୍ତ ଜମିକୁ ଚିହ୍ନଟ ନ କରି ୪ ଶହ ମିଟର ଛାଡି ପକ୍କା ରାସ୍ତା ଆରମ୍ଭ କରିଦେଇଥିଲେ। ସେହିପରି ଉକ୍ତ ରାସ୍ତାରେ ପଡୁଥିବା ଏକ ନାଳ ଉପରେ ପୋଲଟିଏ ପାଇଁ ଗ୍ରାମବାସୀ ଦାବି କରିଆସୁଥିଲେ ହେଁ ତାହା ନିର୍ମାଣ କରାଗଲା ନାହିଁ। ବର୍ଷା ପରେ କଲଭର୍ଟ ଉପର ଦେଇ ପାଣି ପ୍ରବାହିତ ହେଉଥିବାରୁ ଯାତାୟାତ କଷ୍ଟକର ହୋଇପଡ଼ିଥିବା ସରପଞ୍ଚ ସୁମନ୍ତ ବେହେରା, ଭଗବାନ ସାହୁ, ପୀତବାସ ସାହୁ, ଡିଲେଶ୍ୱର ନାୟକ ପ୍ରମୁଖ ଅଭିଯୋଗ କରିଛନ୍ତି। ଗ୍ରାମ୍ୟ ଉନ୍ନୟନ ବିଭାଗ କନିଷ୍ଠ ଯନ୍ତ୍ରୀ ବସନ୍ତ କୁମାର ବସ୍ତିଆ କୁହନ୍ତି, ମୁଖ୍ୟରାସ୍ତାର ଜାଗା ବିବାଦୀୟ ଥିବାଯୋଗୁ ପକ୍କା ରାସ୍ତା ନିର୍ମାଣ ହୋଇପାରିନାହିଁ। ଅର୍ଥ ଆସିଲେ ସେଠାରେ ପୋଲ ନିର୍ମାଣ କରାଯିବ।
