କୋରାପୁଟ,୧୯ା୬(ସ୍ବ.ପ୍ର.): କୋରାପୁଟ ଜିଲା ଲକ୍ଷ୍ମୀପୁର ବ୍ଲକରେ ଏବେ ଡେଙ୍ଗୁ ଜ୍ୱରରେ ଆକ୍ରାନ୍ତଙ୍କ ସଂଖ୍ୟା ବଢ଼ିବାରେ ଲାଗିଛି। ଡାକ୍ତରଖାନାରେ ସବୁବେଳେ ରୋଗୀଙ୍କ ଭିଡ଼ ଜମୁଛି। କିଛିଦିନ ତଳେ କେତେକ ଲୋକ ଜ୍ୱରରେ ଆକ୍ରାନ୍ତ ଥିଲା ସମୟରେ ଜଣେ ଯୁବତୀ ଓ ଜଣେ ମହିଳାଙ୍କ ମୃତ୍ୟୁ ଘଟିଥିଲା। ଫଳରେ ସାହି ବାସିନ୍ଦାଙ୍କ ମନରେ ଭୟ ଜାତ ହୋଇଥିଲା। ଡେଙ୍ଗୁ ରୋଗ ମାଡୁଛି ବୋଲି ଲୋକେ ଆତଙ୍କିତ ହୋଇପଡ଼ିଥିଲେ। ଖବର ପରେ ଜିଲାସ୍ତରୀୟ ଏକ ଡାକ୍ତରୀ ଦଳ ସହ ଭ୍ରାମ୍ୟମାଣ ଟିମ୍ ସାହି ବସ୍ତିର ଘର ଘର ବୁଲି ପିଇବା ପାଣି ରକ୍ତ ନମୁନା ସଂଗ୍ରହ କରି ନେବା ସହ ଭୂତାଣୁ ଜନିତ ଜ୍ୱର ବୋଲି କହିଥିଲେ। ତଥାପି ଜ୍ୱର ଆକ୍ରାନ୍ତଙ୍କ ସଂଖ୍ୟା ବଢ଼ିଚାଲିଛି। ବର୍ତ୍ତମାନ ଗତ ୩ ଦିନ ମଧ୍ୟରେ ସରକାରୀସ୍ତରରେ ୧୫ ଜଣ ଡେଙ୍ଗୁରେ ଆକ୍ରାନ୍ତ ହୋଇଥିବା ଡାକ୍ତରଖାନା ପକ୍ଷରୁ ସୂଚନା ମିଳିଛି। ବ୍ଲକ ସଦରର ପ୍ରତ୍ୟେକ ସାହିର ଘରେ ଘରେ ଏବେ ଅନେକ ଛୋଟରୁ ବଡ଼ ସଭିଏଁ ଜ୍ୱରରେ ଆକ୍ରାନ୍ତ ହୋଇଥିବା ଦେଖିବାକୁ ମିଳିଛି। ପଇସାଥିଲା ବାଲା ବାହାରକୁ ଚିକିତ୍ସା କରି ଫେରି ଆସୁଥିବା ବେଳେ ନ ଥିଲା ବାଲା ଲକ୍ଷ୍ମୀପୁର ଗୋଷ୍ଠୀ ସାସ୍ଥ୍ୟକେନ୍ଦ୍ରରେ ଭାଗ୍ୟକୁ ଆଦରି ପଡ଼ି ରହିଛନ୍ତି। ଅନ୍ୟ ପଟେ ବର୍ଷା ହେଲେ ଅଧା ଲକ୍ଷ୍ମୀପୁର ବେହାଲ ହୋଇ ପଡୁଛି। ନୂଆ ବସ୍ଷ୍ଟାଣ୍ଡଠାରୁ ଆରମ୍ଭ କରି ପୁରୁଣା ବସ୍ଷ୍ଟାଣ୍ଡ, ଶିବ ମନ୍ଦିର ରାସ୍ତା, ଆଦିବାସୀ ସାହି,୩ ହରିଜନ ସାହି, ଉପର ଦୋରା ସାହି ଓ ତଳ ଦୋରା ସାହି, ପୋଷ୍ଟ ଅଫିସ୍ ରାସ୍ତା ପୂରା ଅଳିଆ ଆବର୍ଜନାରେ ଭର୍ତ୍ତି ହୋଇପଡ଼ିଛି। ଫଳରେ ସାହି ରାସ୍ତା ଉପରେ ବର୍ଷା ପାଣି ପ୍ରବାହିତ ହୋଇ ଅଳିଆ ଆବର୍ଜନା ଛାଡ଼ି ଚାଲିଯାଉଛି। ଏପରିକି ପଞ୍ଚାୟତ ପକ୍ଷରୁ ସଫେଇ କରାଯିବା କଥା କିନ୍ତୁ ସଫେଇ ଦିଗରେ ଦୃଷ୍ଟି ଦିଆ ଯାଉ ନ ଥିବାରୁ ସବୁ ମହଲରେ ଅସନ୍ତୋଷ ପ୍ରକାଶ ପାଇଛି। ବର୍ତ୍ତମାନ ସୁଦ୍ଧା ୩ ଜଣଙ୍କର ଜ୍ୱର ହୋଇଥିବା ବେଳେ ତାହା କେଉଁ ଜ୍ୱରରେ ମୃତ୍ୟୁ ଘଟିଛି ସ୍ବାସ୍ଥ୍ୟ ବିଭାଗ ବର୍ତ୍ତମାନ ସୁଦ୍ଧା ସ୍ପଷ୍ଟ କରିନି। ତେଣୁ ଆଗକୁ ପରିସ୍ଥିତି ଭୟଙ୍କର ହୋଇ ଡେଙ୍ଗୁର କବଳରେ ସମଗ୍ର ବ୍ଲକ ଫସିବା ପୂର୍ବରୁ ତୁରନ୍ତ ଏଥିପ୍ରତି ଜିଲା ପ୍ରଶାସନ ଦୃଷ୍ଟି ଦେବାକୁ ସବୁ ମହଲରେ ଦାବି ହୋଇଛି। ଏ ନେଇ ଲକ୍ଷ୍ମୀପୁର ଡାକ୍ତର ଏସ୍ ପ୍ରଧାନଙ୍କୁ ପଚାରିବାରୁ ରବିବାର ସୁଦ୍ଧା ଲକ୍ଷ୍ମୀପୁର ସ୍ବାସ୍ଥ୍ୟକେନ୍ଦ୍ର ଅଞ୍ଚଳରେ ୧୫ ଜଣ ରୋଗୀ ଡେଙ୍ଗୁରେ ଚିହ୍ନଟ ହୋଇଥିବା ସୂଚନା ଦେଇଛନ୍ତି।
