ଦାରିଙ୍ଗବାଡ଼ି,୮ା୫(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ଅଞ୍ଚଳରେ ରହିଛି ୨୫ଟି ପଞ୍ଚାୟତ। ତେବେ ରାଜ୍ୟ ସରକାରଙ୍କ ପକ୍ଷରୁ ଯେବେଠାରୁ ଲକ୍ଷ୍ମୀବସ୍ ଚଳାଚଳ ଆରମ୍ଭ କରିଛି ସେହି ଦିନଠାରୁ ଉକ୍ତ ବ୍ଲକର ବାଡ଼ାବାଙ୍ଗା ପଞ୍ଚାୟତକୁ ଏହି ବସ୍ ସେବାରୁ ବଞ୍ଚିତ ଥିଲେ ପଞ୍ଚାୟତବାସୀ। ଏନେଇ ପୂର୍ବରୁ ‘ଧରିତ୍ରୀ’ରେ ଖବର ପ୍ରକାଶିତ ହୋଇଥିବାବେଳେ ଗତ ସୋମବାର ଏନେଇ ଧରିତ୍ରୀ ପୋର୍ଟାଲରେ ‘ଲକ୍ଷ୍ମୀ ବସ୍ର ବଢୁଛି ଚାହିଦା’ ସମ୍ପର୍କିତ ଖବର ପ୍ରକାଶିତ ହୋଇଥିଲା। ସେଥିରେ ୭ଟି ବସ୍ ୨୪ଟି ପଞ୍ଚାୟତକୁ ଲକ୍ଷ୍ମୀବସ୍ ଯାତାୟାତ କରୁଥିବା ବେଳେ ବାଡ଼ାବାଙ୍ଗାକୁ ଏହି ବସ୍ ଚଳାଚଳ କରୁ ନ ଥିବା ଉଲ୍ଲେଖ କରାଯାଇଥିଲା। ଏହା ପରେ ଲୋକଙ୍କ ଦାବି ଯଥାର୍ଥ ଅନୁଭବ କରି ଗୁରୁବାରଠାରୁ ବାଡ଼ାବାଙ୍ଗାକୁ ଦୁଇଟି ରାସ୍ତା ତଥା ଦାରିଙ୍ଗବାଡ଼ିରୁ ଜଙ୍ଗଲଘର ଓ ସିମନବାଡ଼ି ଦେଇ ଲକ୍ଷ୍ମୀବସ୍ ଚଳାଚଳ କରିଛି। ଏଥିରେ ଅଞ୍ଚଳବାସୀଙ୍କ ଖୁସି କହିଲେ ନ ସରେ। ଲୋକେ ସରକାରୀ ଓ ବେସରକାରୀ କାର୍ଯ୍ୟରେ ସିମନବାଡ଼ି ଓ ଦାରିଙ୍ଗବାଡି ଉପରେ ନିର୍ଭର କରୁଥିବାରୁ ତାଙ୍କୁ ଏହା ଅନେକ ଫାଇଦା ଦେବ ବୋଲି କହିଛନ୍ତି। ଦାରିଙ୍ଗବାଡ଼ିରୁ ହାତୀମୁଣ୍ଡା ଯାଉଥିବା ବସ୍ ଏବଂ ଦାରିଙ୍ଗବାଡ଼ିରୁ ସିର୍କାବର୍ଗ ଯାଉଥିବା ଦୁଇଟି ଲକ୍ଷ୍ମୀବସ୍ ନିଜ ଗନ୍ତବ୍ୟସ୍ଥଳରୁ ଫେରିବା ପରେ ବାଡ଼ାବାଙ୍ଗା ପଞ୍ଚାୟତକୁ ଗସ୍ତ କରୁଥିବା ବସ୍ର ସୁପରଭାଇଜର ସୁହାନି ସୁବୁଦ୍ଧି କହିଛନ୍ତି, ସେ ନିଜେ ଆଜି ଏହାର ତଦାରଖ କରିଛନ୍ତି।
